ރާއްޖޭގައި އިންޑިއާ ސިފައިން ތިބުމާ ދެކޮޅަށް، "އިންޑިއާ އައުޓް" ގެ ނަމުގައި އިދިކޮޅުން ކުރިއަށް ގެންދާ ކެމްޕޭނާއި ފަހުން ވެސް ހިންގައިފާނެ އެފަދަ އެހެން ކެމްޕޭންތައް ވެސް ގާނޫނީ ކުށަކަށް ހެދޭ ފަދަ ބިލު، ރައްޔިތުންގެ މަޖިލީހަށް ހުށަހެޅުމަށް ސުޕަ މެޖޯރިޓީ އޮންނަ އެމްޑީޕީ ޕާލިމެންޓަރީ ގްރޫޕުން ފާސްކޮށްފި އެވެ.
އެއީ "ދިވެހި ރާއްޖެއިން ބޭރު ގައުމުތަކާ އެކު ގާއިމްކޮށްފައިވާ ހާރިޖީ ގުޅުންތަކަށް ނޭދެވޭ އަަސަރުކުރާނެ ފަދަ ހުއްޓުވުމުގެ ބިލު" ގެ ނަމުގައި އެމްޑީޕީން އެކުލަވާލާފައިވާ ބިލެކެވެ.
"ދޭދޭ ދެ ގައުމުގެ މެދުގައި އޮންނަ ގުޅުމަށް ބުރޫއަރާ ގޮތަށް ހަރަކާތްތައް ހިންގުމަކީ ގަބޫލުކުރެވޭ ކަމެއް ނޫން" މި ބިލު ހުށަހަޅާ ސަބަބު ބަޔާން ކޮށްދެއްވަމުން އެމްޑީޕީގެ ޕީޖީ ލީޑަރު އަދި މެދު ހެންވޭރު ދާއިރާގެ މެމްބަރު އަލީ އާޒިމް "އަދަދު" އަށް ވިދާޅުވި އެވެ.
އަންނަ ހަފްތާގައި އެމްޑީޕީން އެ ބިލު މަޖިލީހަށް ހުށަހަޅާނެ އެވެ. އެ ޕާޓީގެ ފަރާތުން މި ބިލު ހުށަހަޅުއްވާނީ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) އެވެ.
އެމްޑީޕީން އެކުލަވައިލި ޑްރާފްޓްގައިވާ ގޮތުން، އެ ބިލް ގާނޫނަކަށް ވުމަށްފަހު، ރާއްޖެއާ އެހެން ގައުމުތަކާ ދެމެދު އޮންނަ ގުޅުންތަކަށް ނޭދެވޭ އަސަރުކޮށްފާނެ ފަދަ އަމަލެއް ކުރާ މީހާ އެކުރަނީ ކުށެކެވެ. ބިލުގައިވާ ގޮތުން، ރާއްޖެއާ ގުޅުން ގާއިމްކޮށްފައިވާ ގައުމެއްގެ އިއްޒަތާއި ގަދަރަށް ބުރޫ އަރާ ފަދަ އަމަލެއް ކުރުމަކީ ވެސް ކުށެކެވެ.
ބިލްގެ (6) ވަނަ މާއްދާގެ (ހ) ގައި އެގޮތަށް ހިމަނަން ޑްރާފްޓްގައި އޮތް އިރު އެ މާއްދާގެ (ށ)ގައި އޮތީ އެ ކުށަށް ދޭނެ އަދަބެވެ.
"...މި މާއްދާގެ ހ. ގައި ބަޔާންކޮށްފައިވާ ކުށެއް ކޮށްފި މީހެއްގެ އަދަބަކީ، އެ އަމަލެއްގެ ކުޑަބޮޑުމިނަށް ބަލައި ގިނަވެގެން 20،000 ރުފިޔާއިން ޖޫރިމަނާކުރުން ނުވަތަ އެއް އަހަރަށް ވުރެ ދިގުނޫން މުއްދަތަކަށް ގޭބަންދުކުރުން ނުވަތަ ހަ މަސް ދުވަހަށް ވުރެ ދިގުނޫން މުއްދަތަކަށް ޖަލަށް ލުމެވެ،" އެމްޑީޕީން ތައްޔާރު ކުރި ޑްރާފްޓުގައި ބުނެފައިވެ އެވެ.
މިފަދަ ބިލެއް ހުށަހަޅަން އެމްޑީޕީގެ ޕީޖީން ފާސްކޮށްފައިވާއިރު "އިންޑިއާ އައުޓް" ކެމްޕޭނާ މެދު ކަންބޮޑުވުން ފާޅުކުރައްވައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ހުށަހެޅުއްވި މައްސަލަ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އިން އަންނަނީ ފުޅާ ދާއިރާއެއްގައި ބަލަމުންނެވެ.
