ވެރިކަންކުރާ މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ކުރިޔަށް އޮތް އެތެރޭގެ އިންތިހާބުތައް ބާއްވާނެ ތާރީހުތައް ކަނޑައެޅުމަށް އެ ޕާޓީގެ ގައުމީ މަޖިލީހުގެ ޖަލްސާއެއް މާދަމާ ރެއަށް ތާވަލުކޮށްފި އެވެ.
މި ޖަލްސާ އޮންނާނީ މާދަމާ ރޭ 08:30 ގައި އިސްކަންދަރު ސްކޫލްގެ ހޯލުގަ އެވެ.
އެ ޕާޓީގެ ކުރިއަށް ހުރި އެތެރޭގެ އިންތިހާބުތައް ބާއްވާނެ ތާރީހުތައް މާދަމާ ރޭގެ ޖަލްސާގައި ގޮތެއް ނިންމާނެކަން މި ނޫހަށް ވަނީ އެނގިފަ އެވެ.
އެގޮތުން، ކުރިއަށް އޮތް ރިޔާސީ އިންތިހާބުގައި އެމްޑީޕީގެ ފަރާތުން ވާދަކުރާ ކެންޑިޑޭޓަކު ކަނޑައެޅުމަށް ބާއްވާ ޕްރައިމަރީގެ ތާރީހު ކަނޑައަޅާނެ އެވެ. އޭގެ އިތުރުން އެ ޕާޓީގެ ޗެއާޕާސަންގެ އިންތިހާބާއި، ޕާލިމެންޓަރީ ގްރޫޕްގެ ލީޑާޝިޕްގެ އިންތިހާބާއި، އަންހެނުންގެ ރޫހު އަދި ޒުވާނުންގެ ހިތްވަރުގެ އިންތިހާބުތައް ބާއްވާނެ ތާރީހުތައް ވެސް ކަނޑައަޅާނެ އެވެ.
އެންމެފަހުން އެމްޑީޕީން ރިޔާސީ ޕްރައިމަރީއެއް ބޭއްވީ މެއި 30، 2018 ގަ އެވެ. އެފަހަރުގެ ޕްރައިމަރީގައި ވާދަކުރެއްވީ ރައީސް މުހައްމަދު ނަޝީދު އެކަންޏެވެ. އެމަނިކުފާނު އޭރު އެމްޑީޕީގެ ރިޔާސީ ޓިކެޓް 43،922 ވޯޓުން ކަށަވަރު ކުރެއްވި ނަމަވެސް އިންތިހާބުގައި ވާދަކުރަން ފުރުސަތު ލިބިވަޑައިނުގަތުމުން ޓިކެޓް ދޫކޮށްލެވި އެވެ.
އެއަށްފަހު، ޖޫން 30، 2018 ގައި އއ. އުކުޅަހުގައި ބޭއްވި އެ ޕާޓީގެ ކޮންގްރެސްގައި 791 މެމްބަރުންގެ އިއްތިފާގުން ރިޔާސީ ޓިކެޓް ދީފައި ވަނީ އޭރުގެ ޕީޖީ ލީޑަރު އަދި މިހާރުގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށެވެ.
ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް ނަޝީދު ވަނީ އެ ޕާޓީގެ ޕްރައިމަރީގައި ވާދަކުރައްވާނެކަން ހާމަކުރައްވާފަ އެވެ. އެހެން ނަމަވެސް، ރައީސް ސޯލިހު ޕްރައިމަރީގައި ވާދަކުރައްވާނެކަން ހާމަކުރައްވާފައެއް ނުވެ އެވެ. އެމަނިކުފާނު ވިދާޅުވާ ގޮތުން އެމަނިކުފާނުގެ ފޯކަސް މިވަގުތު ހުރީ ވައުދުތައް ފުއްދުމަށެވެ.
ރިޔާސީ ޕްރައިމަރީގެ ކަންކަން އިންތިޒާމުކޮށް ކުރިޔަށްގެންދާނީ ގައުމީ މަޖިލީހުން އިންތިހާބުކުރާ ފަސް މެމްބަރުންގެ ކޮމިޓީއަކުންނެވެ.
އެމްޑީޕީގެ ޗެއާޕާސަންގެ މަގާމުގައި ހުންނެވި ހަަސަން ލަތީފުގެ ދައުރު ހަމަވާނީ މާދަމާ އެވެ. އޭނާ އެ މަގާމަށް އިންތިހާބުކުރީ އެ މަގާމުގައި ކުރިން ހުންނެވި އަލީ ވަހީދު އިސްތިއުފާ ދެއްވުމާ ގުޅިގެން ފެބްރުއަރީ 11، 2017 ގަ އެވެ. އެފަހަރު އެހެން ކެންޑިޑޭޓަކު އިންތިހާބުގައި ވާދަކޮށްފައި ނުވާތީ ނަގާފައި ވަނީ ފެންނަ ނުފެންނަ ވޯޓެކެވެ.
