އަންނަ އޭޕްރިލް މަހު ބާއްވާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޗެއާޕާސަންކަމުގެ އިންތިހާބުގަައި ވާދަކުރައްވާ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ގެ ކެމްޕެއިނު ޓީމުން ފުވައްމުލަކު ސިޓީގައި ހަރަކާތްތެރިވާން ފަށައިފި އެވެ.
އިންތި ކެމްޕެއިނުގެ ތަރުޖަމާނު އަދި ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑޭ) ވިދާޅުވީ ފުވައްމުލަކުގައި އެ ޓީމުން މިހާރު ކުރާ މަސައްކަތަކީ އެމްޑީޕީގެ ދުވަސްވީ މެމްބަރުންނާ ބައްދަލުކޮށް އެ މެމްބަރުންގެ ކަންބޮޑުވުންތައް އަޑުއަހައި، ދޮރުން ދޮރުަށް ހިނގުން ކަމަށެވެ.
"އަޅުގަނޑުމެން މިހާރު މިކޮޅުގަ ކުރާ މަސައްކަތަކީ ޕާޓީގެ ދުވަސްވީ މެމްބަރުންނާ ރީޗުކޮށް ބައްދަލުކޮށް އެބޭފުޅުންގެ ކަންބޮޑުވުންތައް އަޑުއަހައި އިހުސާސްތައް ދަނެގަތުން. މިއީ ބޮޑަށް ގޮތްދެއްކުމާއި ދަޅަދެއްކުމުގެ ބަދަލުގަ އަޅުގަނޑުމެން އެމްޑީޕީގެ އަސްލު އަސާސުތަކުގައި ހިފަހައްޓައިގެން ކުރާ މަސައްކަތެއް،" ވަހީދު ވިދާޅުވި އެވެ.
އޭނާ އިތުރަށް ވިދާޅުވީ ފުވައްމުލަކުން އިންތިގެ ކެމްޕޭން ޓީމަށް ވަރަށް ބޮޑު ތަރުހީބެއް ލިބެމުންދާކަން ފާހަގަކުރެވިފައިވާ ކަމަށެވެ. އަދި ޕާޓީގެ މެމްބަރުންގެ ފަރާތުން ސަރުކާރާ ދޭތެރޭ ކަންބޮޑުވުންތަކެއް ހުރިކަން ވެސް ފާހަގަކުރެވިފައިވާ ކަމަށާއި އިމްތިޔާޒްގެ ޓީމުން މެމްބަރުންނާއި ބައްދަލުކޮށް ކުރާ މަސައްކަތަކީ އެ ކަންބޮޑުވުންތައް އަޑުއަހައި އެކަންކަމަށް ހައްލެއް ގެނެވޭނެ ގޮތްތަކެއް ހޯދުން ކަމަށް އޭނާ ވިދާޅުވި އެވެ.
"ހަމަ ހުރިހާ މެމްބަރުންގެވެސް ދުލުކުރީގައި އޮންނަނީ އިންތިގެ ނަން. އަޅުގަނޑުމެން އެބޭފުޅުންނާ ވާހަކަދެއްކުމުގެ ކުރިން ވެސް. އެހެންވީމަ ތާއިދު އެބަ އޮތް ވަރަށް ބޮޑަށް އިންތިއަށް. ވަރަށް ރަނގަޅަށް ކެމްޕޭން މިދަނީ އިރާދަކުރެއްވީތީ،" މެމްބަރު ވަހީދު ވިދާޅުވިއެވެ.
އިމްތިޔާޒްގެ ކެމްޕޭން ޓީމުން ފުވައްމުލަކަށް ކުރާ ދަތުރު ނިންމާލުމަށްފަހު މާދަމާ މާލެއަށް ދަތުރުކުރާނެ އެވެ. މެމްބަރު ވަހީދު ވިދާޅުވީ އެ ދަތުރަށްފަހު އަދިވެސް އެހެން ދަތުރުތައް ކުރަން އެ ޓީމުން ރާވަމުންދާ ކަމަށެވެ. އަދި މިވަގުތު ވަކި ރަށެއް ކަނޑައެޅިފައިނުވިނަމަވެސް އައްޑޫ ސިޓީއަށާއި ބޮޑުތިލަަދުންމައްޗަށް ވަރަށް އަވަހަށް ދަތުރެއް ކުރާނެކަމަށް އޭނާ ވިދާޅުވިއެވެ.
މެމްބަރު ވަހީދު ވިދާޅުވީ އިންތިހާބުގެ ކުރިން ރާއްޖޭގެ ހުރިހާ ރަށަކަށް ދަތުރުކުރަން އެޓީމުން މަސައްކަތްކުރާނެކަމަށާއި އަދި ޔަގީނުންވެސް ހުރިހާ އަތޮޅަކަށް އިމްތިޔާޒްގެ ކެމްޕޭން ޓީމުން ދަތުރުކުރާނެ ކަމަށެވެ.
އެމްޑީޕީގެ ޗެއާޕާސަންގެ މަގާމަށް އެޕާޓީގެ ތަރުޖަމާނުކަން ކުރިން ކުރެއްވި އިމްތިޔާޒްގެ އިތުރުން ދެން ވާދަކުރައްވަނީ އިކޮނޮމިކް މިނިސްޓަރު އަދި އެމްޑީޕީގެ ގަމު ދާއިރާގެ ރައީސް ފައްޔާޒް އިސްމާއިލް އެވެ. ފައްޔާޒްގެ ކެމްޕޭން ވެސް ފަށައިގެން ކުރިއަށްދާއިރު، އޭނާގެ ކެމްޕެއިން ޓީމުން މިވަގުތު ދަނީ ށ. މިލަންދޫގައި ހަރަކާތްތެރިވަމުންނެވެ.
އެމްޑީޕީގެ ޗެއާޕާސަންއަކީ ޕާޓީގެ އެތެރޭގައި ހިންގުމުގެ އެންމެހާ ކަންކަން އިންތިޒާމުކޮށް ރާވާ ބަލަހައްޓާ ފަރާތެވެ. އޭގެ ތެރޭގައި އެމްޑީޕީގެ ކޮންގްރެސްއާއި ގައުމީ މަޖިލިސް އަދި ގައުމީ ހިންގާ ކޮމިޓީގެ ރިޔާސަތު ބެލެހެއްޓުން އަދި ދާއިރާތަކުގެ ހިންގާ ކޮމިޓީގެ އިންތިހާބުތައް އިންތިޒާމުކޮށް ހިންގުން އަދި ޕާޓީގެ އިދާރީ ކަންކަމުގެ އެންމެހާ މަސްއޫލިއްޔަތުތައްވެސް އުފުއްލަވާނީ ޗެއާޕާސަންއެވެ.
