ވާދަވެރިކަން ބޮޑުވެފައިވާ އެމްޑީޕީގެ ޗެއާޕާސަންގެ އިންތިހާބުގައި ވާދަ ނުކުރައްވަން އެސްޓީއޯގެ މެނޭޖިން ޑިރެކްޓަރު ހުސެއިން އަމްރު ނިންމަވައިފި އެވެ.
މީގެކުރިން މި ނޫހާ ވާހަކަ ދައްކަވަމުން އަމްރު ވިދާޅުވީ, އޭނާ ޗެއާޕާސަން ކަމުގެ މަގާމަށް ވާދަކުރަން ނިންމީ އެމްޑީޕީގެ ސިޔާސަތު ކޮމިޓީގެ ރައީސް އާއި ކެމްޕޭން ކޮމިޓީގެ މެމްބަރެއްގެ ހައިސިއްޔަތުން ގިނަ މަސައްކަތްތަކެއް ކުރެވިފައިވާތީ ޕާޓީއަށް ގެންނަން ޖެހޭ ބަދަލުތައް ވަރަށް ރަނގަޅަށް އެނގޭތީ ކަމަށެވެ.
އެކަމަކު, އެމްޑީޕީ ގައުމީ މަޖިލީހުގެ މަތި ދެކުނު ޕްރޮވިންސްގެ ރައީސް ކަމުގެ މަގާމުގައި ހުންނެވި އަމްރު ޗެއާޕާސަންގެ ކަމުގެ މަގާމަށް ވާދަނުކުރައްވަން މިހާރު ނިންމަވާފައިވާ ކަމަށް އޭނާގެ ގާތް ބޭފުޅަކު މި ނޫހަށް ޔަގީންކޮށްދިނެވެ.
ނަމަވެސް, އަމްރު ފޯނަށް ޖަވާބު ނުދެއްވާތީ އޭނާގެ ބަހެއް ނުލިބެ އެވެ.
އިންތިހާބުގައި ވާދަނުކުރައްވަން އަމްރު ނިންމަވާފައިމިވަނީ އެމްޑީޕީގެ އިސް ދެ ބޭފުޅަކު ޗެއާޕާސަން ކަމަށް ކުރިމަތިލައްވާނެކަން އިއުލާން ކުރެއްވުމާއެކު އިންތިހާބުގެ ވާދަވެރިކަން ވަރަށް ބޮޑުވެފައިވާ ދަނޑިވަޅެއްގަ އެވެ.
ރޭގެ ވަގުތެއްގައި ރައްޔިތުން މަޖިލީހުގެ މެންބަރު އަދި އެމްޑީޕީގެ ތަރުޖަމާނު އިމްތިޔާޒު ފަހުމީ ވަނީ ޗެއާޕާސަން ކަމަށް ވާދަކުރަން ނިންމާފައިވާކަން އިއުލާން ކުރައްވާފަ އެވެ. އޭނާއާ ވާދަކުރައްވަނީ އިކޮނޮމިކް މިނިސްޓަރު އަދި އެމްޑީޕީގެ ގައުމީ މަޖިލީހުގެ ގަމު ދާއިރާގެ ރައީސް ފައްޔާޒު އިސްމާއިލެވެ.
އިމްތިޔާޒާއި ފައްޔާޒުގެ ކެމްޕެއިން މިހާރު ވެސް ފަށާފައިވާއިރު އެމްޑީޕީގެ އިސް ބޭފުޅުން ގެންދަވަނީ އެ ބޭފުޅުން ތާއިދު ކުރައްވާ ކެންޑިޑޭޓް ހާމަކުރައްވަމުންނެވެ.
މި ދެ ބޭފުޅުން އިންތިހާބުގައި ވާދަކުރައްވާއިރު, އިމްތިޔާޒު ފާހަގަކުރެވެނީ އެމްޑީޕީގެ ރައީސް މުހައްމަދު ނަޝީދާ ވަރަށް އަރިސް ބޭފުޅެއްގެ ގޮތުގަ އެވެ. އަނެއްކޮޅުން އިކޮނޮމިކް މިނިސްޓަރު ފައްޔާޒަކީ ރައީސް އިބްރާހިމް މުހައްމަދު ސޯލިހްގެ އެންމެ އަރިސް މިނިސްޓަރެވެ. އެހެންކަމުން, މި އިންތިހާބުގެ ފޯރިގަވާނެ އެވެ.
