ލަންޑަން (މާޗް 24) - ޗެލްސީ އަށް ކުޅެމުން އަންނަ ޖަރުމަނުގެ ޑިފެންޑަރު އެންޓޯނިއޯ ރުޑިގާގެ ސޮއި ހޯދުމުގެ ރޭހަށް ނިއުކާސަލް ޔުނައިޓެޑުން ވެސް ވަދެފައިވާ ކަމަށް އިނގިރޭސި މީޑިއާ ރިޕޯޓްތައް ބުނެފި އެވެ.
އުމުރުން 28 އަހަރުގެ ރުޑިގާ، ޗެލްސީގެ ކޮންޓްރެކްޓްގައި ހުރީ މި ސީޒަނުގެ ނިޔަލަށެވެ. ރުޑިގާއާ އެކު ޗެލްސީން ހަދާފައިވާ ކޮންޓްރެކްޓް އާ ކުރަން އެ ކްލަބުން ކުރަމުން އަންނަ މަސައްކަތަށް އަދި އެކަށީގެންވާ ކުރިއެރުމެއް ނުލިބެ އެވެ. އެއީ ރުޑިގާ ކިޔާ މުސާރަ ބޮޑުުވުމުންނެވެ.
ރުޑިގާގެ ކޮންޓްރެކްޓް މަޝްވަރާތައް ދިގުލާފައިވަނިކޮށް، ރަޝިއާ އާއި ޔޫކްރެއިން ހަނގުރާމަ މައްސަލައިގައި އިނގިރޭސި ސަރުކާރުން ޗެލްސީގެ ވެރިޔާ ރޯމަން އަބްރަމޮވިޗަށް އެޅި ދަތިކުރުމުގެ ފިޔަވަޅުތަކުގެ އަސަރު ޗެލްސީ އަށް ވެސް ވަނީ ފޯރައިފަ އެވެ. އެ ގޮތުން ޗެލްސީ އަށް އަޅާފައިވާ ފިޔަވަޅުތަކުގެ ސަބަބުން އެ ކްލަބަށް ކުޅުންތެރިންގެ ކޮންޓްރެކްޓް އާ ކުރުމުގެ ހުއްދަ ވެސް ނެތެވެ. އެކަަމަކު، ދާދި ފަހުން ދިން ލުއިތަކުގެ ތެރެއިން އަވޭ މެޗުތަކަށް ޓިކެޓް ވިއްކަން ހުއްދަވަނީ ދީފަ އެވެ.
ޗެލްސީގެ މި ހާލަތުގެ ފައިދާނަގައި ގިނަ ކްލަބްތަކުން އަންނަނީ ރުޑިގާ ލައްވައި ޕްރީ އެގްރީމެންޓެއްގައި ސޮއިކުރަން މަސައްކަތް ކުރަމުންނެވެ. ރުޑިގާ ބޭނުންނަމަ އަންނަ ޖުލައި މަހު އެއް ވަނަ ގުޅޭގޮތަށް ބޭނުން ކްލަބަކާ އެކު މި ވަގުތު ކޮންޓްރެކްޓް ހެދޭނެ އެވެ.
ކުރިން ސްޓުޓްގާޓާއި ރޯމާ އަށް ކުޅެފައިވާ ރުޑިގާ ހޯދަން ޝައުގުވެރިވާ ކްލަބްތައް ގިނަ އެވެ. އޭގެތެރޭގައި ބަޔާން މިއުނިކް، ރެއާލް މެޑްރިޑް، ޔުވެންޓަސްގެ އިތުރުން ޕްރިމިއާ ލީގުގެ މެންޗެސްޓާ ޔުނައިޓެޑް ވެސް ހިމެނެ އެވެ.
އެ ރޭހަށް އެންމެ ފަހުން ވަނީ ސައުދީ އަރަބިއްޔާގެ ސަރުކާރުގެ ހިއްސާ އޮންނަ ފަންޑެއް އޮޕަރޭޓްކުރާ ކުންފުންޏެއް މެދުވެރިކޮށް ގަނެފައިވާ ނިއުކާސަލް އެވެ. ނިއުކާސަލް ރެލިގޭޝަނުން ސަލާމަތްވާނެ ކަމުގެ ޔަގީންކަން ލިބެމުން އަންނާތީ އަންނަ ސީޒަނަށް ޓީމު ވަރުގަދަކުރަން ހޯދާނެ ކުޅުންތެރިންނާ މެދު އެ ޓީމުން އަންނަނީ މަޝްވަރާ ކުރަމުންނެވެ. އެ ގޮތުން އެ ޓީމުން ގެންގުޅޭ ޓްރާންސްފާ ލިސްޓުގެ ކުރިގައި ރުޑިގާގެ ނަން އެބައޮތް ކަމަށް އިނގިރޭސި މީޑިއާތަކުން ވަނީ ރިޕޯޓްކޮށްފަ އެވެ.
މި ސީޒަނުގެ ނިޔަލަށް ޗެލްސީގެ ކޮންޓްރެކްޓްގައި ދެން ހުރި ކުޅުންތެރިންގެ ތެރެއިން ފާހަގަކޮށްލެވެނީ ސްޕެއިނުގެ ސެޒާ އަޒްޕިލިކުއޭޓާ އާއި ޑެންމާކްގެ އަންދްރެސް ކްރިސްޓެންސަން އެވެ. މި ދެ ކުޅުންތެރިން ވެސް ގުޅުމުގެ އެންމެ ބޮޑު ފުރުސަތެއް ހޯދީ ޒަވީ ހެނާންޑޭޒްގެ ކޯޗުކަމުގައި ކުޅެމުން އަންނަ ބާސެލޯނާއާ އެެވެ. ބާސެލޯނާ އިން ވަނީ ހިލޭ ޓްރާންސްފާއެއްގައި އޭސީ މިލާންގެ މިޑްފީލްޑަރު ފްރޭންކް ކެސިއޭ ގެންނަން އެއްބަސްވުމަކަށް އަތުވެފަ އެވެ.
