ކައުންސިލްތަކާއި އަންހެނުން ތަރައްގީކުރާ ކޮމިޓީތަކުގެ ރައީސުން އެއްތަނަކަށް ގެނެސް, ބާރުތައް ދޫކޮށްލާފައި އޮތް ލާމަރުކަޒީ ގާނޫނު ތަންފީޒުކުރުމުގައި ދިމާވާ ދަތިތަކާއި ގޮންޖެހުންތައް ބަލައި, އޭގެ ހައްލުތަކާ މެދު މަޝްވަރާ ކުރުމަށް ރައީސް އިބްރާހިމް މުހައްމަދު ސޯލިހު, އއ. އުކުޅަހުގައި ކޮންފަރެންސްއެއް ރޭއްވެވި އެވެ. އެ ކޮންފަރެންސް ނިންމައި, ބަނދަރުމަތީ ޖަހާފައިހުރި ބޮޑު ޓެންޓުން ރައީސާއި ކައުންސިލަރުން ނުކުމެވަޑައިގެންނެވީ ޔަގީންކަމަކާ އެކު އެވެ.
"ވިއަވަތި ރާއްޖެ" ކޮންފަރެންސްގައި މެދުރާއްޖެތެރެއަށް ނިސްބަތްވާ ކައުންސިލްތަކާއި އަންހެނުންގެ ކޮމިޓީތަކުގެ ރައީސުން ގިނަ ކަންބޮޑުވުންތަކެއް ހިއްސާކުރި އެވެ. އެގޮތުން, ކައުންސިލްތަކަށް ދައުލަތުގެ ބަޖެޓުން ލިބޭ މިންވަރު މަދުވުމާއި ކޮމިޓީތަކުގެ ބަޖެޓް ކުޑަވުމާއި އެކަށީގެންވާ ވަސީލަތްތައް ނެތުން ފާހަގަކުރެވެ އެވެ.
އޭގެއިތުރުން, އަތޮޅު އަދި ރަށު ކައުންސިލްތަކުގެ އިހްތިސޯސްއާ ގުޅޭ ގޮންޖެހުންތަކާއި ގާނޫނުން ލާޒިމްކުރާ ލޭންޑް ޔޫސް ޕްލޭން ހެދުމުގައި ފަންނީ ގާބިލުކަން ނެތުމުގެ ސަބަބުން, އެ މަސައްކަތް ކުރުން ލަސްވެ ދިމާވާ ދަތިތައް ވެސް ކައުންސިލަރުން ވަނީ ފާހަގަކޮށްފަ އެވެ.
ދެ ދުވަހުގެ މުއްދަތަށް ކުރިއަށް ދިޔަ ކޮންފަރެންސް މިއަދު މެންދުރު ނިންމާލާފައިވާއިރު, އެންމެ ފަހު ކަމެއްގެ ގޮތުން ވާހަކަ ދައްކަވަމުން ރައީސް އިބްރާހިމް މުހައްމަދު ސޯލިހު ވަނީ ކައުންސިލަރުން ފާހަގަ ކުރި ހުރިހާ ކަމަކާ ގުޅޭ ގޮތުން މަޝްވަރާތައްކޮށް, އެކަމުގައި އަވަސް ހައްލުތަކެއް ގެންނަވާނެ ކަމުގެ ޔަގީންކަން ދެއްވާފަ އެވެ.
ހުރިހާ ކައުންސިލަރުން ވެސް ޖުމްލަ ގޮތެއްގައި ފާހަގަކުރީ އެއް ކަންބޮޑުވުންތަކެއްކަން ފާހަގަކުރައްވައި ރައީސް ވިދާޅުވީ, މާލީ ބާރުވެރިކަން ކައުންސިލްތަކަށް މިހާރަށްވުރެ ބޮޑަށް ދޭން ޖެހޭ ކަމަށް ގަބޫލު ކުރައްވާ ކަމަށެވެ.
ނަމަވެސް, އެކަން ކުރުމުގައި މުޅި ދައުލަތުގެ އާމްދަނީއާމެދު ވިސްނަން ޖެހޭނެ ކަމަށާއި އެހެންކަމުން ކައުންސިލްތަކުގެ ބަޖެޓް ބޮޑުކުރުމާމެދު މިނިސްޓަރުންނާއެކު މަޝްވަރާތައް ބާއްވަވާނެ ކަމަށް ރައީސް ވިދާޅުވި އެވެ.
މިހާރު ކައުންސިލްތަކަށް ދައުލަތުގެ ބަޖެޓުން ދެމުން އަންނަނީ ފަސް ޕަސެންޓެވެ. ކޮންފަރެންސްގައި ކައުންސިލްތަކުގެ ރައީސުން ޑިމާންޑްކޮށްފައިވަނީ, އެ އަދަދު އަށަކަށް މަތި ކޮށްދިނުމަށެވެ. ކައުންސިލްތަކުގެ ބަޖެޓް ބޮޑުކުރުމުގެ ގޮތުން އިންވެސްޓްމެންޓް ފަންޑެއް އެކުލަވާލެއްވުމަށް ވެސް ކައުންސިލަރުން އެދިފައިވެ އެވެ. އަދި, މާލޭގައި ހުންނަ އަތޮޅު ފިހާރަތަކުގެ ކުލި, އަތޮޅު ކައުންސިލްތަކަށް އެއްކޮށް ލިބޭނެ ގޮތް ހެދުމަށް ވެސް ޑިމާންޑްކޮށްފައިވެ އެވެ.
