ޔޫކްރެއިން ހަނގުރާމައިގެ ސަބަބުން ނިޔުކްލިއާ ކާރިސާއެއް ކުރިމަތިވެދާނެތީ ރޮމޭނިއާގެ ސަރުކާރުން ޕޮޓޭސިއަމް އަޔޮޑިން ބޭސް ހިލޭ ރައްޔިތުންނަށް ފޯރުކޮށްދޭން ނިންމައިފި އެވެ.
ރަޝިއާގެ ސިފައިން ޔޫކްރެއިނަށް އަރައި ފަށާފައިވާ ހަނގުރާމައިގައި ނިޔުކްލިއާ ކާރިސާއެއް ކުރިމަތިވެއްޖެ ނަމަ ތައިރޮއިޑް ކެންސަރު ޖެހުމުގެ ފުރުސަތު ބޮޑުވާނެތީ، ޔޫރަޕް ގައުމުތަކުގައި އަޔޮޑިންއަށް އޮތް ޑިމާންޑް ވަނީ ވަރަށް ބޮޑަށް އުފުލިފަ އެވެ.
ރޮމޭނިއާގެ ހެލްތު މިނިސްޓަރު އެލެގްޒެންޑްރު ރަފިލާ ވިދާޅުވީ ސަރުކާރުން ބޭސް ބަހަން ފަށާނީ އާއިލީ ޑޮކްޓަރުން މެދުވެރިކޮށް އަންނަ ހަފްތާއިން ފެށިގެން ކަމަށެވެ.
"އެ ބޭސް ބޭނުން ކުރަން ވާނީ ކައިރި ހިސާބެއްގައި ނިޔުކްލިއާ ހާދިސާއެއް ހިނގައިފި ނަމަ. ކަމެއް ނުހިނގާ ނަމަ އެ ބޭސް ބޭނުން ކުރާކަށް ނުވާނެ،" އޭނާ ނޫސްވެރިންނަށް ވިދާޅުވި އެވެ.
އަޔޮޑިން ބޭހާއި، އެ ބޭސް ހޯދާނެ ގޮތާއި، ރައްކާ ކުރާނެ ގޮތާއި ބޭނުން ކުރާނެ ގޮތާ ގުޅޭ ގޮތުން އާއްމުން ހޭލުންތެރި ކުރުވުމުގެ ޕްރޮގްރާމެއް ވެސް ރޮމޭނިއާގައި ފަށަން ވަނީ ތައްޔާރުވެފަ އެވެ.
ޔޫކްރެއިން ހަނގުރާމައަކީ ގިނަ އަދަދެއްގެ ނިޔުކްލިއާ ތަކެތި ހުރި ގައުމެއްގައި މިހާތަނަށް ކުރާ ފުރަތަމަ ހަނގުރާމަ އެވެ. ޔޫކްރެއިންގައި 15 ނިޔުކްލިއާ ރިއެކްޓަރު އެބަ ހުއްޓެވެ.
މާޗް މަހުގެ ކުރީކޮޅު ރަޝިއާގެ ސިފައިން ޒަޕޮރިއްޒިޒއާ ނިޔުކްލިއާ ޕްލާންޓް ހިފަން ދިން ހަމަލާއެއްގައި އެ ތަނުގައި ރޯވި އެވެ. ނަމަވެސް ގެއްލުމެއް ނުލިބި، ކޮންޓްރޯލް ކުރި އެވެ.
ދުނިޔޭގައި މިހާތަނަށް ހިނގި އެންމެ ބޮޑު ނިޔުކްލިއާ ކާރިސާ ހިނގީ 1986 ވަނަ އަހަރު ޔޫކްރެއިންގެ ޗެރްނޮބީލް ޕްލާންޓްގަ އެވެ. އެ ޕްލާންޓް ގޮވައި، އެތައް ސަތޭކަ ބަޔަކު މަރުވެ، މުޅި ޔޫރަޕަށް ރޭޑިއޯ އެކްޓިވް ބޯ ވިލާގަނޑެއް ފެތުރުނެވެ.
ރައްކާތެރި ނޫން ގޮތްތަކަށް އަޔޮޑިން ބޭސް ބޭނުން ކުރާ ނަމަ، ސީރިއަސް ސައިޑް އިފެކްޓް ފެނުން އެކަށީގެންވާ ކަމަށް ޑޮކްޓަރުން ދަނީ ބުނަމުންނެވެ.
ބައިނަލްއަގްވާމީ ސިއްހީ އިދާރާތަކުން ލަފާދެނީ ނިޔުކްލިއާ ކާރިސާއެއް ހިނގާ ސަރަހައްދާ 20 ކިލޯމީޓަރު ކައިރީގައި ހުރި ނަމަ އަވަހަށް ބޭސް ކެއުމަށެވެ.
