"މޯލްޑިވްސް ހައިޑްރޮގްރަފިކް ސާވޭ" ގެ ނަމުގައި ދައުލަތުގެ އިދާރާއެއް އުފެއްދުމަށްޓަކައި ޑިފެންސް މިނިސްޓްރީގެ މަސައްކަތުގެ ދާއިރާއަށް ބަަދަލު ގެންނަން ސަރުކާރުން ހުށަހަޅާފައިވާ ހުށަހެޅުމަށް ރައްޔިތުންގެ މަޖިލީހުގެ މިއަދުގެ ޖަލްސާގައި ކުރި ބަހުސް ހޫނުވެއްޖެ އެވެ.
ހައިޑްރޮގްފިކް އޮފީސް އުފެއްދުމުގެ މަޖިލީހުގެ ކަމާ ބެހޭ ކޮމިޓީން ދިރާސާކޮށް ނިންމި ގޮތުގެ ރިޕޯޓަށް މިއަދުގެ ޖަލްސާގައި ކުރި ބަހުސް ޒުވާބަކަށް ބަދަލުވީ ނައިފަރު ދާއިރާގެ ޕީޕީއެމް މެމްބަރު އަހުމަދު ޝިޔާމް ދެއްކެވި ވާހަކައިގައި ސަރުކާރަށް ބޮޑެތި ތުހުމަތުތަކެއް ކުރެއްވުމުންނެވެ.
ހައިޑްރޮގްރަފިކް އޮފީސް އުފައްދަނީ ރާއްޖޭގެ ކަނޑުތަކުގެ އަޑީގެ ސާވޭތައް ކޮށް ޗާޓްކުރަހަން އަވަށްޓެރި އިންޑިއާއާ އެކު ވެފައިވާ އެއްބަސްވުމެއް ތަންފީޒުކުރުމަށެވެ. އެ އެއްބަސްވުމަކީ ރާއްޖޭގެ ސިޔާދަތަށް ގެއްލުންވާ ގޮތަށް ވެފައިވާ އެއްބަސްވުމެއް ކަމަށް އިދިކޮޅު ޕީޕީއެމްޕީއެންސީ ކޯލިޝަނުން ކުރިއްސުރެ ގެންދަނީ ތުހުމަތު ކުރަމުންނެވެ.
މިއަދުގެ ބަހުސްގައި ވެސް ޝިޔާމް އާކުރެއްވީ އެ ތުހުމަތުތަކެވެ. ރައީސް އިބްރާހީމް މުހައްމަދު ސޯލިހު އަޒުލުކުރުމަށްޓަކައި އެ މައްސަލަ މަޖިލީހަށް ވައްދަން ޖެހޭ ކަމަށް ވެސް އެ ތުހުމަތުތަކާ ގުޅުވައި އޭނާ ވިދާޅުވި އެވެ. މަޖިލީހުގެ ސުޕަމެޖޯރިޓީ އޮންނަ އެމްޑީޕީގެ މެމްބަރުން އޭނާއަށް ރައްދު ދެއްވަން ފެއްޓެވީ އެ ތުހުމަތުތައް ކުރައްވަން ފެއްޓެވުމުންނެވެ.
ހައިޑްރޮގްރަފީ އޮފީސް އުފެއްދުމުގެ މައްސަލަ ގެންދަން ޖެހޭނީ މިހާރު ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް ނޫން ކަމަށް ވެސް ޝިޔާމް ވިދާޅުވި އެވެ.
"މިއީ ގައުމީ ސަލާމަތާ ގުޅުން ހުރި މައްސަލައެއް. މި މައްސަލަ ފުރަތަމަ ކަމަކަށް މި މަސައްކަތްކުރުމަށް ޓަކައި ދާން ޖެހޭނީ ގައުމީ ސަލާމަތު ކޮމިޓީއަށް. ޓޫފޯވަން ކޮމިޓީއަށް. ކީއްވެގެންތޯ މިއަދުގެ ޑިފެންސް މިނިސްޓަރަށް ފަހަރި ވިދާޅުވާ ބޭފުޅެއް މުގައްރިރުކަން ކުރައްވާ ކޮމިޓީއަކަށް މި މައްސަލަ ދާންވީ؟" ޝިޔާމް ވިދާޅުވި އެވެ.
