ހުޅުމާލޭ ފޭސް ޓޫ ހިޔާ ސަރަހައްދުގައި ތަރައްގީކުރާ ހިޔާ ލޯކަލް މާރުކޭޓުން ދޫކުރާ ގޮޅިތަކަށް ކުރިމަތިލާން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު ހުޅުވާލައިފި އެވެ.
ރޯދަ މަހު ފަސޭހައިން ކާބޯތަކެތީގެ ބާވަތްތައް ލިބޭނެ މަގުފަހި ކުރުމުގެ ގޮތުން ރޯދައަށް ވަގުތީ ގޮތުން އަޅާ މާރުކޭޓުގެ ގޮޅިތަކަށް ކުރިމަތިލެވެނީ ހަމައެކަނި ހިޔާ ފްލެޓު ލިބުނު މީހުންނަށެވެ.
މިކަމާ ގުޅިގެން އެޗްޑީސީން ކުރި އިއުލާނުގައި ބުނީ ކޮންމެ މީހަކަށް ހުށަހެޅޭނީ އެންމެ ފޯމެއް ކަމަށާއި ގޮޅި ލިބޭ މީހުން ކަނޑައަޅާނީ ގުރުއަތަކުން ކަމަށެވެ. ގޮޅިތަކަށް ފޯމު ބަލައިގަތުން ކުރިޔަށް ދާނީ މާދަމާ ހެނދުނު 9:00 އިން ފެށިގެން 11:00 އަށް ހުޅުމާލޭ ފޭސް ވަންގައި ހުންނަ ހުރަވީ ސްކޫލް ހޯލުގަ އެވެ. ގުރުއަތު ނެގުން އޮންނާނީ މެންދުރު 11:30 ގަ އެވެ.
މި ގުރުއަތު ނެގުން ކުރިޔަށް ގެންދާ ވަގުތު ގުރުއަތުން ހޮވޭ ފަރާތްތަކުން ވަގުތުން 1،500ރ. ސެކުއިރިޓީ ޑިޕޮސިޓް ދައްކަން ޖެހޭނެ ކަމަށް އެޗްޑީސީން ބުންޏެވެ.
މި ފައިސާއަކީ ގޮޅި ކުއްޔަށް ދޫކޮށްފައިވާ މުއްދަތު ހަމަވުމުން ގޮޅިއަށް ދައްކަން ޖެހޭ އެއްވެސް ފައިސާއެއް ނެތް ނަމަ އަނބުރާ ލިބޭނެ ފައިސާ އެވެ. އެކަމަކު ގޮޅި ކުއްޔަށް ދޫކުރުމުގެ އެއްވެސް މަރުހަލާއެއްގައި ކުއްޔަށް ނެގުމުގެ ފުރުސަތު ދޫކޮށްލައިފިނަމަ ނުލިބޭނެ އެވެ.
ހިޔާ ލޯކަލް މާރުކޭޓު ހުންނާނެ ސަރައްހައްދާއި ފަރުމާ ދައްކައިދޭ ކުރެހުމެއް. -- ފޮޓޯ: އެޗްޑީސީ
މިއިން ގޮޅިއެއްގެ މަހު ކުއްޔަކީ 2،000ރ. އެވެ. ކުއްޔަށް ދޫކުރަނީ 19 ގޮޅި އެވެ.
ގުރުއަތުން ހޮވޭ މީހުންނަށް އެޗްޑީސީން ސިޓީ ފޮނުވާތާ ދެ ދުވަހުގެ ތެރޭގައި އެއް މަހުގެ އެޑްވާންސް ކުލީގެ ގޮތުގައި 2،000ރ. އެ ކޯޕަރޭޝަނަށް ދޭން ޖެހެ އެވެ. އަދި، ގޮޅިއަށް ހޮވިފައިވާ ކަމުގެ ސިޓީގައިވާ ޝަރުތުތަައް ފުރިހަމަ ކުރުމުން އެއްބަސްވުމުގައި ސޮއިކުރާނެ ކަމަށް އެޗްޑީސީން ބުންޏެވެ. ނަމަވެސް އެއީ ކޮން ޝަރުތުތަކެއް ކަމެއް ނުބުނެ އެވެ.
ހިޔާ ލޯކަލް މާރުކޭޓުގެ ގޮޅި ލިބުނު ކަމުގެ އެއްބަސްވުމުގައި ސޮއިކުރާ ދުވަހުން ފެށިގެން ހަފުތާއެއްގެ ތެރޭގައި ހިދުމަތް ދޭން ޖެހެ އެވެ. ހިދުމަތް ނުފަށާނަމަ އެއްބަސްވުން ބާތިލުކުރާނެ ކަމަށް އެޗްޑީސީން ބުންޏެވެ.
