މާލޭ ސިޓީ ކައުންސިލްގެ ސްޓެރެޓީޖިކް އެކްޝަން ޕްލޭންގެ ދަށުން މާލެ އަދި ވިލިމާލޭގައި ހިންގުމަށް ނިންމާފައިވާ މަޝްރޫއުތަކަށް އިންވެސްޓު ކުރުމުގެ ފުރުސަތު ހުޅުވާލައިފި އެވެ.
ސިޓީ ކައުންސިލުން އިއްޔެ ކުރި އިއުލާނެއްގައި ބުނީ ސްޓްރެޓެޖިކް އެކްޝަން ޕްލޭންގައިވާ މާލެ އާއި ވިލިމާލޭގައި ހިންގުމަށް ކަނޑައެޅިފައިވާ ތަރައްގީގެ ޕްރޮގްރާމްތަކަށް އިންވެސްޓުކުރުމަށް ޝައުގުވެރިވާ ފަރާތްތަކަށް ހުޅުވާލުމަށް ކައުންސިލްގެ ރަސްމީ އާންމު ޖަލްސާއަކުން ނިންމާފައިވާ ކަމަށެވެ.
އެގޮތުން، އެ އިއުލާނާއެކު ހިމަނާފައިވާ އިންވެސްޓު ކުރުމަށް ހުޅުވާލެވޭ ފުރުސަތަށް ހުޅުވާލައިގެން ކުރިއަށްދާނެ ގޮތުގެ އުސޫލުގައިވާ ގޮތުން، ޖުމްލަ 11 މަޝްރޫއުއަކަށް އިންވެސްޓު ކުރުމުގެ ފުރުސަތު ވަނީ ހުޅުވާލައިފަ އެވެ.
މީގެ ތެރޭގައި ވިލިމާލޭގައި 500 ހައުސިން ޔުނިޓާއި، ކުޑަކުދިންގެ ޕާކަކާއި ވޯޓާ ސްޕޯޓްސް، ލޯކަލް މާރުކޭޓެއްގެ އިތުރުން ކޮމާޝަލް ބިލްޑިންއެއް ހިމެނެ އެވެ.
މާލޭގައި އިންވެސްޓަރުންނަށް ހުޅުވާލެވިފައިވަނީ ސިޓީ ކައުންސިލްގެ އޮފީސް އިމާރާތެއް އެޅުމާއި، ހޯލް ސޭލް ސެންޓަރަކާއި، ލޯކަލް މާރުކޭޓެއްގެ އިތުރުން ޕާކިން ބިލްޑިންއަކާއި ފުޑް ކޯޓެއް ގާއިމުކުރުމަށެވެ.
އެ އުސޫލުގައިވާ ގޮތުން، އެ މަޝްރޫއުތަކަށް ޝައުގުވެރިވާ ފަރާތްތަކުން ހުށަހަޅާ ޕްރޮޕޯޒަލްތައް ވަޒަންކުރާއިރު، ސިޓީ ކައުންސިލަށް ދައްކާ ފައިސާއާއި، އެ ކުންފުންޏެއްގެ ގާބިލުކަމާއި އެ މަޝްރޫއުއެއް ދެމެހެއްޓެނެވި ގޮތެއްގައި ކުރިއަށް ގެންދިއުމުގެ ޕްލޭނަށް ބަލާނެކަމަށް ބުނެފައިވެ އެވެ.
މިގޮތުން ހުށަހެޅޭ ޕްރޮޕޯޒަލެއް ފާސްކުރެވި، ފައިނަލް އެޕްރޫވަލް އާ ހަމައަށް ދިއުމުގެ ކުރިން އެ މަޝްރޫއުއަށް ފައިނޭންސް ކުރުމާއި މަސައްކަތް ކުރާނެ ގޮތުގެ ތާވަލެއް ހިމަނައިގެން ފްރޭމްވާކް އެގްރީމެންޓެއް ހެދޭނެ ކަމަށް އެ އުސޫލުގައި ބުނެ އެވެ.
