ރާއްޖޭގެ ގައުމީ ވޮލީބޯޅަ ޓީމާ ދެކޮޅަށް ކުޅުމަށް ހަމަޖެހިފައިވާ ބައިނަލްއަގުވާމީ އެކުވެރިކަމުގެ ތިން މެޗަށް ބަންގްލަދޭޝްގެ ގައުމީ ވޮލީބޯޅަ ޓީމު މާލެ އަތުވެއްޖެ އެވެ.
ބަންގްލަދޭޝް ޓީމު މާލެ އަތުވީ މިއަދު މެންދުރު ފަހު އެވެ. ޒުވާނުންގެ މަރުކަޒު އެތެރެ ކޯޓުގައި ބަންގްލަދޭޝް ވޮލީބޯޅަ ޓީމާ ދެކޮޅަށް ރާއްޖޭން ކުޅޭ ފުރަތަމަ މެޗު އޮންނާނީ މާދަމާރޭ އެވެ. ދެ ވަނަ މެޗު ބުދަ ދުވަހު ކުޅޭއިރު، ފަހު މެޗު އޮންނާނީ އަންނަ ހުކުރު ދުވަހުގެރޭގަ އެވެ.
ބަންގްލަދޭޝް މެޗުތަކަށް ގައުމީ ވޮލީބޯޅަ ޓީމުގެ ފަރިތަކުރުންތައް ފަށާފައިވަނީ މިދިޔަ މަހު 19 ވަނަ ދުވަހުގަ އެވެ. ބަންގްލަދޭޝާ ދެކޮޅަށް ކުޅޭ ތިން މެޗުގައި ގައުމީ ޓީމަށް އިރުޝާދުދޭނީ މިދިޔަ ޑިސެމްބަރު މަހު ބަންގްލަދޭޝްގައި ބޭއްވި ސެންޓްރަލް ޒޯން ވޮލީބޯޅަ މުބާރާތުގައި ގައުމީ ޓީމަށް ކޯޗުކޮށްދިން މުހައްމަދު ސާޖިދު (ބޮޑުކާއްޓެ) އެވެ.
ރާއްޖެ އާއި ބަންގްލަދޭޝް މީގެ ކުރިން ސެންޓްރަލް ޒޯން ވޮލީބޯޅަ މުބާރާތުގައި ވަނީ ހަތަރު ފަހަރެއްގެ މަތިން ވާދަކޮށްފަ އެވެ. ހުރިހާ މެޗުތަކުން ވެސް ރާއްޖެ ބަލިވި ނަމަވެސް ކޮންމެ މެޗެއް ވެސް ނިމިފައިވަނީ ވާދަވެރިކޮށެވެ.
ބަންގްލަދޭޝްގެ ވޮލީ ޓީމު މިއަދު އެއާޕޯޓްގައި: ރާއްޖެއާ ދެކޮޅަށް ތިން މެޗެއް ކުޅޭނެ.-- ފޮޓޯ: މުހައްމަދު ޝާބިން/ އަދަދު
އެންމެ ފަހުން ދިވެހިރާއްޖޭގެ ވޮލީބޯޅަ ޓީމާއި ދިވެހިރާއްޖެ ސެންޓްރަލް ޒޯންގައި ވާދަކުރީ މިދިޔަ ޑިސެމްބަރު މަހުގައެވެ. އެ މެޗު ގައުމީ ޓީމުން ކުޅުނީ ކޮވިޑްގެ ސަބަބުން އުނދަގޫ ހާލަތެއްގަ އެވެ. މިގޮތުން ބަންގްލަދޭޝް އަށް ގޮސް އެއްވެސް ވަރަކަށް ރެސްޓްނުކުރެވި ކުޅުންތެރިން ކުޅުނުއިރު، ކޮވިޑް-19 އަށް ޓީމްގެ ލިބަރޯ މުހައްމަދު ނައީމް (ނައިންޓެ) ޕޮޒިޓިވްވެފަވާތީ މެޗު ކުޅުނީ ލިބަރޯއެއް ނުލަ އެވެ.
ބަންގަލަދޭޝްގެ ގައުމީ ޓީމާއި ދެކޮޅަށް މެޗުތަކެއް ކުޅޭ ގޮތަށް ހަމަޖެހުނީ މިދިޔަ ޑިސެމްބަރު މަހު ކުޅިވަރާ ބެހޭ ވަޒީރުު އަހުމަދު މަހުލޫފު ބަންގްލަދޭޝަށް ކުރެއްވި ރަސްމީ ދަތުރުފުޅުގެ ތެރެއިންނެވެ.
މިނިސްޓަރު މަހުލޫފްގެ ދައުވަތަކަށް ލަންކާގެ ގައުމީ ވޮލީބޯޅަ ޓީމު ވަނީ ދެ ފަހަރެއްގެ މަތިން ރާއްޖެ އައިސް އެކުވެރިކަމުގެ މެޗުތަކެއް ކުޅެފަ އެވެ. އެ ގޮތުން އެންމެ ފުރަތަމަ 2019 ވަނަ އަހަރުގެ އޮގަސްޓް މަހު ރާއްޖެ އައިއިރު، ދެ ވަނަ ފަހަރަށް އައީ މިދިޔަ ޑިސެމްބަރު މަހު ކުރީކޮޅުގަ އެވެ.
ލަންކާ ގައުމީ ޓީމުގެ އިތުރުން ޑިސެމްބަރު މަހު އިންޑިއާ ލީގުގައި ކުޅޭ ހައިދަރުއާބާދު ސްޕައިކާސް ވެސް ވަނީ ރާއްޖެ އައިސް ގައުމީ ފިރިހެން ޓީމާ ދެކޮޅަށް މެޗުތަކެއް ކުޅެފަ އެވެ. ލަންކާ އަތުން ތިން މެޗުން ބަލިވި ނަމަވެސް ހައިދަރުއާބާދު އަތުން ވަނީ ތިން މެޗުން ވެސް މޮޅުވެފަ އެވެ.
ރާއްޖޭން ވަނީ މި އަހަރު ސެންޓްރަލް ޒޯންގެ އަންހެން އަދި ފިިރިހެން މުބާރާތް ހޯސްޓް ކުރުމުގެ ފުރުސަތު ހޯދައިފަ އެވެ. ބަންގްލަދޭޝާ ވާދަކޮށް ރާއްޖޭން ސެންޓްރަލް ޒޯން މުބާރާތް ހޯސްޓް ކުރުމުގެ ފުރުސަތު ހޯދީ ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ މިހާރު އޮތް ރައީސް މުހައްމަދު ރަނޭޝް (ރަނޭ)ގެ ލީޑަޝިޕްގެ މަސައްކަތުންނެވެ.
