އެމްޑީޕީގެ ޗެއާޕާސަން ހޮވުމަށް މިއަދު ކުރިއަށް ގެންދިޔަ އިންތިހާބުގައި، މާލޭ ސިޓީގެ އަގުލަބިއްޔަތު އިންތިހާބުން ނާކާމިޔާބުވެ ވަޑައިގެންނެވި މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ ހޯއްދެވިއިރު، އައްޑޫ ސިޓީގެ ތާއީދު އިންތިހާބު ކާމިޔާބު ކުރެއްވި އިކޮނޮމިކް މިނިސްޓަރު ފައްޔާޒް އިސްމާއީލް ހޯއްދަވައިފި އެވެ.
އެމްޑީޕީގެ އެތެރޭގެ އިންތިހާބު ފައްޔާޒް ކާމިޔާބުކުރައްވާފައިވަނީ 58 ޕަސެންޓު ވޯޓާއެކުގަ އެވެ. އިމްތިޔާޒަށް ލިބިވަޑައިގެންނެވީ 42 ޕަސެންޓު ވޯޓެވެ.
އިންތިހާބުގެ ވަގުތީ ނަތީޖާއަށް ބަލާއިރު، މާލޭ ސިޓީގެ އަގުލަބިއްޔަތު ކުޑަ ތަފާތަކުން ހޯއްދަވައިފައިވަނީ އިމްތިޔާޒެވެ. އިމްތިޔާޒަށް މާލޭ ސިޓީން ޖުމްލަ 1920 ވޯޓު ލިބިވަޑައިގެންނެވިއިރު، ފައްޔާޒަށް ވަނީ 1873 ވޯޓު ލިބިވަޑައިގެންފަ އެވެ.
އިންތިހާބުގެ ކެމްޕެއިން ކުރެއްވިއިރު, މާލޭ ސިޓީއަށް ނިސްބަތްވާ ގިނަ މަޖިލިސް މެންބަރުން ތިއްބެވީ އިމްތިޔާޒުގެ ފަޅީގަ އެވެ. އެގޮތުން, މެންބަރު އީވާ އަބްދުالله އާއި ހަސަން ލަތީފާއި މީކާއިލް ނަސީމް, އިމްތިޔާޒުގެ ކެމްޕެއިންގައި އިސްކޮށް އުޅުއްވި އެވެ.
މާލޭ ސިޓީގެ ޖުމްލަ ނަތީޖާއިން އިންތި ކުރި ހޯއްދެއްވި ނަމަވެސް، ހުޅުމާލެ ދާއިރާ އާއި ހެންވެއިރު ދެކުނު ދާއިރާ އާއި މައްޗަންގޯޅި ދެކުނުގެ އިތުރުން މާފަންނު ދެކުނު ދާއިރާގެ ވޯޓުން ކުރި ހޯއްދަވައިފައިވަނީ ފައްޔާޒް އެވެ.
އައްޑޫ ސިޓީގެ ވަގުތީ ނަތީޖާއިން 171 ވޯޓުގެ ތަފާތަކުން ކުރި ހޯއްދަވަނީ ފައްޔާޒެވެ. މުޅި އައްޑޫ ސިޓީން ފައްޔާޒަށް 2348 ވޯޓު ލިބިވަޑައިގެންނެވިއިރު، އިމްތިޔާޒަށް 2177 ވޯޓު ލިބިވަޑައިގެންނެވި އެވެ.
އައްޑޫ ސިޓީގެ ދާއިރާތަކުގެ ތެރެއިން އިމްތިޔާޒަށް ފައްޔާޒުގެ މައްޗަށް ކުރި ހޯއްދެވުނީ ހަމައެކަނި ހިތަދޫ މެދު ދާއިރާއިންނެވެ. ކެމްޕެއިންގައި އައްޑޫއަށް ނިސްބަތްވާ ގިނަ މެންބަރުން ތިއްބެވީ ފައްޔާޒާ އެކު އެވެ. ފައްޔާޒާއެކު އައްޑޫ މީދޫ ދާއިރާގެ މެންބަރު ރޮޒައިނާ އާދަމް ކެމްޕެއިންގައި އުޅުއްވި އެވެ. އެ ސިޓީގެ މޭޔަރު އަލީ ނިޒާރު ވެސް ހުންނެވީ ފައްޔާޒާ އެކު އެވެ.
ޖުމްލަ 94،211 މީހުންނަށް ވޯޓުލުމުގެ ހައްގު އޮތް އިންތިހާބުގައި މާލޭގައި 87 ވޯޓު ފޮށި ބެހެއްޓިއިރު, 194 ރަށެއްގައި ވޯޓު ފޮށި ބެހެއްޓި އެވެ.
