އެމްޑީޕީގެ ޗެއާޕާސަންގެ އިންތިހާބުގެ ފޯރިގަދަ ވެފައިވާ އެއް ސަބަބަކީ އެ ޕާޓީން ކުރިއަށް ނިންމަން ހުރި ބޮޑެތި ނިންމުންތަކުގެ މުހިންމުކަމުންނެވެ. އެފަދަ އެ ނިންމުމަކީ ރާއްޖޭގެ ވެރިކަން ހިންގާ ނިޒާމާ ގުޅޭ ގޮތުން ނިންމަން އޮތް ނިންމުމެވެ. ޕާޓީގެ ރައީސް މުހައްމަދު ނަޝީދު އެ ނިޒާމް, ގެންނަވަން ފޫގަޅުއްވައިގެން ހުންނެވިއިރު, ޕާޓީގެ ދެން ބާއްވާ ކޮންގްރެސް ވެސް ފައްކާކުރަނީ އެކަމުގެ މަޝްވަރާއަށާއި ގޮތް ނިންމުމަށެވެ.
އެ ކޮންގްރެސްގެ ރިޔާސަތު ބަލަހައްޓަވާނެ ޗެއާޕާސަން މިވަގުތަށް އެހާ މުހިންމުވެފައި ވަނީ ވެސް އެހެންވެ އެވެ. އެމްޑީޕީގެ ޗެއާޕާސަން ކަމަށް ހުޅުވާލާފައިވާއިރު, އެ ރޭހުގައި ތިއްބެވީ އިކޮނޮމިކް މިނިސްޓަރު ފައްޔާޒު އިސްމާއިލާއި މާފަންނު އުތުރު ދާއިރާގެ މަޖިލިސް މެންބަރު އިމްތިޔާޒު ފަހުމީ އެވެ. މި ދެ ބޭފުޅުންނަކީ ބަރުލަމާނީގެ ބަހުސާއެކު, އެމްޑީޕީން ފޭދިގެން ދިޔަ ދެ ފެކްޝަނަށް ނިސްބަތްވާ ދެ ބޭފުޅުންނެވެ.
ފައްޔާޒު މި ނޫހަށް އިއްޔެ ދެއްވި ހާއްސަ އިންޓަވިއުގައި ވިދާޅުވީ މިވަގުތަށް ބަރުލަމާނީ ނިޒާމަކަށް ރާއްޖެ ތައްޔާރު ނޫން ކަމަށެވެ. އެހެންކަމުން, ފައްޔާޒާއި އޭނާގެ ފަހަތަށް އަރާ ބޭފުޅުންގެ ވިސްނުން އެ ވަނީ ސާފުވެފަ އެވެ. ފަހަރުގައި އެއީ, ރައީސް އިބްރާހިމް މުހައްމަދު ސޯލިހު ދެކެވަޑައިގަންނަވާ ގޮތަށްވުން ވެސް ގާތެވެ.
އެކަމަކު, ނަޝީދުގެ ފަހަތްޕުޅުން އިމްތިޔާޒަކީ ބަރުލަމާނީ ނިޒާމަށް ތާއިދު ކުރައްވާ ބޭފުޅެކެވެ. އެ ނިޒާމް ރާއްޖެ ގެނެސް, ނަޝީދު ބޮޑުވަޒީރު ކަމަށް ގެންނަން އޭނާ މަސައްކަތް ކުރައްވާނެ އެވެ. އެ ނިޒާމަށް އޮތް ތާއިދާއެކު, އެއީ ރާއްޖެއަށް ރަނގަޅު ނިޒާމެއްގެ ގޮތުގައި އިމްތިޔާޒު "އަދަދު"އަށް ވިދާޅުވި އެވެ.
"އެނިޒާމަށް [ބަރުލަމާނީ] އަޅުގަނޑަށް ވެސް ވަކާލާތު ކުރެވޭނީ އެއީ ވަރަށް ރަނގަޅު ނިޒާމެއްގެ ގޮތުގައި،" އިމްތިޔާޒު މި ނޫހަށް ވިދާޅުވި އެވެ.
