ހިޔާ ފްލެޓްތަކުގެ އެޕާޓްމެންޓް ތަކުން އުކާލާ ކުނި ނެގުން ހުއްޓާލަން ނިންމާފައިވާ ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނެފި އެވެ.
މިދިޔަ އަހަރުގެ އޮކްޓޯބަރު ގައި އެޗްޑީސީން ހިޔާ ސަރަހައްދު ސާފުކުރަން ފެށީ، ކުނީގެ މައްސަލަ ބޮޑުވެ އާންމުންގެ ޝަކުވާތައް ލިބެމުން ދިޔުމާ ގުޅިގެން އެ މައްސަލަ ހައްލުކުރުމުގެ ގޮތުންނެވެ. އެއާއެކު ވެމްކޯއަށް ހަވާލުކުރީ ގޭގެއިން ނެރޭ ފަސޭހައިން ނައްތާލެވޭ ކުނި ނެގުމަށެވެ. އަދި، އެޗްޑީސީން ނަގަނީ ގޭބަސީތަކުން ނެރޭ އެހެނިހެން ކުންޏެވެ.
އެޗްޑީސީން މިއަދު "އަދަދު" އަށް ބުނީ މި މަހުގެ 31 އިން ފެށިގެން އެޗްޑީސީން ނަގަމުން އައި ކުނި ނެގުން ހުއްޓާލާނެ ކަމަށެވެ.
"އޭޕްރީލް އެކަކުން ފެށިގެން ކުނި އުކާލަން ޖެހޭނީ އެ ފްލެޓްގެ ވެރިފަރާތުން އެކަމަށް ހާއްސަ ކުރެވިފައިވާ މުއައްސަސާތަކާ ގުޅިގެން،" އެޗްޑީސީން ބުންޏެވެ.
އެހެންކަމުން، މިހާރު ކުނި އަޅަމުންދާ ސަރަހައްދުތަކަށް އަންނަ މަސް ފެށުމާއެކު ކުނި އެޅުން މަނާވާނެ ކަމަށް އެޗްޑީސީން ބުންޏެވެ.
ފުލެޓްތަކުގައި މަސައްކަތް ކުރަމުންދާ މީހުން، މި މަސް ނިމުމާއެކު ކަނޑައަޅާ ސަރަހައްދުތަކަށް ކުނި ޖަމާކުރުމަށް އެޗްޑީސީން ވަނީ އިލްތިމާސް ކޮށްފަ އެވެ. އަދި އެޗްޑީސީން ބުނީ އެ ކޯޕަރޭޝަންގެ އިންސްޕެކްޓަރުން ކުނީގެ ކަންކަން އިންސްޕެކްޓް ކުރަމުންގެންދާނެ ކަމަށެވެ.
