ށ. ކޮމަންޑޫ އާއި އެ ރަށާ ޖެހިގެން އޮންނަ ކުޑަ ފަޅު ރަށް މަތިކޮމަންޑޫ ގުޅާލުމަށް ސަރުކާރުން ޕްރޮޖެކްޓެއް ފެށީ އަންނަ މަހު ބޭއްވުމަށް ހަމަޖެހިފައިވާ އެ ދާއިރާގެ އިންތިހާބަށް ނުފޫޒު ފޯރުވަން ކަމަށް ބުނެ އެންޓި ކޮރަޕްޝަން ކޮމިޝަން (އޭސީސީ) އަށް މައްސަލައެއް ހުށަހަޅައިފި އެވެ.
ދެ ކޮމަންޑޫ ގުޅައިލުމަށް ހިންގާ ޕްރޮޖެކްޓެއް ހިންގަނީ އިންތިހާބަށް ނުފޫޒު ފޯރުވުމަށް ކަމަށް ބުނެ އެ މައްސަލަ ހުށަހެޅީ މިދިޔަ ހަފްތާގެ ތެރޭގައި އަމިއްލަ ފަރާތަކުން ކަމަށް މި ނޫހާ ވާހަކަ ދައްކަމުން އޭސީސީގެ އޮފިޝަލަކު ބުންޏެވެ.
"އެންމެ މައްސަލައެއް މިހާތަނަށް ހުށަހަޅާފައި ވަނީ. އެއީ މި މަހުގެ 19 ވަނަ ދުވަހު ހުށަހަޅާފަވާ މައްސަލައެއް. ދެ ކޮމަންޑޫ ގުޅާލުމުގެ މައްސަލަ. އެ މައްސަލަ ހުށަހަޅާފައިވަނީ އިންތިހާބަށް ނުފޫޒު ފޯރުވާ ކަމަށް ބުނެ،" އޭނާ ބުންޏެވެ.
ދެ ކޮމަންޑޫ ގުޅާލުމަށް ގާތްގަނޑަކަށް 250 މިލިއަން ރުފިޔާއަށް ދައުލަތުގެ އެމްޓީސީސީއާ ހަވާލު ކުރީ މި ހިނގާ ޖެނުއަރީ 12، ގަ އެވެ. މަސައްކަތް ހަވާލު ކުރީ ދެ އަހަރުގެ ތެރޭގައި ނިންމާ ގޮތަށެވެ.
އަންނަ ފެބްރުއަރީ 5، ގައި ބޭއްވުމަށް ހަމަޖެހިފައިވާ ކޮމަންޑޫ ދާއިރާގެ އިންތިހާބުގައި ވާދަ ކުރަނީ ވެރިކަން ހިންގާ އެމްޑީޕީގެ މުހައްމަދު ރާޝިދާއި އިދިކޮޅު ޕީޕީއެމްގެ މޫސާ ފަތުހީ އާއި އެމްއެންޕީގެ އަބްދުލްހަންނާނު އިދުރީސް އެވެ.
ކޮމަންޑޫ ދާއިރާގެ ކެމްޕެއިން ބޯމަތި ވެފައިވާ ދަނޑިވަޅުގައި ސަރުކާރުން ކުއްލިއަކަށް އެ މަޝްރޫއު އިއުލާން ކުރުމުން އިދިކޮޅުން އެ ކަމަށް ވަރަށް ބޮޑަށް ފާޑު ކިޔެވެ. އަދި ބައެއް މަދަނީ ޖަމިއްޔާތަކުން ވެސް އެކަމަށް ފާޑު ކިޔެވެ.
އެމްޓީސީސީއާ އެކު ސަރުކާރުން ހަވާލު ކޮށް ސޮއިކުރި އެއްބަސްވުމުގެ ދަށުން ކުރާނެ އެއް މަސައްކަތަކީ 16.7 ހެކްޓަރުގެ ބިން ހިއްކުމެވެ. އެއާއެކު ދެކޮމަންޑޫ ގުޅައިލާ އަޅާ ފާލަމުގެ ދިގުމިނުގައި 200 މީޓަރުގެ (656.1 ފޫޓްގެ) ފާލަމުގެ ފުޅާ މިނުގައި ހުންނާނީ 9.6 މީޓަރު (31.4 ފޫޓު) އެވެ. އެ ފާލަން ގޮސް ގުޅޭނީ ދެކޮމަންޑޫގެ ވެސް ހިއްކި ބިމާ އެވެ.
ގުޅައިލާ ސަރަހައްދާއި ހިއްކާ ސަރަހައްދު ހިމާޔަތްކުރަން 1520 މީޓަރުގެ ބޮޑުހިލައިގެ ތޮށްޓަކާއި 353 މީޓަރުގެ ބޮޑުހިލައިގެ ފައިކަށި ޖެހުން ވެސް އެ މަޝްރޫއުގައި ހިމެނެ އެވެ. މަތިކޮމަންޑޫގެ ގޮނޑުދޮށް ހިމާޔަތްކުރަން ޖަހާނީ 112 މީޓަރުގެ ޖިއޯ ބޭގް ތޮށްޓެކެވެ.
