މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ)ގެ ލޯކަލް މީޑިއާ ޕާޓްނަރަކަށް "އަދަދު" އޮންލައިން ހަމަޖައްސައިފި އެވެ.
އެމްބީބީއޭ އާއި "އަދަދު"ގެ ދެމެދުގައި ވެވުނު އެއްބަސްވުމުގައި ސޮއިކުރުމަށް ބޭއްވި އިވެންޓް އޮތީ އިއްޔެ އެވެ. އެމްބީބީއޭގެ ފަރާތުން އެއްބަސްވުމުގައި ސޮއިކުރީ އެމްބީބީއޭގެ ފަރާތުން ސޮއިކުރެއްވީ އެ އެސޯސިއޭޝަންގެ ރައީސް އަބްދުﷲ އަރީފް (ފުކޫ) އެވެ. "އަދަދު"ގެ ފަރާތުން ސޮއިކުރީ އެސޯސިއޭޓް އެޑިޓަރު (ސްޕޯޓްސް)، އައްޒާމް އަލިފުޅު އެވެ.
މި އެއްބަސްވުމުގެ ތެރެއިން އެމްބީބީއޭގެ ފަރާތުން ބާއްވާ މުބާރާތްތަކާ ބެހޭ އެންމެ ފަހުގެ މައުލޫމާތުތައް ގެނެސްދިނުމާއި ބޮޑީބޯޑިން އެސޯސިއޭޝަނުން އިސްނަގައިގެން ކުރިއަށްގެންދާ ޔޫތު ޑިވެލޮޕްމަންޓް ޕްރޮގްރާމްތަކުގައި އިސްކޮށް "އަދަދު" އިން ހަރަކާތްތެރިވާނެ އެވެ. ބޮޑީބޯޑަރުންގެ ޕްރޮފައިލް ގެނެސްދިނުމާއި ޒަމާނީ ވިސްނުންތަކާ އެއްގޮތަށް މީޑިއާގައި ބޮޑީބޯޑިން ޕްރޮމޯޓްކުރުމުގައި އެމްބީބީއޭ އާއި "އަދަދު" އިން ގުޅިގެން މަސައްކަތް ކުރާނެ އެވެ.
އެމްބީބީއޭ އިން ދާދި ފަހުން ވަނީ އެ އެސޯސިއޭޝަންގެ ޑިޖިޓަލް ޕާޓްނަރެއްގެ ގޮތުގައި ދިރާގުއާ އެކު ސޮއިކޮށްފަ އެވެ. އަދި މި އަހަރު ބޮޑީބޯޑިން އިން ބާއްވާ ފުރަތަމަ މުބާރާތް، ކަމަށްވާ ބުރުނު ޝިކާރު ބޮޑީބޯޑިން ޗެލެންޖްގެ މެއިން ސްޕޮންސަރަކަށް ހަމަޖައްސާފައިވަނީ އެމްޓީސީސީ އެވެ.
މިދިޔަ އަހަރު އޭޕްރީލް މަހު ވުޖޫދުވި "އަދަދު" ނޫހަކީ ރާއްޖޭގެ އެންމެ ބޮޑު ކުޅިވަރު އެސޯސިއޭޝަން ކަމަށްވާ ފުޓްބޯލް އެސޯސިއޭޝަން (އެފްއޭއެމް)ގެ ވެސް ޕާޓްނަރެކެވެ. "އަދަދު" އަކީ ކްރިކެޓް ބޯޑް އޮފް މޯލްޑިވްސް (ސީބީއެމް) އާއި ބާސްކެޓްބޯލް އެސޯސިއޭޝަން އޮފް މޯލްޑިވްސް (އެމްބީއޭ)ގެ ވެސް ޕާޓްނަރެކެވެ. އަދި ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ ވެސް ޕާޓްނަރެކެވެ.
މިދިޔަ އަހަރު ރާއްޖޭގައި ބޭއްވި އުރީދޫ ސާފް ޗެމްޕިއަންޝިޕްގެ އޮންލައިން އަދި ޕީއާރް ޕާޓްނަރަކީ ވެސް "އަދަދު" އެވެ. ބެޑްމިންޓަން ޑިވެލޮޕްމަންޓް ޕާޓްނަރެއްގެ ގޮތުގައި "އަދަދު" އިން ވަނީ ރިވައިވަލް ސްޕޯޓްސް ކްލަބާ އެކު ވެސް އެއްބަސްވުމެއް ގާއިމްކޮށްފަ އެެވެ. މީގެ އިތުރުން މުޅި ރާއްޖެ އަށް ހުޅުވާލައިގެން މިހާރު ކުރިއަށްދާ "ސޮނީ ސްޕޯޓްސް ގޯލްޑަން ފުޓްސަލް ޗެލެންްޖް 2022" ގެ ޕީއާރް ޕާޓްނަރަކީ ވެސް "އަދަދު" އެވެ.
