މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން ހަތް އަހަރަށް ފަހު އަލުން ބުރުނު ޝިކާރު ބޮޑީބޯޑިން ޗެލެންޖް ބާއްވާއިރު މުބާރާތުގެ ޓައިޓަލް ސްޕޮންސަރަކަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ހަމަޖައްސައިފި އެވެ.
ބޮޑީބޯޑިން ސީޒަން ފަށާ ބުރުނު ޝިކާރު ބޮޑިބޯޑިން ޗެލެންޖް އޮންނާނީ މި މަހު 20-30 އަށް ރާޅުގަނޑު ސަރަހައްދުގަ އެވެ. އެމްޓީސީސީ ޓަވަރުގައި އިއްޔެ ބޭއްވި ރަސްމިއްޔާތެއްގައި ބުރުނު ޝިކާރު ބޮޑީބޯޑިން ޗެލެންޖްގެ ސްޕޮންސަރު އެއްބަސްވުމުގައި އެމްޓީސީސީގެ ފަރާތުން ސޮއިކުރެއްވީ ސީއީއޯ އާދަމް އާޒިމެވެ. އެމްބީބީއޭގެ ފަރާތުން ސޮއިކުރެއްވީ އެ އެސޯސިއޭޝަންގެ ރައީސް އަބްދުﷲ އަރީފް (ފުކޫ) އެވެ.
އިއްޔެ ބޭއްވި އިވެންޓްގައި އެމްޓީސީސީގެ ސީއީއޯ އާޒިމް (ކ) އާއި އެމްބީބީއޭގެ ރައީސް ފުކޫ ކޮންޓްރެކްޓްގައި ސޮއިކުރަނީ.-- ފޮޓޯ: އަބްދުﷲ އިޔާން/ އަދަދު
އެމްބީބީއޭގެ ހަރަކާތްތައް ރަސްމީ ސިފައެއް ޖެހިގެން ފެށުނުއިރު، އެންމެ ފުރަތަަމަ ބޭއްވި އެއް މުބާރާތަކީ ބުރުނު ޝިކާރު ބޮޑީބޯޑިން ޗެލެންޖް އެވެ. އެ ގޮތުން 2013 ވަނަ އަހަރު ފަށައި، އޭގެ ތިން މުބާރާތް ޖެހިޖެެހިގެން ތިން އަހަރު ބޭއްވި އެވެ. އެކަމަކު، ފަހުން އެކި ސަބަބުތަކާ ހުރެ އެ މުބާރާތް އޮތީ ހުއްޓިފަ އެވެ. ހަތް އަހަރުގެ މެދުކެނޑުމަކަށް ފަހު އަލުން ބުރުނު ޝިކާރު ބާއްވާއިރު، އެމްޓީީސީސީ ފަދަ ސްޕޮންސަރުން މުބާރާތުގައި ބައިވެރިވުމަކީ މުބާރާތް ޕްރޮމޯޓްކުރުމަށް ލިބޭ ހިތްވަރެކެވެ.
ބުރުނު ޝިކާރު ބޮޑީބޯޑިން ޗެލެންޖަކީ ރާއްޖޭގައި މުޅިން އަލަށް މި ފަހަރު ފަށާ، ގައުމީ ބޮޑީބޯޑިން ލީގުގެ ފުރަތަމަ މުބާރާތެވެ. އެހެންކަމުން، މިއީ ކޮންމެ ގޮތެއް ވިޔަސް ތާރީހީ މުބާރާތަކަށް ވާނެ އެވެ.
މި އަހަރުގެ ކަލަންޑަރުގައި ބޮޑީބޯޑިން ލީގެއްގެ ގޮތުގައި ޖުމްލަ ހަ އިވެންޓެއް ވަނީ ހިމަނައިފަ އެވެ. އެއީ މި މަހު 20-30 އަށް އޮތް ބުރުނު ޝިކާރު ބޮޑީބޯޑިން ޗެލެންޖް، މެއި 26 އިން ޖޫން 4 އަށް އޮތް ލަބޭރާ ބޮޑީބޯޑިން ޗެލެންޖް، ޖުލައި 14-23 އަށް ބާއްވާ ގައުމީ ބަނޑުފިލާ ޗެލެންޖް، ސެޕްޓެމްބަރު 10 ގައި އޮންނަ ސުލްޓާން އޮފް ތަނބުރުދޫ، އޮކްޓޫބަރު 6-15 އަށް ބާއްވާ އަދަހުކުރު ގޮންޖެހުން އަދި އޮކްޓޫބަރު 6-15 އަށް ބާއްވާ މުލަ ބޮޑީބޯޑިން ޗެލެންޖް އެވެ. މި އިވެންޓްތައް ރޭވިފައިވާ ގޮތަށް ބަލާއިރު، ފަސް މުބާރާތް އޮންނާނީ މާލޭ ރާޅުގަނޑު ސަރަހައްދުގަ އެވެ. އަދި އެއް އިވެންޓް، ކ.ތަނބުރުދޫގައި ކުރިއަށްދާނެ އެވެ.
