އެމްޑީޕީގެ ޗެއާޕާސަންގެ މަގާމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވާދަކުރައްވަން ނިންމަވައިފި އެވެ.
ވެރިކަންކުރާ ކޯލިޝަންގެ މައި ޕާޓީ، އެމްޑީޕީގެ ތަރުޖަމާނުގެ މަގާމުގައި ހުންނެވި އިމްތިޔާޒު، އެ ޕާޓީގެ ޗެއާޕާސަންގެ މަގާމަށް ވާދަކުރައްވާ ކަމުގެ އަޑުތައް ފެތުރިގެން ދިއުމަށް ފަހު، އެކަން ޔަގީންކޮށް ދެއްވުމަށް ރޭ އޭނާ ވަނީ ޓްވީޓެއް ކުރައްވައިފަ އެވެ.
"އެމްޑީޕީގެ ޗެއާޕާސަން ކަމަށް ކުރިމަތިލުމަށް އަޅުގަނޑު ނިންމައިފިން," އިމްތިޔާޒުގެ ޓްވީޓްގައި ވިދާޅުވެފައިވެ އެވެ.
ރައްޔިތުންގެ މަޖިލީހުގެ މެމްބަރުކަން އިމްތިޔާޒު ކުރައްވާ މިއީ ތިން ވަނަ ދައުރެ އެވެ.
ޗެއާޕާސަންގެ މަގާމަށް ވާދަ ކުރައްވާނެ ކަމަށް އޭނާ ހާމަ ކުރެއްވިއިރު، އިކޮނޮމިކް މިނިސްޓަރު ފައްޔާޒު އިސްމާއީލް އާއި އެސްޓީއޯގެ މެނޭޖިން ޑިރެކްޓަރު ހުސައިން އަމްރު ވެސް އެ މަގާމަށް ވާދަކުރައްވަން ވަނީ ނިންމައިފަ އެވެ.
އެޕްރީލް 16 ގައި ބާއްވާ ޗެއާޕާސަންގެ އިމްތިހާބަށް ކުރިމަތިލުމުގެ ފުރުސަތު އިއްޔެ ހުޅުވާލާފައިވާއިރު، ކުރިމަތިލުމުގެ ސުންގަޑި ހަމަވާނީ ފެބްރުއަރީ 19، ގެ 16:00 އަށެވެ. ކެންޑިޑޭޓުންގެ ނަންތައް ފެބްރުއަރީ 22، ގައި އިއުލާނުކުރާނެ އެވެ.
ޗެއާޕާސަންގެ އިންތިހާބު ބާއްވަނީ ކުރިން އެ މަގާމުގައި ހުންނެވި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފުގެ މަގާމުގެ ދައުރު އިއްޔެ ހަމަވުމާ ގުޅިގެންނެވެ.