އެ ޑިމާންޑް ކޮންފަރެންސްގައި ކުރުމާއެކު ރައީސް ސޯލިހު ވަނީ އަތޮޅު ފިހާރަކުގެ ބަޖެޓް އެއްކޮށް ކައުންސިލްތަކަށް ދޭން ނިންމަވާފައިވާކަން އިއުލާންކުރައްވާފަ އެވެ. އޭގެއިތުރުން ކުނި މެނޭޖްކުރުމުގެ މަސައްކަތްތަކަށް ގްރީން ޓެކްސްއިން ބައެއް ދިނުމަށް ވެސް ސަރުކާރުން ނިންމާފައިވާކަން ކޮންފަރެންސްގައި ވަނީ ހާމަކޮށްފަ އެވެ.
އަތޮޅު ކައުންސިލްތަކުގެ މާލީ ބާރުވެރިކަން އިތުރު ކުރުމާއެކު, އަންހެނުން ކޮމިޓީތަކުގެ މާލީ ބާރުވެރިކަމާއެކު ވެސް ކޮންފަރެންސްގައި ބަހުސްކޮށްފައިވެ އެވެ.
ރައީސް, ބައެއް ކައުންސިލަރުންނާއެކު ކޮންފަރެންސްއާއެކު: ރައީސް ވިދާޅުވީ ނަތީޖާ ރަނގަޅު ކަމަށް
ރައީސް ސޯލިހު ވިދާޅުވި ގޮތުގައި, އަންހެނުންގެ ކޮމިޓީތަކަކީ ދާއިމީ ވަޒީފާތަކެއްގެ ގޮތުގައި ކަނޑައަޅައި އެ ތަންތަނުގެ މުސާރަ އާއި ބަޖެޓް އަދި ވަސީލަތްތައް ރަނގަޅުކުރުމަށް މަސައްކަތް ކުރައްވާނެ އެވެ. ކޮމިޓީތަކަށް ބޭނުންވާ ބިމާއި އިމާރާތް ހަމަޖެހިގެންދާނެކަން ވެސް އެމަނިކުފާނު ފާހަގަކުރެއްވި އެވެ.
އޭގެއިތުރަށް, އަތޮޅާއި ރަށުގެ އިހްތިސޯސްއާ ގުޅޭ ގޮތުން ހުރި ކަންބޮޑުވުންތައް ހައްލުކޮށް, ވީހާވެސް ބޮޑަކަށް އިހްތިސޯސްއިން މަންފާ ހޯދައި އެ ބޭނުން ކުރެވޭ ގޮތްތައް ހެދުމަށް ވެސް މަސައްކަތްތައް ސަރުކާރުން ކޮށްދެއްވާނެ ކަމަށް ރައީސް ވިދާޅުވި އެވެ. އިހްތިސޯސް ކަނޑައެޅުމުގައި ރަށްރަށުގެ މަސްލަހަތު ފުށުނާރާ ގޮތަށް އިސްކަންދޭން ޖެހޭކަން ވެސް ފާހަގަކުރެއްވި އެވެ.
އިހްތިސޯސީ ބާރު ވީހާވެސް ބޮޑަކަށް ރަށު ކައުންސިލްތަކަށް ދިނުމަށްފަހު, އެ ބާރު އަތޮޅު ކައުންސިލްތަކަށް ކުޑަވުމަކީ މައްސަލައެއް ނޫން ކަމުގައި ރައީސް ފާހަގަކުރެއްވި އެވެ. އެމަނިކުފާނު ވިދާޅުވި ގޮތުގައި އަތޮޅު ކައުންސިލްތައް ކުރިއަރައިގެން އަންނަންވީ ރަށު ކައުންސިލްތަކަށް ފަންނީ އެހީތެރިކަން ފޯރުކޮށްދޭ ތަނެއްގެ ގޮތުގައި ކަމަށެވެ.
އެއާއެކު, ލޭންޑް ޔޫސް ޕްލޭން ހެދުމަށް ކައުންސިލްތަކަށް ދިމާވާ ދަތިތައް ވެސް ސަރުކާރުގެ އެހީއާއެކު ހައްލުކޮށް ދެއްވައި, އެ ޕްލޭންތައް ވީހާވެސް އަވަހަކަށް ފާސްކުރުމަށް މަސައްކަތް ކުރައްވާނެ ކަމަށް އެމަނިކުފާނު ވަނީ ވިދާޅުވެފަ އެވެ.
ކޮންފަރެންސް ނިންމާލުމަށްފަހު, ނޫސްވެރިންނާ ވާހަކަ ދައްކަވަމުން ވެސް ރައީސް ސޯލިހު ފާހަގަ ކުރެއްވީ ކޮންފަރެންސްއިން ރަނގަޅު ނަތީޖާތަކެއް ނުކުތް ކަމެވެ. ގިނަ ކަންކަމާ މަޝްވަރާ ކުރެވި އޭގެ ހައްލުތަކާމެދު ވެސް ހިޔާލު ހޯދުނުކަން ރައީސް އުފަލާއެކު ފާހަގަކުރެއްވި އެވެ. މިފަދަ ކޮންފަރެންސްތަކުން ނެރެން ބޭނުންވާ ނަތީޖާއަކީ އެއީކަން އެމަނިކުފާނު ފާހަގަކުރެއްވި އެވެ.