އެމްޑީޕީން ބަލައިގެންފައި އޮތް ނިޒާމެއް
އިމްތިޔާޒު ގަބޫލު ކުރައްވާ ގޮތުގައި ރާއްޖޭގެ ވެރިކަން ބަރުލަމާނީ ނިޒާމަކުން ހިންގުމަކީ އެމްޑީޕީން މާކުރިން ވެސް ބަލައިގަނެ, އެކަމަށް ވަކާލާތު ކުރަމުން އަންނަ ކަމެެވެ.
"އަޅުގަނޑުމެން ޕާޓީން ހަމަ ވަރަށް ބޮޑަށް ތާއީދުކުރާ ކަމެއް. އަދި ވަރަށް ބޮޑަށް ދެކެވޭ ވާހަކަތައް މިހުންނަނީ އިނގޭތޯ ފެށުނީއްސުރެ އަޅުގަނޑުމެން ޕާޓީން ބަރުލަމާނީ ނިޒާމަށް ތާއީދުކޮށްގެން އޮތް ނިޒާމަކީ އެއީ. ކުރީގައި ބޭއްވި ރިފަރެންޑަމްގައި ވެސް އަޅުގަނޑުމެން ބަރުލަމާނީ ނިޒާމަކަށް ތާއީދުކުރީ. ނަމަވެސް އެ އިންތިހާބު އަޅުގަނޑުމެންނަށް ކާމިޔާބުނުވީ. އަޅުގަނޑުމެން އަބަދުވެސް ކުރަމުން ދިޔަ އެކިއުޒޭޝަން އެއް އިލްޒާމެއް އެއީ އެ އިންތިހާބު ރިގްކުރިކަމަށް،" އިމްތިޔާޒު ވިދާޅުވި އެވެ.
"އަޅުގަނޑު އޭރުގައި އެ ރިފަރެންޑަމްގައި ވެސް ބަރުލަމާނީއަށް ވޯޓްލީ މީހެއް. އަދި މިހާރުވެސް ބަރުލަމާނީ ނިޒާމަކީ އަޅުގަނޑަށް ވަރަށް ހިތްގައިމު، ގައުމެއް ހިންގަން ވަރަށް ފުރިހަމަ ވަރަށް ދެފުށް ފެންނަ ގޮތަށް، ވަރަށް ޖަވާބުދާރީ ކުރުވަނިވި ގޮތަކަށް، ވަރަށް ގިނަ ގައުމުތައް، ވަރަށް ތަރައްގީވެފައި ހުރި ގައުމުތަކުގައި ތަޖުރިބާކޮށްފައި އޮތް ވަރަށް ރަނގަޅު ނިޒާމެއްގެ ގޮތުގައި އަޅުގަނޑު މިހާރުވެސް ސިފަކުރާނީ،"
އެހެންވެ, އިމްތިޔާޒު ވިދާޅުވި ގޮތުގައި އެ ނިޒާމަށް އޭނާއަށް ވެސް ވަކާލާތު ކުރެވޭނީ އެއީ ވަރަށް ރަނގަޅު ނިޒާމެއްގެ ގޮތުގަ އެވެ.
30 ޕަސެންޓް އިސްލާހު: އިންތިގެ ތާއިދު
މި އަހަރު ބާއްވާ އެ ޕާޓީގެ ކޮންގްރެސްއަށް އެޖެންޑާއަށް ބަރުލަމާނީ ނިޒާމާއެކު 30 ޕަސެންޓުން އިންތިހާބު ކާމިޔާބު ކުރެވޭނެ އިސްލާހެއް ވެސް ރައީސް ނަޝީދު ވަނީ ހުށަހަޅުއްވާފަ އެވެ.
