ހުޅުމާލޭ ދެވަނަ ފިޔަވަހިން ވިއްކާލަން ނިންމާފައިވާ ބިންތަކުގެ ތެރެއިން އަތިރިމައްޗާ ކުރިމަތިން (ބީޗު ފްރަންޓު) ވިއްކާލަން މަސައްކަތް ކުރާ ބިންތަކުގެ ބީލަން މާދަމާ އޮންނާނެ ކަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން މިއަދު ބުނެފި އެވެ.
ހުޅުމާލޭން ބިން ވިއްކަން މަސައްކަތް ކުރާތާ އަހަރެއްހާ ދުވަސް ފަހުން މި ބިންތައް ވިއްކާލަން އެޗްޑީސީން އިއުލާނުކުރީ މިދިޔަ އަހަރުގެ ޑިސެމްބަރު 27 ގަ އެވެ. ޖުމްލަ 60 ބިމެއް ވިއްކާލާއިރު، މާދަމާ ބީލަން އޮންނާނީ އޭގެ ތެރެއިން ބީޗު ފްރަންޓުން ވިއްކާލާ 26 ބިމަށެވެ.
އެޗްޑީސީން އާންމުކޮށްފައިވާ ތާވަލުގައި ބުނާ ގޮތުން ބީލަން ކުރިޔަށްދާނީ ދެ މަރުހަލާއަކަށެވެ. އެއީ ބީލަން ފޯމު ބަލައިގަތުމާ ބީލަން ފޯމު ހުޅުވުމެވެ. ބީލަން ފޯމުތައް ބަލައިގަންނާނީ ހެނދުނު 9:00 އިން މެންދުރު 12:00 އަށެވެ. އަދި ބީލަން ފޯމުތައް ހުޅުވާނީ 13:00 ގަ އެވެ.
މިއީ ހުޅުވާލައިގެން ކުރިޔަށް ގެންދާ ބީލަމެކެވެ. އެހެންކަމުން ބީލަން ހުޅުވުން އޮންނާނީ ބީލަން ހުށަހެޅި މީހުންނަށް އާންމުކޮށް ހުޅުވާލައިގެންނެވެ. ބީލަން ހުށަހެޅުމާއި ހުޅުވުމުގެ ކަންކަން ކުރިޔަށްދާނީ ހ. މީރުމާ ފަސްވަނަ ފަންގިފިލާ (މީރުމާ އިވެންޓްސް) ގަ އެވެ.
ހުޅުމާލެ ދެވަނަ ފިޔަވަހިން ވިއްކާލާ ބިންތައް: އޮރެންޖު ކުލައިން ފާހަގަކޮށްފައި ހުރީ ބީޗު ފްރަންޓުން ވިއްކާ 26 ބިން. -- ފޮޓޯ: އެޗްޑީސީ
އެޗްޑީސީން ބުނި ގޮތުގައި ބީލަން ހުށަހެޅި މީހާ ނޫނީ އެ މީހާގެ ފަރާތުން އެކަކަށް ބީލަމުގައި ބައިވެރިވެވޭނެ އެވެ. އެކަމަކު ބީލަން ހުށަހެޅީ މީހާ ނޫން މީހަކަށް ބީލަމުގައި ބައިވެރިވެވޭނީ ޕަވާ އޮފް އެޓާނީ އޮވެގެން ކަމަށް އެ ކޯޕަރޭޝަނުން ބުންޏެވެ.
ވިއްކާލާ ބީޗު ފްރަންޓު ބިންތަކުގެ މުހިންމު މައުލޫމާތު
- ވިއްކާލާ ބިމުގެ އަދަދު: 26
- ބީލަން ފަށާ އަގު: އަކަފޫޓަކަށް 3،900ރ.
- ވިއްކާލާ ބިންތަކުގެ ސައިޒު: 1،676.05 އަކަފޫޓާއި 2،633.93 އަކަފޫޓާ ދޭތެރޭ
އެޗްޑީސީން ކަނޑައަޅާފައިވާ އެންމެ ކުޑަ އަގުގައި މި ބިންތައް ވިކުނަސް އެ ކުންފުންޏަށް 217.8 މިލިއަން ރުފިޔާ ލިބޭނެ އެވެ. އެއީ އެވަރެޖުކޮށް ކޮންމެ ބިމަކުން 8.3 މިލިއަން ރުފިޔާ ރޭޓުގަ އެވެ. ނަމަވެސް ކުރިން ވިއްކާފައި ހުރި ބިންތައް ވިކުނު ރޭޓަށް ބަލާނަމަ، ލަފާކުރެވެނީ މިއަށް ވުރެ ވެސް ބޮޑު އާމްދަނީ ލިބޭނެ ކަމަށެވެ.
މި ފައިސާ ބޭނުންކުރާނީ ހުޅުމާލޭގައި ހިންގާ ތަރައްގީގެ އެކިއެކި މަޝްރޫއުތަކަށް ކަމަށް އެޗްޑީސީން ބުންޏެވެ. އޭގެ ތެރޭގައި މިސްކިތްތަކާއި ސްކޫލްތަކާއި ޕާކުތައް ހިމެނޭ ކަމަށް އެ ކޯޕަރޭޝަނުން ބުނެ އެވެ.
އެކަމަކު މާލޭގައި ބިމުގެ ދަތިކަން އިންތިހާއަށް އޮތް ދަނޑިވަޅެއްގައި ބޮޑު އަގުގައި ވަކި ބަޔަކަށް ބިން ވިއްކާތީ ގިނަ ބަޔެއްގެ ކަންބޮޑުވުން އެބަހުއްޓެވެ.
އޭގެ ތެރޭގައި ރައްޔިތުންގެ މަޖިލިހުގެ ރައީސް އަދި ވެރިކަން ކުރާ ކޯލިޝަނުގެ މައި ޕާޓީ އެމްޑީޕީގެ ރައީސް މުހައްމަދު ނަޝީދާއި އިދިކޮޅު ސިޔާސީ މީހުންނާއި އާންމުންގެ ގިނަ ބަޔަކު ހިމެނެ އެވެ. އަދި މާލެ ސިޓީ ކައުންސިލުން ވަނީ މިއީ ގާނޫނާ ހިލާފަަށް ކުރާ ކަމެއް ކަމަށް ވެސް ތުހުމަތުކޮށްފަ އެވެ.
އެ ތުހުމަތަށް ރައްދު ދެމުން އެޗްޑީސީން ބުނީ ހުޅުމާލޭން ބިން ވިއްކައިގެން އާމްދަނީ ހޯދުމަކީ އެ ކުންފުނީގެ ހައްގެއް ކަމަށާއި، ހުޅުމާލޭ ބިމުގެ ރަޖިސްޓްރީ ބާތިލުކުރި މައްސަލައިގައި ސިވިލް ކޯޓުން މާލެ ސިޓީ ކައުންސިލާ ދެކޮޅަށް ނެރުނު ވަގުތީ އަމުރުން އެކަން ސާފުކަމަށެވެ.
