ރައްޔިތުންގެ މަޖިލީހުގެ މެމްބަރުންގެ ތެރެއިން ބަޔަކު ސަރުކާރަށް ޖެއްސުންކުރާ ކަމަށް ބައެއް ވަޒީރުން ތުހުމަތުކުރައްވާ ކަމަށް ވިދާޅުވެ، އެ ތުހުމަތު ރައްދުވާ މެމްބަރުންގެ ނަންތައް "ވަޒީރު ވިދާޅުވާން" ގަލޮޅު ދެކުނު ދާއިރާގެ އެމްޑީޕީ މެމްބަރު މީކާއީލް އަހުމަދު ނަސީމު މިއަދު ގޮވާލައްވައިފި އެވެ.
ވެރިކަން ކުރާ ކޯލިޝަނުގެ މައިޕާޓީ، އެމްޑީޕީގެ ގައުމީ މަޖިލީހުން ރޭ ބޭއްވި ޖަލްސާގައި އެޕާޓީގެ "ދެ ފެކްޝަން"ގެ ދެމެދުގައި ބޮޑު އަރައިރުމެއް ހިނގާފައި ވަނިކޮށް، މަޖިލީހުގެ މިއަދުގެ ޖަލްސާގައި މީކާއީލް ވިދާޅުވީ މަޖިލީހުގެ ތެރެއިން ސަރުކާރަށް ޖެއްސުންކުރާ ކަމަށް ބައެއް ވަޒީރުން ތަކުރާރުކޮށް ތުހުމަތުކުރައްވާ ކަމަށެވެ. އޭނާ ވިދާޅުވި ގޮތުގައި ބައެއް ވަޒީރުން އެ ތުހުމަތު އަމާޒުކުރަނީ އެމްޑީޕީގެ މެމްބަރުންގެ ތެރެއިން ބަޔަަކަށެވެ. އެއީ ވަރަށް ކަންބޮޑުވާ ކަމެއް ކަމަށް ވެސް އޭނާ ވިދާޅުވި އެވެ.
"އެ އިލްޒާމު އަޅުވާ ކަމަށް ވާނަމަ، އެ ވަޒީރުންނަށް ކެރިވަޑައިގަންނަވަން ޖެހޭނެ މި ރައްޔިތުންގެ މަޖިލީހުން އެކަން ކުރައްވަނީ ކޮން މެންބަރުންނެއްކަން. އަދި ކުރައްވަނީ ކޮން މަސައްކަތެއްކަން ސާފުކޮށް ރައްޔިތުންނަށް ބުނެެދޭން،" މީކާއީލް ވިދާޅުވި އެވެ.
އޭނާ ވިދާޅުވީ ސަރުކާރަށް ޖެއްސުންކުރުމުގެ ގޮތުން ބޭރުކޮށްލީ ކޮން އިސްލާހެއްކަމާއި ބޭރުކޮށްލީ ކޮން ބިލެއްކަން އަދި ބަޖެޓް ފާސްކުރުމަށް ހުރަސްއަޅަން ކުރީ ކޮންކަމެއް ކަން ވެސް ވަޒީރު ވިދާޅުވެއްދެއްވަން ޖެހިވަޑައިގަންނަވާނެ ކަމަށެވެ.
އޭނާ ވިދާޅުވީ އެ ސުވާލުތަކަށް ދެއްވާނެ ޖަވާބެއް ނޯންނާނެ ކަމަށާއި ސަރުކާރު ގެންނަން ވެސް އަދި ސަރުކާރަށް ވާގިވެރިވާން ވެސް ތިއްބެވީ ހަމަ އެމްޑީޕީގެ މެމްބަރުން ކަމަށެވެ.
މީކާއިލްގެ ފާޑުކިއުން އަމާޒުކުރެއްވީ ބެލެވޭ ގޮތުގައި އިކޮނޮމިކް މިނިސްޓަރު ފައްޔާޒް އިސްމާއީލަށެވެ. އެހެން ނަމަވެސް އޭނާ ވަކި ވަޒީރެއްގެ ނަން ވިދާޅެއް ނުވެ އެވެ.
