ރާއްޖޭގެ ދެކުނަށް އަމާޒުކޮށް އިންޑިއާ ސަރުކާރުގެ އެހީގައި އައްޑޫގައި ހުޅުވި މަސްތުވާތަކެއްޗަށް ފަރުވާދޭ ރިހެބިލިޓޭޝަން ސެންޓަރު "ވިލުނު" އިން އަންނަ ހަފްތާ އިން ފެށިގެން މީހުންނަށް ފަރުވާދޭން ފަށާނެ ކަމަށް ހެލްތު މިނިސްޓްރީން ބުނެފި އެވެ.
ހުޅުމީދޫގައި ހުންނަ ވިލުނު ސެންޓަރުން ރަސްމީކޮށް އަންނަ ހަފްތާއިން ފެށިގެން ފަރުވާދޭން ފަށާނެ ކަމަށް އެ މިނިސްޓްރީގެ ޑެޕިއުޓީ މިނިސްޓަރު އަދި ނެޝަނަލް ޑްރަގު އެޖެންސީ (އެންޑީއޭ) ގެ ބޯޑުގެ ޗެއާމަން ޝަމާއު ޝަރީފް ވަނީ މި ނޫހަށް މައުލޫމާތު ދެއްވަމުން ވިދާޅުވެފަ އެވެ.
އެ ސެންޓަރުގެ ހިދުމަތްތައް ފެށުމުގެ ކުރިން ފަރުވާ ލިބިގަންނަ މީހުންގެ އެސެސްމަންޓު ހެދުމަށް އެންޑީއޭ އިން މިހާރު އަންނަނީ ތައްޔާރު ވަމުންނެވެ.
ވިލުނު ސެންޓަރު ހުޅުއްވައިދެއްވީ މި ހަފްތާ ތެރޭ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އައްޑޫއަށް ކުރެއްވި ދަތުރުފުޅުގަައި އިންޑިއާގެ އެކްސްޓާނަލް އެފެއާޒް މިނިސްޓަރު އެސް ޖައިޝަންކަރު، ރާއްޖޭގެ ހެލްތު މިނިސްޓަރު އަހުމަދު ނަސީމް އަދި ފޮރިން މިނިސްޓަރު އަބްދުﷲ ޝާހިދު އެވެ.
ޖުމްލަ 60 މީހުންނަށް ފަރުވާ ދެވޭ މި ސެންޓަރު ހުޅުވީ މިދިޔަ ހޯމަ ދުވަހު އެވެ.
ވިލުނު ސެންޓަރުގައި ޑިޓޮކްސިފިކޭޝަން، ޓްރީޓްމެންޓު، ރެސިޑެންޝަލް ޓްރީޓްމެންޓް، ކޮމިއުނިޓީ ރިހެބިލިޓޭޝަން އަދި ރީއިންޓެގްރޭޝަނާ ގުޅޭ ފަރުވާގެ ޕްރޮގްރާމްތައް ކުރިޔަށްގެންދާނެ އެވެ.
އެ ޕްރޮގްރާމްތައް ބިނާ ވަނީ ސައިކޮތެރަޕީގެ ދަށުން ނަފްސާނީ ޖިސްމާނީ، އިޖްތިމާއީ އަދި ރޫހާނީ ދުޅަހެޔޮކަމުގެ ވަށައިޖެހޭ ނިޒާމެއްގެ މައްޗަށެވެ.
އެ ސެންޓަރުގައި ފަރުވާދޭ މުއްދަތަކީ ފަރުވާ ހޯދާ ބަލިމީހާގެ ބޭނުންތަކަށް ބަލައި އެމީހެއްގެ ފަރުވާ ކުރިޔަށްދާ މިންވަރަކަށް ބަލައިގެން ނިންމާ ކަމެކެވެ. އެ ސެންޓަރުގައި ކުރިޔަށްގެންދަން ނިންމާފައި ވަނީ ދުނިޔޭގެ ސިއްހަތު ޖަމިއްޔާގެ އެހީގައި ތައްޔާރުކޮށްފައިވާ ޕްރޮގްރާމްތަކެކެވެ.
ވިލުނު ސެންޓަރުގެ ޕްރޮގްރާމްތަކުގައި މަސައްކަތްކުރާ ފަންނީ މުވައްޒަފުންނަށް ވަނީ އެ ސެންޓަރުގައި ދެވޭ ފަރުވާތަކާއި ގުޅޭގޮތުން ތަމްރީންތަކެއް ދީފައިވާ ކަމަށް ހެލްތު މިނިސްޓްރީން ބުނެ އެވެ. ހަމައެހެންމެ، ވިލުނުގެ ހިދުމަތްތަކާއި ގުޅޭގޮތުން އެ ސެންޓަރު ހުޅުވުމުގެ ކުރިން ހުޅުމީދޫގައި ވަނީ ހޭލުންތެރިކުރުމުގެ ޕްރޮގްރާމްތަކެއް މީގެ ކުރިން ހިންގައިފަ އެވެ.
އެ ޕްރޮގްރާމްތަކަކީ ރަށު ކައުންސިލާއި ހެލްތު ސެންޓަރާއި ރަށުގެ ޖަމިއްޔާ ޖަމާއަތްތަކާއި ފުލުހުންނަށް އަމާޒުކޮށް މަސްތުވާތަކެތީގެ މައްސަލަތަކާއި ގުޅޭގޮތުން އެ ފަރާތްތައް ހޭލުންތެރިކޮށް އެ މަސައްކަތަށް އެ ފަރާތްތަކުގެ އެއްބާރުލުން ހޯދުމަށް ކުރިޔަށް ގެންދިޔަ ޕްރޮގްރާމްތަކެއްކަމަށް ހެލްތު މިނިސްޓްރީން ބުނެ އެވެ.
ވިލުނު ސެންޓަރު ބޭނުންކުރަން ފެށުމާއެކު ރާއްޖޭގައި މަސްތުވާތަކެތީގެ ވަބާގައި ޖެހި، އެދެވޭ ފަރުވާއެއް ނުލިބި ނުވަތަ ހޯދަން ދަތިވެފައިވާ މީހުންނަށް އާ އުންމީދެއް ލިބިގެންދާނެ އެވެ. އެގޮތުން، ފަރުވާއަށް މާލެ އައިސް ކުރިމަތިވާ ދަތިތަކާއި ފަރުވާގެ އެކި މަރުހަލާއަށް އެކި ތަންތަނަށް ދަތުރުކުރަން ޖެހުމަށް ނިމުމެއް އައިސް އެއް ސެންޓަރަކުން ހުރިހާ ބާވަތެއްގެ ފަރުވާއެއް ވިލުނު އިން ލިބިގެންދާނެ އެވެ.