އެ ޕާޓީގެ މަތި ދެކުނު ޕްރޮވިންސްގެ ރައީސް އަދި އެސްޓީއޯގެ މެނޭޖިން ޑިރެކްޓަރު ހުސައިން އަމްރު ވަނީ ޗެއާޕާސަންގެ މަގާމަށް ވާދަކުރުމަށް ޝައުގުވެރިކަން ފާޅުކުރައްވާފަ އެވެ. އިތުރު ބޭފުޅަކު ޗެއާޕާސަންގެ މަގާމަށް ޝައުގުވެރިކަން ފާޅުކޮށްފައެއް ނުވެ އެވެ.
މި މަހުގެ އެއްވަނަ ދުވަހު އެ ޕާޓީގެ ޕާލިމެންޓަރީ ގްރޫޕްގެ ލީޑާޝިޕްގެ ދައުރު ވެސް ވަނީ ހަމަވެފަ އެވެ. މެދު ހެންވޭރު ދާއިރާގެ މެމްބަރު އަލީ އާޒިމް ޕީޖީ ލީޑަރަކަށް ހޮވާފައިވަނީ 57 މެމްބަރުންގެ ވޯޓާއެކު ޖުލައި 2، 2019 ގަ އެވެ.
އޭނާގެ އިތުރުން ޑެޕިއުޓީ ލީޑަރުންގެ ގޮތުގައި އޭރު އިންތިހާބުކުރީ ހުޅުދޫ ދާއިރާގެ މެމްބަރު އިލްޔާސް ލަބީބާއި ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް އެވެ. އެފަހަރުގެ އިންތިހާބުގައި ޗީފް ވިޕަކަށް އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އަދި ޕީޖީ ގްރޫޕްގެ އަމީން އާންމަކަށް އިންތިހާބުކުރީ އަލިފުށީ ދާއިރާގެ މެމްބަރު މުހައްމަދު ރަޝީދު އެވެ.
އޭގެ އިތުރުން، އަންހެނުންގެ ރޫހުގެ ދައުރު ވެސް އޮތީ ހަމަވެފަ އެވެ. އެމްޑީޕީގެ ސިޔާސީ ހުރިހާ ހަރަކާތެއްގައި އަދި ކަންކަން ނިންމާ ފެންވަރުގައި އެޕާޓީގެ އަންހެން މެމްބަރުންގެ ބައިވެރިވުމާ ހިއްސާ އިތުރުކޮށް، އަންހެން މެމްބަރުންގެ އަޑު އުފުލުމަށް އުފައްދާފައިވަނީ އަންހެނުންގެ ރޫހެވެ. އެ ރޫހުގެ ރައީސް އާއި ނައިބު ރައީސް ކަނޑައަޅާނީ އަންހެނުންގެ ރޫހުގެ މެމްބަރުންގެ ވޯޓަކުންނެވެ.
ޒުވާނުންގެ ހިތްވަރުގެ އިންތިހާބު ވެސް ބާއްވާއިރު އެއީ އެމްޑީޕީގެ ކަންކަމުގައި ފުޅާ ދާއިރާއެއްގައި ޒުވާނުންގެ ބައިވެރިކުރުމުގެ ފުރުސަތު ދިނުމަކީ ޒުވާނުންގެ ހިތްވަރުގެ މަސްއޫލިއްޔަތެކެވެ. ޒުވާނުންގެ ހިތްވަރު ރައީސާއި ނައިބު ރައީސް އިންތިހާބު ކުރާނީ ޒުވާނުންގެ ހިތްވަރުގެ ރަޖިސްޓަރީ ކުރާ މެންބަރުންގެ މެދުގައި ނަގާ ވޯޓަކުންނެވެ.
ގައުމީ މަޖިލީހަކީ އެމްޑީޕީގެ ކޮންގްރެސްއަށް ފަހު އެންމެ ބާރުގަދަ ގުނަނެވެ. ގައުމީ މަޖިލީހުގައި ޖުމްލަ 146 މެމްބަރުން ތިބެ އެވެ. އެއީ ވަޒީރުންގެ މަޖިލީހުގެ މެމްބަރުންނާއި މަޖިލީހުގެ މެމްބަރުންނާއި 87 ދާއިރާ ތަމްސީލުވާ ގޮތަށް، ރާއްޖޭގައި އޮތް އެންމެ ބިޔަ ގައުމީ މަޖިލީހެވެ. މިއީ، ގައުމީ މަޖިލިސް އާ ދައުރަކަށް އިންތިހާބުވުމަށް ފަހު ބާއްްވާ ދެވަނަ ޖަލްސާ އެވެ.
