ތިން ފަހަރެއްގެ މަތިން ގްރޭސް ޕީރިއަޑް މުއްދަތު އިތުރުކުރުމަށް ފަހު، ހިޔާ ފްލެޓުގައި މީހުން ދިރިއުޅެން ފެށިތާ ހަތް މަސް ފަހުން މި ހިނގާ އޭޕްރިލް މަހުން ފެށިގެން ފްލެޓުތަކަށް ކުލި ނަގަން ފަށައިފި އެވެ.
މި ފްލެޓުތަކުގެ ކުލި ދެ ގޮތަށް ދެއްކޭނެ އިންތިޒާމު ހައުސިން ޑިވެލޮޕްމަންޓު ކޯޕަރޭޝަނު (އެޗްޑީސީ) އިން ވަނީ ހަމަޖައްސައިދީފަ އެވެ. އެއީ އެޗްޑީސީގެ މައި އޮފީހުގައި ހުންނަ ކައުންޓަރުންނާއި އެ ކޯޕަރޭޝަނުގެ އޮންލައިން ޕޭމަންޓު ޕޯޓަލް "މައި ހުޅުމާލެ" މެދުވެރިކޮށެވެ.
އޮންލައިންކޮށް ފައިސާ ދައްކާނެ ގޮތް
އޮންލައިންކޮށް ފައިސާ ދައްކަން ޖެހޭނީ މައިހުޅުމާލެ ޕޯޓަލް މެދުވެރިކޮށެވެ.
މި ޕޯޓަލް މެދުވެރިކޮށް ފައިސާ ދައްކަން އީފާސް އެކައުންޓަކުން ލޮގިން ވާން ޖެހޭނެ އެވެ. އެކައުންޓެއް ނެތް ނަމަ ސީދާ އެޗްޑީސީ ޕޯޓަލްއިން ރަޖިސްޓާ ކުރަން އޮބާލަން ޖެހޭ ލިންކު ފެންނާނެ އެވެ. މި ލިންކުގައި ރަޖިސްޓްރީ ކުރުމަށް ފަހު ކާޑުން ފައިސާ ދެއްކޭނެ އެވެ.
އެޗްޑީސީ އޮންލައިން ޕޯޓަލްގެ ލިންކު: https://my.hdc.com.mv
އެޗްޑީސީ ކައުންޓަރަށް ފައިސާ ދައްކާނެ ގޮތް
އެޗްޑިސީގެ މައިއޮފީހުގައި ފައިސާ ބަލައިގަތުމަށް ހާއްސަކޮށްފައިވާ އެޗްޑީސީގެ ކަލެކްޝަން ކައުންޓަރުތަކަށް ގޮސް ފައިސާ ދެއްކޭނެ އެވެ.
މި ފްލެޓުތަކަށް ދައްކަން ޖެހެނީ ފްލެޓު ކުލީގެ 7،500ރ. އާއި މެއިންޓެނަންސް ފީއަށް 1،000ރ. ހިމެނޭހެން، 8،500ރ. އެވެ. މި އަދަދާ މެދު ހިޔާ ފްލެޓު ލިބުނު މީހުންގެ މެދުގައި ދެބަސްވުމާއި ހިޔާލު ތަފާތުވުން އޮތަސް، ހުރިހާ ރައްޔިތުން ކުލި ދައްކަން އެޗްޑީސީން ވަނީ އަންގާފަ އެވެ.
އެގޮތުން، އެޗްޑީސީން ބުނީ ހިޔާ ސަރަހައްދުގައި ޕާކު ހެދުމާއި، މަގު ހެދުމާއި، މިސްކިތް އެޅުމާއި ސްކޫލްތައް އެޅުމުގެ މަސައްކަތް ކުރަނީ މި ފައިސާއިން ކަމުން މި ހިދުމަތްތައް ދެމެހެއްޓެނިވި ގޮތެއްގައި ފޯރުކޮށްދޭން ކުލި ދައްކަން އިލްތިމާސްކުރި އެވެ.
ހިޔާ ފްލެޓުތަކުގެ ކުލި ދެއްކުމުގެ މުއްދަތަކީ ކޮންމެ މީލާދީ މަހެއްގެ 10 ވަނަ ދުވަހާ ހަމައަށެވެ. އެ ތާރީހުގެ ފަހުން ކުލިން ދައްކާ ނަމަ ދައްކަން ޖެހޭ ކުލީގެ ޕަސެންޓެއް ޖޫރިމަނާގެ ގޮތުގައި އަދާކުރަން ޖެހޭނެ އެވެ.
