މި އަހަރު ކުރިއަށް ގެންދިއުމަށް ނިންމާފައިވާ ބޯހިމެނުމުގައި މަސައްކަތްކުރުމަށް ކުރިމަތިލުމަށް ހުޅުވާލި ފުރުސަތު ޖޫން 12، އަށް އިތުރުކޮށްފި އެވެ.
ބޯހިމެނުމުގެ މަސައްކަތަށް ޖުމްލަ 4400 މީހުން ބޭނުންވެ އެވެ. އެއީ މާލެ ސަރަހައްދަށް 2409 މީހުންނާއި އަތޮޅުތަކަށް 1991 މީހުންނެވެ.
ބޯހިމެނުމުގައި ޓްރޭނަރުންނާއި އެނިއުމަރޭޓަރުންގެ ގޮތުގައި ބައިވެރިވުމުގެ ފުރުސަތު ހުޅުވާލީ މިދިޔަ މެއި މަހުގެ ނިޔަލަށެވެ. ނަމަވެސް، އަދިވެސް މާލެއަށް ބޭނުންވާ ވަރަށް މީހުން ހަމަނުވާތީ އެ މުއްދަތު އިތުރުކުރަން މޯލްޑިވްސް ބިއުރޯ އޮފް ސްޓެޓިސްޓިކްސް އިން ނިންމީ އެވެ.
މި ހަރަކާތުގައި ބައިވެރިވާން ޝައުގުވެރިވާ މީހުންނަށް އޮންލައިންކޮށް އެޕްލައިކުރެވޭނެ އެވެ. އުމުރުން 18 އަހަރު ނުވާ ކުދިންނަށް ވެސް ބެލެނިވެރިއެއްގެ ހުއްދަ އާއެކު މި ހަރަކާތުގައި ބައިވެރިވެވޭނެ އެވެ.
"މިހާތަނަށް އައި އިރު ވަރަށް ގިނަ ރަށް ރަށުން މިވަނީ އަޅުގަނޑުމެން ބޭނުންވާ އަދަދަށް އެނިއުމަރޭޓަރުން ހަމަވެފައި، މިހާރު ބޭނުންވާ ވަރަށް ހަމަ ނުވަނީ މާލެ ސަރަހައްދުން. ޓްރެއިނަރުންނަށް ވެސް ވަރަށް ގިނަ ފަރާތްތަކަކުން ކުރިމަތިލާފައިވޭ، އެހެންކަމުން މިހާރު ޓްރެއިނަރުންނަށް ކުރިމަތިލުމުގެ ފުރުސަތު ވަނީ ބަންދުވެފައި،" މި ނޫހަށް މައުލޫމާތު ދެއްވަމުން ސްޓެޓިސްޓިކްސް ބިއުރޯ އިން ބުންޏެވެ.
މުސާރަ އާއި އެލަވަންސް
- މަސައްކަތަށް ނިކުންނަ ކޮންމެ ދުވަހަކަށް 500ރ. ގެ އެލަވެންސެއް ދޭނެ އެވެ. އަދި އިތުރަށް 10ރ ގެ އެލަވެންސެއްވެސް ދެ އެވެ. (އެއީ 7-11 ދުވަހަަށް)
- ބޯހިމެނުމުގެ މަސައްކަތުގައި ބައިވެރިވާ މީހުންނަށް އެއް ހަފުތާގެ ތަމްރީނެއް ދޭން ހަމަޖެހިފައިވެ އެވެ. އެ ތަމްރީނު ފުރިހަމަ ކުރުމަށް ނިކުންނަ ކޮންމެ ދުވަހަކަށް 100ރ. ދޭނެ އެވެ.
މި މަސައްކަތުގައި ހަރަކާތްތެރިވާ މީހުންނަށް އެލަވަންސް ދޭން ހަމަޖެހިފައި ވަނީ ތަމްރީނު ފުރިހަމަކޮށްް، ބޯހިމެނުމުގެ މަސައްކަތް ފުރިހަމަކޮށް ނިމުނީމަ އެވެ.
ރަށްރަށުގައި ތަމްރީނު ދިނުމަށް ހަމަޖެހިފައި ވަނީ މި އަހަރުގެ ޖުލައި އަދި އޮގަސްޓް މަހުގެ ތެރޭގަ އެވެ. މާލޭގައި ތަމްރީނު ދިނުމަށް ހަމަޖެހިފައި ވަނީ އޯގަސްޓާއި ސެޕްޓެމްބަރު މަހުގެ ތެރޭގަ އެވެ.
މަސައްކަތް ކުރަން ޖެހޭ ދުވަސްތައް:
- މާލެ ސަރަހައްދު: ބޯހިމެނުމަށް ބޭނުންވާ މައުލޫމާތު އެއްކުރުމަށް ހަމަޖެހިފައި ވަނީ ސެޕްޓެމްބަރު މަހުގެ 14 އިން 15 އަށެވެ. އަދި 17 އިން 25އަށް ކުރިއަށް ދާނީ ބޯހިމެނުމުގެ އަމަލީ އޮޕަރޭޝަނަށް ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން ބުނެ އެވެ.
- ބޮޑެތި ރަށްތައް: މި ރަށްތަކުގައި މައުލޫމާތު އެއްކުރުމުގެ މަސައްކަތް ކުރިއަށްދާނީ ވެސް 14 އިން 15އަށެވެ. ނަމަވެސް މި ރަށްތަކުގައި ބޯހިމެނުމުގެ އަމަލީ އޮޕަރޭޝަން ކުރިއަށް ގެންދިއުމަށް ނިންމާފައި ވަނީ 17އިން 22 އަށެވެ.
- ކުދި ރަށްތައް: މި ރަށްތަކުންވެސް މައުލޫމާތު އެއްކުރާނީ 14 އިނަ 15 އަށެވެ. އަދި އަމަލީ އޮޕަރޭޝަން ކުރާނީ 17 އިން 21އަށެވެ
މި އަހަރު ކުރިއަށްގެންދާ ބޯހިމެނުުން ކުރިއަށް ގެންދިއުމަށް ނިންމާފައި ވަނީ ޓެބްލެޓް ބޭނުންކޮށްގެންނެވެ. މިއީ ރާއްޖޭގައި މިގޮތަށް ކުރިއަށް ގެންދާ ފުރަތަމަ ބޯހިމެނުމެވެ. އެންމެ ފަހުން ރާއްޖޭގައި ބޯހިމަނާފައި ވަނީ 2014 ވަނަ އަހަރު އެވެ.
