މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ގައުމީ މަޖިލިސް ޖަލްސާއެއް މާދަމާ ރޭ ބާއްވަން ތާވަލުކޮށްފި އެވެ.
އެމްޑީޕީން ބުނީ އެ ޖަލްސާ އޮންނާނީ މާދަމާ ރޭ 8:30 ގައި އިމާދުއްދީން ސްކޫލުގެ ހޯލުގައި ކަމަށެވެ. އެ ޖަލްސާގައި އަންނަ އޭޕްރިލް މަހުގެ 16 ވަނަ ދުވަހު ބާއްވަން ހަމަޖެހިފައިވާ އެ ޕާޓީގެ ޗެއާޕާސަންގެ އިންތިހާބު ފަސްކުރުމާމެދު ގޮތެއް ނިންމާނެ އެވެ.
އެ އިންތިހާބު ފަސްކުރުމާމެދު އިންތިހާބުގައި ވާދަކުރައްވާ ދެ ކެންޑިޑޭޓުންގެ މެދުގައި ވަނީ ހިޔާލުތަފާތުވުންތަކެއް އުފެދިފަ އެވެ. އެގޮތުން އިންތިހާބުގައި ވާދަކުރައްވާ އިކޮނޮމިކް މިނިސްޓަރު ފައްޔާޒް އިސްމާއިލްގެ ކެމްޕޭން ޓީމުން ވަނީ އިންތިހާބު ފަސްކުރުމަށް އެދި ހުށަހަޅާފަ އެވެ.
އެއީ ރޯދަ މަހަކާއި ދިމާވާތީ، ވޯޓުލުމާއި ކެމްޕޭން ހަރަކާތްތައް ކުރިޔަށް ގެންދިޔުމަށް ދަތިތަކާ ކުރިމަތިވާނެތީވެކަމަށް އެ ކެމްޕޭނުގެ ފަރާތުން ބުނެ އެވެ.
ނަމަވެސް އެ އިންތިހާބުގައި ދެން ވާދަކުރައްވާ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީގެ ކެމްޕޭނުގެ ފަރާތުން ވަނީ އިންތިހާބު ފަސްކުރުމަށް ދެކޮޅު ހަދައިފަ އެވެ.
އެގޮތުން އެ ކެމްޕޭނުގެ ފަރާތުން ވާހަކަދައްކަވަމުން މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު ވަނީ އިންތިހާބު ފަސްކުރުމުގެ ބަދަލުގައި އަވަސްކުރުމަށް އިމްތިޔާޒްގެ ޓީމުން ތާއިދުކުރާ ކަމަށެވެ. ނަމަވެސް އެއީ ޕާޓީގެ މެމްބަރުންނަށް ރޯދަ މަހާ ގުޅިގެން ދަތިތަކާއި ކުރިމަތިވާނަމަކަމަށް ވަހީދު ވިދާޅުވި އެވެ.
ވަހީދު ވަނީ އިންތިހާބު ގަނޑުބަނޑުކޮށް މަކަރު ހެދުމުގެ ފުރުސަތު އެ ކެމްޕޭނުގެ ފަރާތުން ނުދޭނެކަމަށް މީގެ ކުރިން ބުނެފަ އެވެ.
