މިދިޔަ ޖެނުއަރީ މަހުގެ ތެރޭގައި ވިލިމާލޭގައި ހިންގި ޓެރަރިޒަމްގެ އޮޕަރޭޝަނެއްގެ ދަށުން އަތުލައިގަތީ ކުށުގެ ހުތުރު ރިކޯޑެއް އޮންނަ، ވ. ދެލްވައްތަ، ހޫދު މުހައްމަދު ޒާހިރުކަން އެނގިއްޖެ އެވެ.
ފުލުހުންގެ ކޮމިޝަނަރު މުހައްމަދު ހަމީދު ރޭ ކުރެއްވި ޓުވީޓެއްގައި ވިދާޅުވީ ހޫދު، 30، އަތުލައިގަތީ އެމެރިކާގެ ފެޑަރަލް ބިއުރޯ އޮފް އިންވެސްޓިގޭޝަން (އެފްބީއައި) އާއި ދިވެހި ފުލުހުން ގުޅިގެން ހިންގި ހާއްސަ އޮޕަރޭޝަނެއްގައި ކަމަށެވެ.
ހޫދު ހައްޔަރު ކުރީ މިދިޔަ ޖެނުއަރީ މަހު ވިލިމާލޭގައި ހިންގި ހާއްސަ އޮޕަރޭޝަނެއްގަ އެވެ. އޭނާ ހައްޔަރު ކުރުމަށްފަހު ގިނަ އަދަދެއްގެ އިލެކްޓްރޯނިކް އާލާތްތައް ވެސް ފުލުހުން ވަނީ އަތުލައިފަ އެވެ.
ހަމީދު ރޭ ވިދާޅުވީ، ހޫދަކީ އިންޓަނެޓު މެދުވެރިކޮށް ފުޅާ ދާއިރާއެއްގައި އައިސިސްގެ ޕްރޮޕެގެންޑާ ފަތުރަމުންދިޔަ މީހެއް ކަމަށެވެ. އަދި އޭނާ ދިޔައީ ޓެރަރިޒަމްގެ އަމަލުތައް ޔޫރަޕުގައި ހިންގުމަށް ވަރަށް ބޮޑަށް ބާރުއަޅަމުން ކަމަށް ވެސް ވިދާޅުވެފައިވެ އެވެ.
"އަދަދު" އަށް ޔަގީންވެފައިވާ ގޮތުގައި ހޫދަކީ، ވިލިމާލޭގައި އުމުރުން އެންމެ 14 އަހަރުގެ ކުޑަކުއްޖަކު ގޭންގް ރޭޕް ކުރި މަައްސަލައެއްގައި ހައްޔަރު ކުރި ހަ މީހުންގެ ތެރޭގައި ހިމެނޭ މީހެކެވެ. އެ މައްސަލައިގައި އޭނާގެ މައްޗަށް ދައުވާ ވެސް ކުރި އެވެ. ނަމަވެސް ކުށް ސާބިތެއް ނުވި އެވެ.
ހޫދަކީ ކުރިން މާލޭގައި ޕިކަޕު ދުއްވަން އުޅުނު މީހެކެވެ. ނަމަވެސް އޭނާ ފަހުން ޕިކަޕު ދުއްވުން ހުއްޓާލައި މަސައްކަތެއްނުކޮށް ހުރީ ކަމަށް، އޭނާ ދަންނަ މީހުން މި ނޫހަށް ކިޔައިދިނެވެ.
އޭނާ އަތުލައިގަތުމުގެ އޮޕަރޭޝަނުގައި އެފްބީއައިގެ އިތުރުން އިޓަލީ ފުލުހުން ވެސް ބައިވެރިވި އެވެ. އަދި ޔޫރަޕުގެ އެހެން ގައުމެއްގެ ފުލުހުން ވެސް އެކަމުގައި އުޅުނެވެ.
ހޫދަކީ، ކުޑަކުދިންނާއި އަންހެނުން މެރުމަށް މަޝްހޫރު އިސްލާމިކް ސްޓޭޓުގެ މީޑިއާ ކެމްޕެއިނުތައް، ރާއްޖޭގައި ހުރެ އިންޓަނެޓު މެދުވެރިކޮށް ހިންގަމުންދިޔަ މީހެއް ކަމަށް ހަމީދު ރޭގައި ވިދާޅުވެފައިވެ އެވެ.
.
