އެމްޑީޕީގެ ޗެއާޕާސަންކަމުގެ އިންތިހާބުގެ ވޯޓުލުމުގައި މާލޭގައި ބައްހައްޓާފައި ހުރި ގައްދޫ ދާއިރާގެ ވޯޓު ފޮއްޓަށް ގަނޑުކޮށް ލާފައިވާ 14 ވޯޓު ކަރުދާސް ނުގުނައި އެހެން ވޯޓު ކަރުދާސްތައް ގުނުމަށް ފަހު އެ ފޮށީގެ ނަތީޖާ އިއުލާން ކޮށްފި އެވެ.
ގަލޮޅު މަދަރުސާގައި ބަހައްޓާފައި ހުރި ގައްދޫ ދާއިރާގެ ވޯޓު ފޮށީގެ ވޯޓުތައް ގުނަމުން ދަނިކޮށް، ގަނޑުކޮށް ވޯޓު ކަރުދާސްތަކެއް އަޅާފައިވާކަން ފާހަގަކުރެވި ވޯޓު ގުނުން މަޑުޖައްސައިލި އެވެ.
އެމްޑީޕީގެ އިންތިހާބުތަކާބެހޭ ކޮމިޓީގެ މުގައްރިރު މަނިކު "އަދަދު"އަށް ވިދާޅުވީ ވޯޓުލާ ފޮށީގައި ތިބި ދެ ކެންޑިޑޭޓުންގެ މަންދޫބުންނާ މަޝްވަރާކޮށް ނިންމީ ގަނޑުކޮށް އަޅާފައިވާ ވޯޓުތައް ފިޔަވައި އެހެން ވޯޓުތައް ގުނުމަށް ކަމަށެވެ.
"ދެން އެ ގަނޑުކޮށް ވޯޓު ފޮއްޓަށް އަޅާފައިވާ 14 ވޯޓާ ގުޅޭ ގޮތުން ބަލަން ޖެހޭ ކަންކަން އަޅުގަނޑުމެން ބަލާނަން، އެ ހިނގާ ދިޔަ ގޮތެއް ބެލުމަށް ފަހު އަޅަން ޖެހޭ ފިޔަވަޅެއް ވެސް އަޅާނަން،" މަނިކު ވިދާޅުވި އެވެ.
މި ވޯޓު ފޮށީގައި ކުރި ހޯއްދެވީ އިކޮނޮމިކް މިނިސްޓަރު ފައްޔާޒު އިސްމާއީލެވެ. ފައްޔާޒަށް 213 ވޯޓު ލިބިފައިވާއިރު، ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހްމީ (އިންތި)އަށް ލިބުނީ 141 ވޯޓެވެ. އަދި ބާތިލް ފަސް ވޯޓެވެ.
އެމްޑީޕީގެ ވާދަވެރި އިންތިހާބުގެ ވޯޓު ލުމުގައި ހިނގާފައިވާ އެކިއެކި ކަންކަން ފާހަގަކޮށް އިންތިގެ ޓީމުން ވަނީ ގިނަ އަދަދެއްގެ ޝަކުވާ ހުށަހަޅައިފަ އެވެ. ވޯޓުލާ ވަގުތު ފާއިތުވި ފަހުން ވޯޓުލާ ވަގުތު އިތުރު ކުރި ކަމަށް ބުނެ، އެކަމާ ގުޅިގެން މުޅި އިންތިހާބު ހުއްޓުވުމަށް ވެސް އެ ޓީމުން ވަނީ އެދިފަ އެވެ.
ނަމަވެސް, އެމްޑީޕީގެ ޝަކުވާ ބަލާ ކޮމިޓީން ބުނީ، އިންތިހާބުގެ ވަގުތު އިތުރުކޮށްފައިވަނީ ހަތަރެއްގެ ކުރިން ކަމަށް ދެ ކެންޑިޑޭޓުންނަށް ވެސް އިންތިހާބާ ގުޅޭ ކޮމިޓީން އަންގާފައިވާ ކަމަށެވެ.
އެ އިއުލާން ހަތަރެއްގެ ފަހުން ޓްވީޓް ކުރެވުނު ނަމަވެސް, ގަޑި އިތުރު ކުރުމުގެ ނިންމުން ހަތަރެއްގެ ކުރިން ނިންމާފައިވާ ކަމަށް ޝަކުވާ ބަލާ ކޮމިޓީން މި ނޫހަށް މައުލޫމާތު ދިނެވެ. އަދި އެކަން އިންތިހާބުގައި ހިމެނޭ އެންމެންނަށް ވެސް މައުލޫމާތު ފޯރުކޮށްދީފައިވާ ކަމަށެވެ.
މި އިންތިހާބުގައި މިހާތަނަށް ލިބުނު ނަތީޖާގައި ވެސް ކުރީގައި އުޅެނީ ފައްޔާޒެވެ. ފައްޔާޒަށް ގާތްގަނޑަކަށް 57 ޕަސަންޓު ވޯޓު ލިބުނުއިރު، އިންތިއަށް ލިބިފައިވަނީ ގާތްގަނޑަކަށް 43 ޕަސަންޓެވެ.
އެމްޑީޕީގެ އެތެރޭގައި ރައީސް އިބްރާހީމް މުހައްމަދު ސޯލިހްއާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފެކްޝަނެއް އުފެދިފައިވާއިރު މި އިންތިހާބުގައި ވެސް އޮތީ ފެކްޝަންތަކުގެ ވާދަވެރި ކަމެވެ. ރައީސްގެ ތާއީދު އޮތީ ފައްޔާޒަށެވެ. އަދި އިންތި ނުކުންނެވީ ނަޝީދުގެ ތާއީދާ އެކުގަ އެވެ.
