ހުޅުމާލޭ ދެ ފިޔަވަހި ގުޅޭ ސަރަހައްދުގައި ތަރައްގީ ކުރަމުންދާ "ޗެނަލް ޕާކު" ސަރަހައްދުން ކެފޭ ނުވަތަ ރެސްޓޯރަންޓު ހަދަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ން ދޫކުރާ ބިންތަކަށް ވިޔަފާރިވެރިންގެ ބޮޑު ތަރުހީބެއް ލިބިއްޖެ އެވެ.
ޗެނަލް ޕާކުގައި ކެފޭ ނޫނީ ރެސްޓޯރަންޓު ހަދަން ހަތް ބިމެއް 20 އަހަރަށް ކުއްޔަށް ދޭން އެޗްޑީސީން ހުޅުވާޅީ ނިމުނު ޖެނުއަރީ 18، ގަ އެވެ. މި ބިންތައް ދޫކުރަނީ އެތަން ކުއްޔަށް ނަގާ ފަރާތުން އެތަނުގައި އިމާރާތްކުރުމުގެ ކަންކަން ކުރާ ގޮތަށެވެ.
މި ތަންތަނަށް ކުރިމަތިލުމުގެ ސުންގަޑި ހަމަވީ މި މަހުގެ 10 ގަ އެވެ.
އެޗްޑީސީން އާންމުކޮށްފައިވާ ސަބްމިޝަން ޝީޓުން ދައްކާ ގޮތުގައި އެހާތަނަށް ލިބުނީ 20 ހުށަހެޅުމެކެވެ. އޭގެ ތެރެއިން އެއް ހުށަހެޅުން ބާތިލުކުރުމަށް ފަހު ބާކީ 19 ބިޑު އެޗްޑީސީން ވަނީ ބަލައިގެންފަ އެވެ.
ޗެނަލް ޕާކުން ދޫކުރާ ބިންތަކުގެ ކުލީގެ ގޮތުގައި ބިޑް ފެށޭ އަގުގެ ގޮތުގައި ކަނޑައަޅާފައިވާ އަގަކީ އަކަފޫޓަކަށް 25ރ. އެވެ. މި ކުއްޔަކީ ފުރަތަމަ ފަސް އަހަރުގެ ތެރޭގައި އަހަރުން އަހަރަށް އިތުރުވާ ގޮތަށް ހުށަހަޅަން ޖެހޭ ކުއްޔެކެވެ. އަދި ކޮންމެ ފަސް އަހަރެއް ފަހުން ކުލި މުރާޖާ ކުރެވޭނެ އެވެ.
ކުލީގެ އިތުރުން އެޗްޑީސީން އާންމުކޮށް ކޮންމެ ޕްރޮޖެކްޓަކުންވެސް ނަގާ އިކިއުޒިޝަން ފީ ފެށޭ އަގެއްގެ ގޮތުގައި ކަނޑައަޅާފައިވަނީ އަކަފޫޓަކަށް 356.23ރ. އެވެ.
ޗެނަލް ޕާކުން ދޫކުރާ ބިންތައް
- ލޮޓް ނަމްބަރު 11674 - 3،237.03 އަކަފޫޓު
- ލޮޓް ނަމްބަރު 11675 - 2،957.49 އަކަފޫޓު
- ލޮޓް ނަމްބަރު 11676 - 2586.57 އަކަފޫޓު
- ލޮޓް ނަމްބަރު 11677 - 1،700.37 އަކަފޫޓު
- ލޮޓް ނަމްބަރު 11678 - 1،706.08 އަކަފޫޓު
- ލޮޓް ނަމްބަރު 11679 - 2،091.64 އަކަފޫޓު
- ލޮޓް ނަމްބަރު 11680 - 3،0165.08 އަކަފޫޓު
ގިނަ ވިޔަފާރިތަކުން އެކުއިޒިޝަން ފީ އާއި ކުލި ހުށަހަޅާފައި ހުރީ އެޗްޑީސީން ކަނޑައަޅާފައިވާ އަގުތަކަށް ވުރެ މަތިންނެވެ. ފުރަތަމަ އަހަރަށް އެންމެ މަތިން އަގު ހުށަހެޅީ އަކަފޫޓަކަށް 44ރ. އެވެ. އެންމެ މަތިން ހުށަހެޅި އެކުއިޒިޝަން ފީއަކީ އަކަފޫޓަކަށް 1،550ރ. އެވެ.
މި ތަންތަނަށް ކުރިމަތިލާފައިވާ ވިޔަފާރިތަކުގެ ތެރޭގައި ކާބޯތަކެތީގެ ހިދުމަތުގައި މަޝްހޫރު ޑައިން މޯ އާއި ބްރަދާސް ކޭޓަރިން އާއި ސެމިލީސް ހިންގާ އެސްޕެޑެޓާގެ އިތުރުން އެ ނޫން ވިޔަފާރި ދާއިރާތަކުގައި ފާހަގަކޮށްލެވޭ އާރްސީސީ އާއި ރެފްކޫލް އާއި މިސްރާބު ޓްރޭޑިން ފާހަގަކޮށްލެވެ އެވެ.
އެންމެ ގިނަ މާކްސް ލިބެނީ ކުއްޔާއި އެކުއިޒިޝަން ފީ އެންމެ މަތިން ހުށަހަޅާ ބަޔަކަށެވެ. އެއީ 70 ޕަސެންޓެވެ. ބާކީ 30 ޕަސެންޓުގެ ތެރެއިން 15 ޕަސެންޓަކީ ތަޖުރިބާ އެވެ. ބާކީ 15 ޕަސެންޓު ލިބެނީ ބިޒްނަސް ޕްލޭނަށެވެ.
ކުއްޔަށް ނަގާ ބިން ހިޔާރު ކުރަން ލިބެނީ އެންމެ ގިނައިން މާކްސް ލިބޭ ހުށަހެޅުމަށް އިސްކަންދޭ ތަރުތީބުންނެވެ.
ކެފޭ އާއި ރެސްޓޯރަންޓުތަކުގެ އިތުރުން ޗެނަލް ޕާކުގައި ހުޅުމާލޭގައި ދިރިއުޅޭ މީހުން މުނުފޫހިފިލުވުމަށް ގިނަ ރެކްރިއޭޝަނަލް ތަންތަން ތަރައްގީކުރެވޭނެ އެވެ.
