ރިސޯޓެއް ހެދުމުގެ މަސައްކަތަށް ބިދޭސީން ގެނައުމުގެ ނަމުގައި އިކޮނިކް މިނިސްޓްރީން ބޮޑު ހިޔާނާތެއް ވެފައިވާ ކަމަށް ރައްޔިތުންގެ މަޖިލީހުގެ މާފަންނު އުތުުރު ދާއިރާގެ މެމްބަރު އިމްތިޔާޒް ފަހުމީ (އިންތި) މިއަދު ތުހުމަތުކުރައްވައިފި އެވެ.
އެމްޑީޕީގެ ޗެއާޕާސަންކަމަށް ބޭފުޅަކު ހޮވަން ބާއްވާ އިންތިހާބު ލަސްކުރުމާ ބެހޭ ގޮތުން އެޕާޓީގެ ގައުމީ މަޖިލީހުން ރޭ ބޭއްވި ބައްދަލުވުމެއްގައި ބޮޑު ޒުވާބެއް ހިނގާފައި ވަނިކޮށް މަޖިލީހުގެ މިއަދުގެ ޖަލްސާގައި އިންތި އާއި އޭނާއަށް ތާއީދުކުރައްވާ ބައެއް މެމްބަރުން ސަރުކާރަށް ވަރަށް ބޮޑަށް ފާޑުވިދާޅުވި އެވެ.
އެމްޑީޕީގެ ޗެއާޕާސަން ކަމަށް ވާދަކުރައްވަނީ އިންތި އާއި އިކޮނޮމިކް މިނިސްޓަރު ފައްޔާޒް އިސްމާއީލެވެ.
މިއަދުގެ ޖަލްސާގައި އިންތި ތުހުމަތުކުރެއްވީ ހިޔާނާތުގެ ބައެއް ބޮޑެތި މައްސަލަތައް ސަރުކާރުން ނުބަލަން އުޅޭ ކަމަށެވެ. އޭގެ މިސާލެއްގެ ގޮތުގައި އޭނާ ދެއްކެވީ ކޮވިޑް-19 ގެ ބަލިމަޑުކަން އައުމުން ވެންޓިލޭޓަރުތަކެއް ގަންނަން ބޭރުގެ ކުންފުންޏަކަށް ފައިސާ ދިނުމަށް ފަހު ވެންޓިލޭޓަރުތައް ނުލިބުނު މައްސަލަ އެވެ.
"އިކޮނޮމިކް މިނިސްޓްރީއަށް، ހަދަމުން ދިޔަ ރިސޯޓެއް ކަމަށް ބުނެ 1،000 އަށް ވުރެ ގިނަ ކޯޓާ ހޯދުމަށް ހުށަހެޅި. އޭގެ ތެރެއިން ނުވަސަތޭކައެއްހާ ކޯޓާ އެޕްރޫވްކޮށްފައި، ދުއިސައްތައެއްހާ މީހުން ވަގަށް އެތެރެވެފައިވޭ. މިހާރު ތިން އަހަރު ގާތްގަނޑަކަށް މިއޮއް ދަނީ. އެ މައްސަލަ ބެލުމުގެ ޝައުގުވެރިކަމެއް ނެތް،" އިންތި ވިދާޅުވި އެވެ.
އޭނާ ވިދާޅުވީ އެ ހިޔާނާތުގައި ބައިވެރިވި މީހުން މިނިސްޓްރީ ތެރޭގައި ތިބޭނެ ކަމަށެވެ. އެ މައްސަލަ އިމިގްރޭޝަނުން ފުލުހުންނަށް ހުށަހަަޅާފައިވާ ކަމަށާއި އެހެން ނަމަވެސް, އެ ތަހުގީގު ކުރިއަށް ނުދާ ކަމަށެވެ. އެ މައްސަލަ ފުލުހުންގެ އިދާރާއަށް ހުށަހަޅާފައި އޮންނަތާ ދެ އަހަރަށް ވުރެ ގިނަ ދުވަސް ވެއްޖެ ކަމަށް ވެސް އޭނާ ވިދާޅުވި އެވެ.
"ބޮޑު ހިޔާނާތެއް. މިލިޔަން މިލިޔަނުގެ ހިޔާނާތެއް އެ ވެސް. ހަދަމުން ދިޔަ ރިސޯޓެއް ކަމަށް ބުނެ އޮޅުވާލައިގެން މިހާ ގިނަ އަދަދެއްގެ މީހުންނަށް ވަގު ކޯޓާ ދޫކޮށް ނިންމައިލި އިރުގައި މިކަން އެނގޭނެ. ބައިވެރިން ތިބޭނެ،" އިންތި ވިދާޅުވި އެވެ.
އެމްޑީޕީގެ ވެރިކަމެއްގައި ރައްޔިތުންނަށް އެގޮތަށް ހިޔާނާތްތެރި ވަމުންދާތީ ކަންބޮޑުވެވަޑައިގަންނަވާ ކަމަށާއި ޕާޓީ އުފެދުނު އުސޫލުތަކާ ދިމާ އިދިކޮޅަށް ޕާޓީ ގެންދާތީ އެކަން ކުށްވެރިކުރައްވާ ކަމަށް ވެސް އޭނާ ވިދާޅުވި އެވެ.
