އެމްޑީޕީގެ ޗެއާޕާސަންކަމުގެ އިންތިހާބުގެ ވޯޓުލުމުގައި މާލޭގައި ބައްހައްޓާފައިހުރި ފޮއްޓަކަށް ގަނޑުކޮށް ވޯޓު ކަރުދާސްތަކެއް އަޅާފައިވާ މައްސަލަ ހޫނުވެއްޖެ އެވެ.
މައްސަލަ ޖެހިފައި ވަނީ ގަލޮޅު މަދަރުސާގައި ބަހައްޓާފައިހުރި ގައްދޫ ދާއިރާގެ ވޯޓު ފޮށީގަ އެވެ. އެ ފޮށި ގުނަމުން ދަނިކޮށް، ގަނޑުކޮށް ވޯޓު ކަރުދާސްތަކެއް އަޅާފައިވާކަން ފާހަގަކުރެވި ވޯޓު ގުނުން މަޑުޖައްސައިލި އެވެ.
އެކަމާ ގުޅިގެން އެމްޑީޕީގެ އިންތިހާބުތަކާބެހޭ ކޮމިޓީގެ މުގައްރިރު މަނިކު "އަދަދު"އަށް ވިދާޅުވީ އެ ފޮއްޓަށް ގަނޑުކޮށް ވޯޓު ކަރުދާސްތަކެއް އަޅާފައިވާ މައްސަލައެއް ލިބިފައިވާ ކަމަށެވެ.
މައްސަލަ ބަލަން ޕާޓީގެ އޮފީހަށް އެ ފޮށި ގެންދަން އިންތިހާބާ ކޮމިޓީން ނިންމާފައިވާއިރު، އެ ފޮށި އެތަނުން ނުގެންދެވޭނެ ކަމަށް އެތަނުގައި ތިބި މީހުން ދަނީ ބުނެ ހިތްހަމަނުޖެހުން ފާޅު ކުރަމުންނެވެ.
އެތަނުގައި މިހާރު ފުލުހުންވެސް ހަރަކާތްތެރިވަމުންދާއިރު، އެ މައްސަލަ އަދިވެސް ހައްލެއް ނުވެ އެވެ.
ވޯޓުލުން ނިމެން ކައިރިވެފައި ވަނިކޮށް ވޯޓުލުން ހަތަރެއްގެ ފަހުން އިތުރުކުރި ކަމަށް ބުނެ އެ އިންތިހާބުގައި ވާދަކުރާ އިމްތިޔާޒް ފަހުމީގެ ފަރާތުން އެމްޑީޕީގެ އިންތިހާބާ ގުޅޭ ޝަކުވާ އެއްވެސް ވަނީ ކޮމިޓީއަށް ހުށަހަޅައިފަ އެވެ.
އިމްތިޔާޒްގެ ކެމްޕޭން ޓީމުން ހުށަހެޅި ޝަކުވާއަކީ ވޯޓުލުން ފުރަތަމަ ހަމަވާން އޮތް ގަޑި، ހަތަރެއްގެ ފަހުން އިތުރުކުރި ކަމަށް ބުނެ އެވެ. އެ ޓީމުން ތުހުމަތު ކުރާ ގޮތުގައި, ބައެއް ވޯޓު ފޮށިތައް ބަންދުކޮށް ގުނާފައި ވެސްވެ އެވެ. ނަމަވެސް ވަގުތު އިތުރުކުރުމުން އަނެއްކާވެސް ވޯޓު ފޮށިތަކުގައި އަލުން ވޯޓުލާން ފެށީ އެވެ.
އެކަމާ ގުޅިގެން މުޅި އިންތިހާބު ހުއްޓުވުމަށް ވެސް އެ ޓީމުން ވަނީ އެދިފަ އެވެ.
ނަމަވެސް, އެމްޑީޕީގެ ޝަކުވާ ބަލާ ކޮމިޓީން ބުނީ، އިންތިހާބުގެ ވަގުތު އިތުރުކޮށްފައިވަނީ ހަތަރެއްގެ ކުރިން ކަމަށް އިންތިހާބާ ގުޅޭ ކޮމިޓީން އަންގާފައިވާ ކަމަށެވެ. އެ އިއުލާން ހަތަރެއްގެ ފަހުން ޓްވީޓް ކުރެވުނު ނަމަވެސް, ގަޑި އިތުރު ކުރުމުގެ ނިންމުން ހަތަރެއްގެ ކުރިން ނިންމާފައިވާ ކަމަށް ޝަކުވާ ބަލާ ކޮމިޓީން މި ނޫހަށް މައުލޫމާތު ދިނެވެ. އަދި އެކަން އިންތިހާބުގައި ހިމެނޭ އެންމެންނަށް ވެސް މައުލޫމާތު ފޯރުކޮށްދީފައިވާ ކަމަށެވެ.
އެންމެ ފަހު ވޯޓުގެ އަޕްޑޭޓަށް ބަލާއިރު މިހާރު ކުރީގައި އޮތީ 8000އަށްވުރެ ގިނަ ވޯޓާއެކު އިކޮނޮމިކް މިނިސްޓަރު ފައްޔާޒް އިސްމާއިލެވެ. އިމްތިޔާޒް ފަހުމީ އަށް ލިބިފައި ވަނީ 4000އަށްވުރެ ގިނަ ވޯޓެވެ.
