ހުޅުމާލޭ ބީޗް ފްރަންޓުން ބިމެއް ގަންނަން މީހަކު އަކަފޫޓަކަށް 10 މިލިއަން ރުފިޔާ ހުށަހަޅައިފި އެވެ.
ހުޅުމާލޭ ބީޗް ފްރަންޓުން 26 ބިމެއް ވިއްކާލަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ބީލަން ހުޅުވާލީ މިއަދު ހެނދުނު 10:00 ގަ އެވެ. ބީލަން ހުށަހެޅުން ބަންދުކުރީ 12:00 ގަ އެވެ.
މި ބިންތަކަށް ބޮޑު ތަރުހީބެއް ލިބިފައިވާއިރު ފޯމު ބަލައިގަތުން ބަންދުކުރުމާ ހަމައަށް 211 މީހަކު ވަނީ ބީލަން ހުށަހަޅާފަ އެވެ. މިހާރު ކުރިޔަށްދަނީ ބީލަން ކަރުދާސްތައް ހުޅުވައިގެން ހުށަހަޅާފައިވާ އަގުތައް ބެލުމުގެ މަސައްކަތެވެ.
ބީލަންވެރިންނަށް އާންމުކޮށް ހުޅުވާލައިގެން ކުރިޔަށް ގެންދާ މި ބީލަމުގައި، މި އަގު ހުށަހެޅީ އިބްރާހިމް މާޖިދު ކިޔާ މީހެކެވެ. އެޗްޑީސީގެ އޮފިޝަލުން ވަނީ އޭނާ ހުށަހެޅި އަގަކީ ސައްހަ އަގުތޯ ކަށަވަރު ކުރަން މަސައްކަތް ކޮށްފަ އެވެ. ނަމަވެސް, އެ ވަގުތު މާލަމުގައި އޭނާ ހާޒިރުވެ ނެތުމުން އެކަމެއް ނުވި އެވެ.
ވިއްކާލާ ބީޗު ފްރަންޓު ބިންތަކުގެ މުހިންމު މައުލޫމާތު
- ވިއްކާލާ ބިމުގެ އަދަދު: 26
- ބީލަން ފަށާ އަގު: އަކަފޫޓަކަށް 3،900ރ.
- ބިންތަކުގެ ސައިޒު: 1،676.05 އަކަފޫޓާއި 2،633.93 އަކަފޫޓާ ދޭތެރޭ
މާލަމުގައި އެ ވަގުތު ނެތް ނަމަވެސް ހުރިހާ ޝަރުތަކާއި ލިޔެކިޔުންތައް ހަމަވާތީ އެޗްޑީސީގެ އޮފިޝަލުން ނިންމީ އޭނާގެ ބިޑު ބަލައިގަންނާށެވެ. އަދި ބުނީ އަކަފޫޓަކަށް ހުށަހަޅާ އަގުގެ ގޮތުގައި އިނގިރޭސިންނާއި ދިވެހިން ވެސް ލިޔެފައިވާ 10 މިލިއަން ރުފިޔާ ކަމަށް ބުންޏެވެ.
މިއީ ވިއްކާލާ އެންމެ ކުޑަ ޕްލޮޓުގެ ސައިޒުން ބެލި ކަމުގައިވީ ނަމަވެސް 16 ބިލިއަން ރުފިޔާ އެވެ.
މިހާތަނަށް ހުށަހަޅާފައިވާ އަގުތަކަށް ބަލާއިރު، މިއާ އެންމެ ގާތްކުރާ އަދަދަކަށް ވެސް ބިޑުކުރީ އަކަފޫޓަކަށް 10،000ރ. އެވެ. އެވަރެޖު ބިޑުތައް އުޅެނީ 4000ރ. އާއި 5000ރ. ދެމެދުގަ އެވެ.
މި ބިންތަކުގެ ބީލަން ފަށާ އަގަކީ އަކަފޫޓަކަކަށް 3،900ރ. އެވެ.
މި ބިންތައް ވިއްކަން ހަމަޖެހިފައިވަނީ އެންމެ ބޮޑު އަގު ހުށަހަޅާ 26 ފަރާތަކަށެވެ. ދެން އެންމެ މަތިން އަގު ހުށަހަޅާ ފަސް މީހަކު ވެއިޓްލިސްޓު ކުރެވޭނެ އެވެ.
މި ބީލަމާ ގުޅިގެން އެޗްޑީސީން ކޮށްފައިވާ އިއުލާނުގައި ބުނާ ގޮތުން އެންމެ ބޮޑު އަގު ހުށަހަޅާ މީހުންނަށް އެ މީހަކު ބޭނުން ބިމެއް ހިޔާރުކުރަން، ހުށަހެޅި އަގުގެ ތަރުތީބުން ފުރުސަތު ލިބޭނެ ކަމަށެވެ. އެތަނަށް ފައިސާ ދައްކަން އިތުރު 60 ދުވަހުގެ މުއްދަތެއް ލިބެ އެވެ.
މި މުއްދަތުގެ ތެރޭގައި ފައިސާ ނުދައްކައިފިނަމަ ވެއިޓްލިސްޓު ކުރެވިފައިވާ މީހަކަށް ބިން ގަންނަން ފުރުސަތު ދެވޭނެ އެވެ.
