އަހްމަދިއްޔާ އިންޓަނޭޝަނަލް ސްކޫލަށް ދިމާވެފައިވާ އެންމެ ބޮޑު އަދި އެންމެ ދިގު ދެމިގެން ގޮސްފައިވާ މައްސަލައަކީ ޖާގައިގެ ދަތިކަން ކަމަށާއި އެ ދިގު އިންތިޒާރަށް ފޮނި ނިމުމެއް އަންނާނެ ކަމަށް ރައީސް އިބްރާހިމް މުހައްމަދު ސޯލިހު ރޭ ވިދާޅުވެއްޖެ އެވެ.
މައްޗަންގޮޅީ އަވަށު މަދަރުސާގެ ގޮތުގައި 1982 ގައި ފެށި ސްކޫލަށް 40 އަހަރު ފުރުން ފާހަގަކުރުމުގެ ގޮތުން ބޭއްވި ޖަލްސާގައި ރައީސް ސޯލިހު ވިދާޅުވީ އެ ސްކޫލުގެ ޖާގައިގެ ދަތިކަމުގެ ސަބަބުން އިތުރު ހަރަކާތެއް ބާއްވާނެ، ތުއްތުކުދިން ކުޅެން ނުކުމެލާނެ ބިން ކޮޅެއް ނެތް މައްސަލަ ސަރުކާރަށް ހުށަހަޅާފައިވާ ކަމަށެވެ.
އެކަމުގައި ސަރުކާރުން ވެދެވެން އޮތް އެންމެ ފުރިހަމަ އެހީތެރިކަމެއް ވެދިނުމަށް އަޅުގަނޑުމެން މިއަންނަނީ މަސައްކަތް ކުރަމުން. އެހެންވީމާ، އިރާދަކުރެއްވިއްޔާ ތިޔަ ބޭފުޅުންގެ އިންތިޒާރަށް މާގިނަ ދުވަސްތަކެއް ނުވެ އަމަލީ ސިފަ އަންނާނެކަމުގެ ޔަގީންކަން އަޅުގަނޑު މިރޭ އަރުވަން،" ރައީސް ސޯލިހު ވިދާޅުވި އެވެ.
އަހްމަދިއްޔާ ސްކޫލުގެ ގެލަރީ ރައީސް ސޯލިހު ބައްލަވާ ލައްވަނީ -- ފޮޓޯ: ރައީސް އޮފީސް
ރައީސް ސޯލިހު ވިދާޅުވީ އަހްމަދިއްޔާ ސްކޫލްގެ މާޒީން ވަރަށް ފަހުރުވެރި ސަފުހާތަކެއް ފެންނަ ކަމަށާއި ގައުމަށް ބޭނުންތެރި ދަރިންތަކެއް ބިނާކޮށްދީފައި އޮތުމަކީ އެ ސްކޫލްގެ އެންމެ ބޮޑު އެއް ކާމިޔާބު ކަމަށެވެ.
"އަހްމަދިއްޔާ ސްކޫލުން ތައުލީމު ހާސިލުކުރި ދަރިވަރުންގެ ތެރޭގައި، ރައްޔިތުންގެ މަޖިލީހުގެ މެންބަރުންގެ ގޮތުގައިވެސް، އަދި ސަރުކާރުގެ އެހެން މަތީ މަގާމުތަކުގައިވެސް މިހާރު އަމަލީ މަސައްކަތުގައި އެބަ ތިއްބެވި،" އެ މަނިކުފާނު ވިދާޅުވި އެވެ.
އެ މަނިކުފާނުގެ ސަރުކާރުން އެންމެ ބޮޑު އިސްކަމެއްދީގެން ކުރާ އެއްކަމަކީ މީހުން ބިނާކުރުން ކަމަށާއި ތައުލީމީ ގޮތުން ހަރުދަނާ ދަރިންތަކެއް ބިނާކުރުމަށާއި ރާއްޖެއާއި ރާއްޖެއިން ބޭރުން މަތީ ތައުލީމުގެ އިތުރު ފުރުސަތު ފަހިކޮށް ދިނީ އެ ބޭނުމުގައި ވިދާޅުވި އެވެ.
ރާއްޖޭގެ އެކި ކަންކޮޅުތަކުގައި ތަރައްގީގެ ގިނަ މަޝްރޫއުތައް ހިންގާއިރު، އޭގެތެރެއިން ބައެއް މަޝްރޫއުތައް ފުރިހަމަ ވާއިރު، ފަންނީ ހުނަރުވެރިންނަށް ބޭނުންވާނެ ވަރަށް ގިނަ ވަޒީފާތައް އުފެދިގެންދާނެ ކަމަށް ރައީސް ވިދާޅުވި އެވެ. އޭގެ ތެރޭގައި ސިއްހީ ދާއިރާ އާއި އިއާދަކުރަނިވި ހަކަތައިން ކަރަންޓު އުފެއްދުމުގެ މަޝްރޫއުތަކާ ގުޅޭ ވަޒީފާތަކަށް ބޭނުންވަނީ ދިވެހިން ކަމަށް ފާހަގަ ކުރެއްވެވި އެވެ.
