ވާދަވެރިކަން ބޮޑުވެފައިވާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަންގެ އިންތިހާބުގެ ތާރީހާ މެދު މިރޭ އޮންނަ އެ ޕާޓީގެ ގައުމީ މަޖިލީހުގައި ގޮތެއް ނިންމަން އެޖެންޑާ ކޮށްފި އެވެ.
އިމާދުއްދީން ސްކޫލް ހޯލުގައި މިރޭ 08:30 ގައި އޮންނަ ޖަލްސާއަށް ދެ ކަމެއް ވަނީ އެޖެންޑާ ކޮށްފަ އެވެ.
އެޖެންޑާގެ ފުރަތަމަ ކަމަކަށް އޮތީ ޗެއާޕާސަން، އަންހެނުންގެ ރޫހު އަދި ޒުވާނުންގެ ހިތްވަރުގެ އިންތިހާބު ރޯދަ މަހާ ދިމާވާތީ އެ އިންތިހާބުތައް ރޯދަ މަހާ ދިމާނުވާ ގޮތަކަށް ބޭއްވުމާ މެދު ގޮތެއް ނިންމުމެވެ. އަދި، ދެވަނަ ކަމަކަށް އޮތީ އަންހެނުންގެ ރޫހުގެ އިންތިހާބުގައި އެ ޕާޓީގެ ހުރިހާ އަންހެން މެމްބަރުންނަށް ވޯޓުލެވޭނެ ގޮތެއް ހަމަޖެއްސުމާމެދު ގޮތެއް ނިންމުމެވެ.
މި ދެ ހުށަހެޅުން ވެސް ހުށަހަޅާފައި ވަނީ އެމްޑީޕީގެ އިންތިހާބާ ބެހޭ ކޮމިޓީންނެވެ. މިހާރު އޮތް ގޮތުން މި އިންތިހާބުތައް ބާއްވާނީ އެޕްރީލް 16، ގަ އެވެ. އެއީ، ރޯދަ މަހުގެ ތެރެ އެވެ.
އިންތިހާބާ ބެހޭ ކޮމިޓީން މި ގޮތަށް ހުށަހަޅާފައިވާއިރު އިންތިހާބު ފަސްކުރުމާމެދު އިންތިހާބުގައި ވާދަކުރައްވާ ދެ ކެންޑިޑޭޓުންގެ މެދުގައި ވަނީ ހިޔާލުތަފާތުވުންތަކެއް އުފެދިފަ އެވެ.
އެގޮތުން، އިންތިހާބުގައި ވާދަކުރައްވާ އިކޮނޮމިކް މިނިސްޓަރު ފައްޔާޒް އިސްމާއިލްގެ ކެމްޕޭން ޓީމުން ވަނީ އިންތިހާބު ފަސްކުރުމަށް އެދި ހުށަހަޅާފަ އެވެ. އެއީ، ރޯދަ މަހަކާއި ދިމާވާތީ، ވޯޓުލުމާއި ކެމްޕޭން ހަރަކާތްތައް ކުރިޔަށް ގެންދިޔުމަށް ދަތިތަކާ ކުރިމަތިވާނެތީވެކަމަށް އެ ކެމްޕޭނުގެ ފަރާތުން ބުނެ އެވެ.
ނަމަވެސް، އެ އިންތިހާބުގައި ދެން ވާދަކުރައްވާ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީގެ ކެމްޕޭނުގެ ފަރާތުން ވަނީ އިންތިހާބު ފަސްކުރުމަށް ދެކޮޅު ހަދައިފަ އެވެ.
އިންތިގެ ކެމްޕޭނުގެ ފަރާތުން ވާހަކަ ދައްކަވަމުން މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު ވަނީ އިންތިހާބު ފަސްކުރުމުގެ ބަދަލުގައި އަވަސްކުރުމަށް އިމްތިޔާޒްގެ ޓީމުން ތާއިދުކުރާކަން ހާމަކުރައްވާފަ އެވެ.
އެހެންކަމުން، މިރޭގެ ގައުމީ މަޖިލީހުން ނިންމާ ގޮތެއް ވެގެންދާނީ އެމްޑީޕީގެ އެތެރޭގެ ކޮންޓްރޯލް އޮތީ ކޮން ފަޅިޔަކަށްކަން ހާމަވެގެންދާނެ ނިންމުމަކަށެވެ.