ޝިޔާމްގެ އެ ވާހަކައަށް ރިޔާސަތުން ވިލުފުށީ ދާއިރާގެ މެމްބަރު ހަސަން އަފީފު ރައްދު ދެއްވި އެވެ. އޭނާ ވިދާޅުވީ އެ މައްސަލަ ފޮނުވާނެ ކޮމިޓީ ކަނޑައެޅީ މަޖިލީހުގެ ގަވައިދާ އެއްގޮތަށް ކަމަށެވެ.
ހައިޑްރޮގަރަފީ އެއްބަސްވުމަކީ ގާނޫނުއަސާސީއާ ހިލާފު އެެއްބަސްވުމެއް ކަމަށް ވިދާޅުވުމުން މާފަންނު ހުޅަނގުދާއިރާގެ މެމްބަރު އަދި ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގެ މުގައްރިރު މުހައްމަދު ފަލާހާއި މާފަންނު މެދު ދާއިރާގެ މެމްބަރު އިބްރާހީމް ރަޝީދު (ބޮންޑޭ) ތެދުވެވަޑައިގެން ރައްދު ދެއްވި އެވެ. ބޮންޑޭ ވިދާޅުވީ ގާނޫނު އަސާސީއާ ސަރުކާރުން ހިލާފުވާ ކަމަށް ގަބޫލުކުރެއްވޭ ނަމަ ވަޑަައިގަންނަވަން ޖެހޭނީ ސުޕްރީމްކޯޓަށް ކަމަށެވެ.
އެ ދެމެމްބަރުންނަށް ވެސް ރައްދު ދެއްވަމުން ޝިޔާމް ވިދާޅުވީ "މިބޭފުޅުން ރަނގަޅުވާނީ ލައްޑޫ ކައިގެން ކަތަކުޑާންސް ކުރަން" ކަމަށެވެ. އިންޑިއާއާ އެކު ސަރުކާރުން ވެފައިވާ އެއްބަސްވުންތަކާ މެދު ނުރުހުން ފާޅުކުރައްވާ ކޮންމެ ދުވަހަކުހެން އޭނާ އެ އިބާރާތް ބޭނުންކުރައްވަ އެވެ.
ރައީސް އިބްރާހީމް މުހައްމަދު ސޯލިހާއި ޑިފެންސް މިނިސްޓަރު މާރިޔާ އަހުމަދުދީދީ އަދި ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލަކީ "ގައްދާރުން" ކަމަށް ޝިޔާމް ވިދާޅުވުމުން މަތިވެރި ދާއިރާގެ މެމްބަރު ހަސަން ޒަރީރު ވެސް އޭނާއަށް ރައްދު ދެއްވި އެވެ. އެ ވާހަކައަށް ފަލާހު ވެސް ރައްދު ދެއްވި އެވެ.
"ފ. އަތޮޅު ވިއްކައިލަން އުޅުނީ ގައްދާރުން. އިމާރާތަަކަށް ވިއްކައިލަން އުޅުނީ ގައްދާރުން،" ފަލާހު ވިދާޅުވި އެވެ.
ޝިޔާމްގެ ވާހަކައިގެ ތެރެއިން ނިޒާމާ ބެހޭ މައްސަލައެއް ކަމަށް ވިދާޅުވެ، ގިނަ މެމްބަރުންތަކެއް ފުރުސަތު ހޯއްދެވި ނަމަވެސް، ރިޔާސަތުން ހަސަން އަފީފް ވިދާޅުވީ އެ މެމްބަރުން ފާހަގަކުރެއްވި އެއްވެސް ކަމަކީ ނިޒާމީ މައްސަލައެއް ނޫން ކަމަށެވެ.