ރޭގެ ޖަލްސާއަށް ފަހު އަހްމަދިއްޔާ ސްކޫލުގެ ބައެއް ޓީޗަރުންނާއި މުވައްޒަފުންނާއެކު ރައީސް ސޯލިހު ފޮޓޯއަކަށް ހުއްޓިވަޑައިގެން. -- ފޮޓޯ: ރައީސް އޮފީސް
މިސާލަކަށް، ފަސް ސަރަޙައްދުގައި ތަރައްގީކުރާ ޓާޝަރީ ހޮސްޕިޓަލްތައް. އެ ތަންތަނުން ވަރަށް ގިނަ ފަންނީ ވަޒީފާތައް އުފެދޭނެ. ޑޮކްޓަރުންނާއި، ނަރުހުންނާއި، ލެބް ޓެކްނީޝަނުންނާއި، މެކޭނިކުން، އަދި އެނޫންވެސް ވަރަށް ގިނަ ވަޒީފާތައް އުފެދިގެންދާނެ. އެއީ އާއިލާއާއި މައިންބަފައިން ކައިރީގައި، ރަށުގައި ތިބެގެން އަދާކުރެވޭނެ ވަޒީފާތައް. އެ ވަޒީފާތައް އަދާކުރާނެ ދިވެހިން އަޅުގަނޑުމެން ބޭނުންވޭ،" ރައީސް ސޯލިހު ވިދާޅުވި އެވެ.
ދަރިންނަށް ކިޔަވައިދޭ ވާހަކަ އެ މަނިކުފާނު ގިނައިން ދައްކަވަނީ ގައުމު ތަރައްގީ ވާނީ، ޒިންމާ އަދާކުރަން ތިބި ދަރިންގެ ސިކުނޑީގައި، އުފެއްދުންތެރި އީޖާދީ ވިސްނުންތަކެއް އުފެދިގެން ކަމަށް ގަބޫލުކުރައްވާތީ ކަމަށާއި "ދަރިންގެ ކިބައިގައި ތަރައްގީގެ ވިސްނުން އުފެއްދޭނީ، ޒަމާނީ ކުރިއެރުމާ ފައިހަމަވާފަދަ ތައުލީމެއް ދަރިންނަށް ދީގެން،" ކަމަށް ވާތީ ކަމަށް ވިދާޅުވި އެވެ.
އަހުމަދިއްޔާގެ މޮޓޯއަކީ ވެސް އެފަދަ ދަރިވަރުންތަކެއް ބިނާކުރުން ކަމަށް ރައީސް ވިދާޅުވި އެވެ.
އަހްމަދިއްޔާގެ ކާމިޔާބީގެ ފުރަތަމަ ސިއްރަކީ އެ ސްކޫލްގެ ނަން ނިސްބަތްވާ ޑީ އަހަންމައިދީގެ ތެދުވެރި ނިޔަތާއި، އިހްލާސްތެރި ހެޔޮ އަމަލު ކަމަށް ފާހަގަ ކުރައްވައި ރައީސް ވިދާޅުވީ މިދިޔަ 40 އަހަރުގެ ތެރޭގައި ތައުލީމީ ރޮނގުން މި ސްކޫލްގެ ދަރިވަރުން ހޯދާފައިވަނީ، ރެކޯޑެއްގެ ގޮތުގައި ފާހަގަކުރެވޭ ރަން ވަނަތަކެއް ކަމަށެވެ.
ރޭގެ ޖަލްސާއަށް ފަހު އަހްމަދިއްޔާ ސްކޫލުގެ ބައެއް ދަރިވަރުންނާއެކު ރައީސް ސޯލިހު ފޮޓޯއަކަށް ހުއްޓިވަޑައިގެން. -- ފޮޓޯ: ރައީސް އޮފީސް
އަހްމަދިއްޔާ ސްކޫލަކީ މިހާރުވެސް ރާއްޖޭގެ ތަޢުލީމީ މައިދާނުގައި ވަރަށް މަތީ މަގާމެއްގައި ސާބިތުކަމާއެކު ދެމިއޮތް ސްކޫލެއް،" އެ މަނިކުފާނު ވިދާޅުވި އެވެ.
މާލޭގައި ހުރި ސްކޫލްތަކުގެ ތެރެއިން، ބޭބީ ނާސަރީން ފެށިގެން ގްރޭޑް 12 އާ ހަމައަށް ކިޔަވައިދޭ ހަމައެކަނި ސްކޫލަކީ އަހްމަދިއްޔާ އެވެ.