ނަޝީދާ ގާތް ބޭފުޅެއްގެ ގޮތުގައި ފާހަގަކުރެވޭ އިމްތިޔާޒު, ނަޝީދު އެ އިސްލާހަށް އެއްކޮށް ތާއިދެވެ. އޭގެ ސަބަބުތައް އިމްތިޔާޒު މި ނޫހާ ހިއްސާކުރެއްވި އެވެ;
"ކޯލިޝަން އަކުންނޭ ވެރިކަމަށް މި އަންނަން ޖެހެނީ. ރާއްޖޭގައި މިނިޒާމު އޮތް އިރު ވެސް ކޯލިޝަންއަކީ ހަގީގަތުގައި ބަރުލަމާނީ ސިފައެއް. މިގޮތަށް މި ތަޖުރިބާ ކުރެވެމުން ދިޔައީ، ކޯލިޝަނަކުން އަންނަން ޖެހެނީ 50 ޕަސެންޓް އަދި އެއް ވޯޓް ހޯދަން ޖެހޭތީ. ދެން 50 ޕަސެންޓް އެއްވޯޓް އެއް ޕާޓީއަކަށް އެކަނި ނުލިބޭކަމުގެ ތަޖުރިބާ ކުރެވިއްޖެ ދެން މި ގާނޫނުއަސާސީ އައިފަހުން ވަރަށް ގިނަ ތަޖުރިބާތައް ކުރެއްވިއްޖެ އަދި އެގޮތަށް ވުމުގެ ސަބަބުން ބައެއް ފަރާތްތަކުން އެބަ ބުނޭ އެމްޑީޕީގެ މަސްލަހަތާ، އެމްޑީޕީވާ ވައުދުތަކާ އަދި އެމްޑީޕީގެ ފިކުރާ މިކަންކަން ކުރިއެރުވުމަށް ކުޑަ މަޑުޖެހުމެއް އެބަ އާދެޔޭ." އިމްތިޔާޒު ވިދާޅުވި އެވެ.
އެހެންކަމުން ފުރަތަމަ ބުރުން އެންމެ މެޖޯރިޓީ ނަގާ ކެންޑިޑޭޓަކު ހޮވުމާމެދު ވިސްނާލުމަކީ ހަމަ ރަނގަޅު ކަމެއްގެ ގޮތުގައި އިމްތިޔާޒު ދެކެވަޑައިގަންނަވަ އެވެ. އޭނާ ވިދާޅުވި ގޮތުގައި, އެ ކެންޑިޑޭޓަކީ މަތިވެގެން ގޮސް 100 ޕަސެންޓާ ހަމައަށް ވޯޓު ނަގާ ކެންޑިޑޭޓަށް ވެސް ވެދާނެ އެވެ.
"...އެކަމަކު ދަށް ވެގެން ގޮސް 30 ޕަސެންޓަށް ވުރެ [ދަށް ނުވާ ނަމަ ހޮވެން]. ދަށް ވެގެން ގޮސް 20 ޕަސެންޓް 10 ޕަސެންޓް އެހެން ނުވާށޭ އެކަމުގައި މިންގަނޑެއް އޮންނަން ވާނޭ. ދަށް ވެގެން ގޮސް ސުން ޕަސެންޓް ލިބިއްޖެއްޔާ ދެން އެއީ އިންތިހާބެއް ނޫން. އެހެންވީމާ ދަށްވެގެން ގޮސް ވަކިވަރެއް ވެއްޖެއްޔާ ޖެހޭނެޔޭ އަނެއްކާ ވެސް ވޯޓްލާން،" އިމްތިޔާޒު ވިދާޅުވި އެވެ.
"30 ޕަސެންޓް ދެން އެެއީ ހަމަ އަދަދެއް. މީގައި މުހިއްމު ނުކުތާއަކީ މެޖޯރިޓީ ވޯޓް ނަގާ ކެންޑިޑޭޓް އެއީ ވިނިން ކެންޑިޑޭޓް ކަމަށްވުން ކިހިނެތްތޯ، އެއީ އެ ހުށަހެޅުން،"
