މެންޗެސްޓާ (މެއި 10) - މެންޗެސްޓާ ސިޓީން ބޮރޫޝިއާ ޑޯޓްމަންޑަށް ކުޅެމުން އަންނަ ނޯވޭގެ ފޯވާޑް އާލިން ބްރައުޓް ހާލަންޑް ގަންނަން އެއްބަސްވުމަކަށް އަތުވެފައިވާއިރު، އެ ޑީލް ކުރިއަށްގެންދަން އެންމެ މަސައްކަތްކުރީ ހާލަންޑްގެ ބައްޕަ، މެންޗެސްޓާ ސިޓީގެ ކުރީގެ ކުޅުންތެރިޔާ، އަލް އިންޖް ހާލަންޑް ކަމަށް މީޑިއާ ރިޕޯޓްތައް ބުނެފި އެވެ.
ރިޕޯޓްތައް ބުނާގޮތުގައި ހާލަންޑް، 21، ވަނީ ސިޓީ އަށް ބަދަލުވާން ހަދަން ޖެހޭ ފުރަތަމަ މެޑިކަލް ޓެސްޓްތަކެއް ވެސް ފުރިހަމަކޮށްފަ އެވެ. އަދި ސިޓީއާ އެކު 2027 ވަނަ އަހަރުގެ ޖޫން މަހުގެ ނިޔަލަށް ކޮންޓްރެކްޓް ހަދަން ވެސް ހާލަންޑް ހުރީ ތައްޔާރަށެވެ.
ހާލަންޑް ހޯދަން ބާސެލޯނާ، ރެއާލް މެޑްރިޑް އަދި ޕީއެސްޖީން ވެސް މަސައްކަތް ކުރަނިކޮށް އޭނާ ސިޓީ އަށް ބަދަލުވާން ނިންމީ ހާއްސަ ސަބަބެއް އޮތުމުންނެވެ. އެއީ ހާލަންޑްގެ ބައްޕަ، އަލްފް އިންޖް ކުރިން 2000-2003 އަށް ސިޓީ އަށް ކުޅެފައިވާތީ އެވެ. އަލްފް އިންްޖް ބޭނުންވާ ލެވަލަށް ސިޓީގައި ނުކުޅެވުނު ސަބަބަކީ މެންޗެސްޓާ ޔުނައިޓެޑްގެ ކުރީގެ ކެޕްޓަން، ރޯއީ ކީން ޖެހި ޓެކަލެއްގެ ސަބަބުން ތަކުރާރުކޮށް ދިމާވާން ފެށި ކަކުލުގެ އިންޖަރީތަކެވެ. އަލްފް އިންޖް ބޭނުންވަނީ ސިޓީ މިހާރު އޮތް ލެވަލުން މައްޗަށް ޖައްސައިދޭން ހާލަންޑް ލައްވައި އެހީތެެރިވެދޭން ކަމަށް ނޯވޭގެ މީޑިއާތަކުން ރިޕޯޓްކޮށްފައިވެ އެވެ.
މެޗެއްގެ ތެރެއިން ލަނޑު ޖެހުމަށް ފަހު ހާލަންޑް އުފާފާޅުކުރަނީ.--- ފޮޓޯ: އޭއެފްޕީ
އަލްފް-އިންޖްއާ އެކު ހާލަންޑް ސިޓީ އަށް ގެންދިއުމުގެ މަޝްވަރާތަކެއް ކުރި ކަމަށް ސިޓީ އަށް ކުރިން ކުޅުނު ފޯވާޑް ޕޯލް ޑިކޯވް ވެސް ވަނީ ބުނެފަ އެވެ.
މީގެ ދެ އަހަރު ކުރިން، 2020 ވަނަ އަހަރު ޖެނުއަރީ މަހު އޮސްޓްރިއާގެ ސަލްޒްބާގް ދޫކޮށް ހާލަންޑް ޑޯޓްމަންޑަށް ބަދަލުވީ 22 މިލިއަން ޑޮލަރުގެ ފީ އަކަށެވެ. މި ސީޒަން ފެއްޓުމުގެ ކުރިން ހާލަންޑް ގަންނަން ޓީމުތަކުން ކުރި މަސައްކަތްތައް ނާކާމިޔާބުވީ ޑޯޓްމަންޑުން އޭނާ ވިއްކާލަން ކީ އަގު ބޮޑުވުމުންނެވެ. ޑޯޓްމަންޑުން އޭރު ހާލަންޑް ވިއްކާލަން ކީ 150 މިލިއަން ޑޮލަރަށް ވުރެ ބޮޑުކޮށެވެ.
އެކަމަކު، ހާލަންޑާއި ޑޯޓްމަންޑުން ސޮއިކޮށްފައިވާ ކޮންޓްރެކްޓްގައިވާ ވަކި މާއްދާ އަކަށް ބަލައި މި ސީޒަނަށް ފަހު ހާލަންޑަށް 70 މިލިއަން ޕައުންޑް (96 މިލިއަން ޑޮލަރު)ގެ އަގަކަށް ޑޯޓްމަންޑް ދޫކޮށްލެވޭނެ އެވެ. ބެލެވޭ ގޮތުގައި ސިޓީން ކުރިއަށް އޮތް ދެ ހަފްތާއެއްހާ ދުވަސްތެރޭ ހާލަންޑްގެ ޓްރާންސްފާ ނިންމާނީ އެ އަގު ދައްކަން އެއްބަސްވުމެއް ހަދައިގެންނެވެ. ޑޯޓްމަންޑުން ވެސް ވަނީ އަންނަ ހަފްތާ ތެރޭ ހާލަންޑްގެ މުސްތަގުބަލާ ގުޅޭގޮތުން ކަންތައްތައް ހަމަޖެހޭނެ ކަމަށް ބުނެފަ އެވެ.
މި ސީޒަނުގައި ހާލަންޑް ވަނީ 29 މެޗުން 28 ގޯލު ޖަހައިފަ އެވެ. ޑޯޓްމަންޑް ޖޯޒީގައި އޭނާގެ ޖުމްލަ ގޯލު ރެކޯޑަށް ބަލާއިރު، 88 މެޗުން 85 ގޯލު ޖަހައި، 23 ގޯލު ޖަހަން ވަނީ ފުރުސަތު ތަނަވަސްކޮށްދީފަ އެވެ.
