ވިލިމާލޭގެ ސިނާއީ ސަރަހައްދުން އިގްތިސޯދީ މަސައްކަތް ކުރުމަށް ބިން ކުއްޔަށް ދޫކުރުމަށް މާލެ ސިޓީ ކައުންސިލުން ނިންމައި، އެކަމަށް ހުޅުވާލައިފި އެވެ.
އިއްޔެ ބޭއްވި މާލޭ ސިޓީ ކައުންސިލުގެ 40 ވަނަ ޖަލްސާގައި ސިނާއީ މަސައްކަތަށް ބިން ދިނުމަށް ހުށަހެޅީ ވިލިމާލެ ދާއިރާގެ ކައުންސިލަރު ނަހުލާ އަލީ އެވެ. އެ ހުށަހަޅުން ފާސްކުރީ ހުރިހާ ކައުންސިލަރުންގެ އިއްތިފާގުންނެވެ.
ބިން ދޫކުރުމަށް ހުޅުވާލާފައި ވަނީ މާލޭ ރަށްވެހިންނަށް ވެސް ފުރުސަތު ލިބޭ ގޮތަށެވެ. އެކަމަކު މަދުވެގެން ދެ ބައިކުޅަ އެއްބައި ވިލިމާލޭ ރައްޔިތުންނަށް ހާއްސަ ކުރުމަށް ވެސް ބުނެފައިވެއެވެ.
އެ ހުށަހެޅުމުގައި ވަނީ ވިލިމާލޭ ސިނާއީ ސަރަހައްދުގައި މިވަގުތު ހުސްކޮށް އޮތް 13 ސްލޮޓު ސިނާއީ މަސައްކަތްތައް ކުރަން ދިނުމަށް ފުރުސަތު ދިނުމަށެވެ.
ވިލިމާލޭ ސިނާއީ މަސައްކަތް ކުރާ މީހުން ކުއްޔަށް ހިފާފައިވާ ސްލޮޓުން ދައްކަންޖެހޭ ފައިސާ ދެއްކުމަށް އެންމެ ފަހު ފުރުސަތު ދީފައި ވަނީ މިދިޔަ އަހަރުގެ ނިޔަލަށެވެ. އިއްޔެ އެ ބައްދަލުމުގައި ސިޓީ ކައުންސިލުން ނިންމާފައި ވަނީ އެ މުއްދަތުގައި ފައިސާ ނުދައްކާ ހުރި މީހުންގެ އެގްރިމެންޓް ބާތިލްކުރާށެވެ. އަދި އެ ބިމުން ފައިސާ ނުލިބި ހުރި މީހުންގެ އަތުން ފައިސާ ހޯދުމަށް ގާނޫނީ ގޮތުން ކުރަންޖެހޭ މަސައްކަތްކޮށް އެ ފައިސާ ހޯދުމަށް ވެސް ސިޓީ ކައުންސިލުން ނިންމާފައިވެ އެވެ.
ވިލިމާލޭގެ ސިނާއީ ސަރަހައްދުން ބިން ދޭން ނިންމާފައި ވާއިރު، މާލޭ ސަރަހައްދު ގުޅައިލުމުގެ ޕްރޮޖެކްޓްގެ ތެރެއިން މާލެ-ތިލަފުށި ލިންކް (އެމްޓީއެލް) ނުވަތަ ތިލަމާލެ ބްރިޖް މަޝްރޫއުއިން ވިލިމާލެ ސިނާއި ސަރަހައްދު ގެއްލިގެންދާނެ ކަމަށް ވިދާޅުވެ މާލެ ސިޓީގެ މޭޔަރު ޑރ. މުހައްމަދު މުއިއްޒު މީގެ ކުރިން ވަނީ ކަންބޮޑުވުން ފާޅުކޮށްފަ އެވެ.
މުއިއްޒު ވަނީ އެ ހާލަތުގައި ސިނާއީ ސަރަހައްދު ޕާކިން ޒޯނަކަށް ބަދަލުކޮށް ސިނާއީ މަސައްކަތް ކުރާ ތަންތަން ދެން ބަދަލުކުރާނީ އަނެއްކާވެސް ރަށުތެެރެއަށްތޯ ސުވާލު ކުރައްވާފަ އެވެ. އެހެން ކަމުން ބްރިޖުގެ މަަސައްކަތް ކުރާއިރު އެކަމުގައި ރައްޔިތުންގެ ބައިވެރިވުމާއި ހިޔާލު އަދި މަޝްވަރާ ހޯއްދެވުމަށް ތަކުރާރުކޮށް ވަނީ އެދިވަޑައިގެންފަ އެވެ.
