ސީލައިފް ފްލެޓްތަކުގެ މައްސަލައިގައި ހިޔާނާތުގެ ދައުވާ އުފުލާފައިވާ އެ އެ ކުންފުނީގެ ވެރިޔާ އަހުމަދު މޫސާ މުހައްމަދު (އަންމަޓީ) ބަންދުން ދޫކޮށްލަން ކްރިމިނަލް ކޯޓުން ނިންމި ނިންމުން ޕްރޮސެކިއުޓާ ޖެނެރަލް (ޕީޖީ އޮފީސް) އިން ހައިކޯޓުގައި އިސްތިއުނާފްކޮށްފި އެވެ.
އަންމަޓީ ދޫކޮށްލަން ކްރިމިނަލް ކޯޓުން މިދިޔަ އާދިއްތަ ދުވަހު އަމުރުކުުރީ އޭނާގެ މައްޗަށް ޝަރުތުތަކެއް ކަނޑައެޅުމަށް ފަހު އެވެ. ޕީޖީ އޮފީހުން އޭނާ ދޫކޮށްލި މައްސަލަ ހައި ކޯޓުގައި އިސްތިއުނާފްކުރީ މިދިޔަ ހޯމަ ދުވަހު އެވެ. މީގެ ކުރިން ވެސް ދެ ފަހަރެއްގެ މަތިން އަންމަޓި ވަނީ ބަންދުން ދޫކޮށްލާފަ އެވެ. ނަމަވެސް ހައިކޯޓުން އެ ވަނީ އެ އަމުރުތައް ބާތިލުކޮށް އޭނާ ބަންދުކޮށްފަ އެވެ.
ސީލައިފްގެ މައްސަލައަކީ އެޗްޑީސީ އާއި ސީލައިފް ގްލޯބަލް އިންކް ޕްރައިވެޓް ލިމިޓެޑާ ދެމެދު ވެފައިވާ އެއްބަސްވުމެއްގެ ދަށުން ހުޅުމާލޭގައި 3،000 ހައުސިން ޔުނިޓް އެޅުމަށް، ހަވާލުކުރުމުން އެ ޔުނިޓްތައް އެޅުމުގެ އަމަލީ މަސައްކަތް ފުރިހަމަނުކޮށް، މަކަރާއި ހީލަތުން އެކި މީހުން އަތުން ބޮޑެތި އަދަދުތަކުން ފައިސާ ނަގައި، އެ ފައިސާއަށް ހިޔާނާތްތެރިވި މައްސަލައެކެވެ.
އެ ތުހުމަތުގައި އަންމަޓީ ރާއްޖެއިން ފިލައިގެން ދިޔުމުން އޭނާ ހޯދަން ރެޑް ނޯޓިސް ވެސް ނެރުނެވެ. އޭނާ ހައްޔަރުކޮށްގެން ގެނައީ ސްރީ ލަންކާގައި ދިރިއުޅެމުން ދަނިކޮށެވެ.
