ޓީޗަރުންގެ އައިޑެންޓިޓީ ޔަގީންވާން ޖެހޭ ކަމަށާއި އެކަމަކު އެގޮތަށް ވާހަކަ ދައްކާމީހުން ދީނުން ބޭރުވެފައިވާ ބައެެއް ކަމަށް ސިފަކުރާ ސިފަކުރުމާއި މެދު ކަންބޮޑުވާ ކަމަށް ވެރިކަން ހިންގާ އެމްޑީޕީން މިއަދު ބުނެފި އެވެ.
އެމްޑީޕީން ނެރުނު ބަޔާނެއްގައި ބުނީ ދިވެހި މުޖުތަމައުގެ މައިންބަފައިންނާއި ބެލެނިވެރިންނާއި ދަރިވަރުންގެ ގިނަ ބަޔަކީ، އެ ދަރިވަރުންނަށް ސްކޫލު މަދަރުސާތަކުގައި އުނގަންނައިދެއްވުމަށް މުދައްރިސުން ކުރިމަތިލާއިރު އެ މުދައްރިސުން މޫނު ބުރުގާއިން މޫނު ނުފޮރުއްވައި ނުވަތަ އެއީ ކޮންބޭފުޅުންނެއްކަން ދަރިވަރުންނަށް ރަނގަޅަށް ސާފުވާގޮތަށް ތިއްބެވުމަށް ބޭނުންވާ ބައެއް ކަމަށެވެ.
ރާއްޖޭގައި ޒަމާނުއްސުރެ އާދަކާދަ އޮތީ އެގޮތަށް ކަމަށާއި ސްކޫލްތަކުން އެ އާދަ ނަގަހައްޓަމުން އައިސްފައިވާ ކަމަށް ވެސް އެ ބަޔާނުގައި ބުންޏެވެ.
"...ސްކޫލު މަދަރުސާތަކަކީ ދަރިވަރުންގެ މަސްލަހަތު ނަގަހައްޓަންޖެހޭ އަދި ދަރިވަރުންނަށް ރައްކާތެރިކަން ވެސް އޮންނަންޖެހޭ ވަކި ހާއްސަ ތަންތަންކަމަށް ވާއިރު، ކިޔަވާދެއްވުމަށް ދަރިވަރުންނާ ބައްދަލުކުރައްވާއިރު މުދައްރިސުންގެ އައިޑެންޓިޓީ ޔަގީންވާންޖެހޭނެކަމަށް މި ޕާރޓީން ދެކެން،" އެމްޑީޕީގެ ބަޔާނުގައި ބުންޏެވެ.
އެކަމަކު އެގޮތަށް ވާހަަ ދައްކާ މީހަކީ ދީނުން ބޭރުވެ، ލޭހުއްދަވެގެންވާ މީހެއް ކަމަށް ސިފަކުރާތީ ކަންބޮޑުވާ ކަމަށް ވެސް އެ ބަޔާނުގައި ބުންޏެވެ. މީގެ ކުރިން ވެސް އެގޮތަށް ސިފަކޮށް، މީހުންގެ ހަށިފުރާނަ ނައްތާލައި ގެއްލުން ދީފައިވާކަން ފާހަގަކުރެވޭ ކަމަށް ވެސް އެމްޑީޕީގެ ބަޔާނުގައި ބުންޏެވެ.
"...އެހެންކަމުން، އެފަދަ ކުށްތަކުގެ މައްސަލަތައް ބެއްލެވުމުގައި އިތުރަށް ސަމާލުވުމަށް ދައުލަތުގެ ކަމާބެހޭ ފަރާތްތަކަށް މި ޕާރޓީން ގޮވާލާގޮވާލުން ތަކުރާރުކުރަން،" އެ ބަޔާނުގައި ބުންޏެވެ.
ސްކޫލްތަކުގައި ކިޔަވައިދޭ ޓީޗަރުން މޫނު ބުރުގާ އެޅުން މަނާކުރަން ބައެއް މީހުން ވާހަކަ ދައްކާ އިރު، އިންސާނީ ހައްގުތަކަށް މަސައްކަތްކުރާ ބައިނަލް އަގުވާމީ ޖަމާއަތްތަކުން މީގެ ކުރިން ވަނީ އެ ފިޔަވަޅު ނާޅަން ގޮވައިލައިފަ އެވެ. މޫނު ބުރުގާ އެޅުން މަނާކޮށް، ސްވިޒަލޭންޑްގައި މިދިޔަ އަހަރު ތައާރަފްކުރި ގަވައިދަކާ ދެކޮޅަށް އެމްނެސްޓީ އިންޓަނޭޝަލް އިން އޭރު ބަޔާނެއް ނެރުނެވެ.
އެ ބަޔާނުގައި ބުނީ މޫނުބުރުގާ އެޅުން މަނާކުރުމަކީ އަންހެނުންނަށް މިނިވަންކަން ދިނުން ކަމަކަށް އެއްވެސް ގޮތަކުން ސިފަނުުކުރެވޭނެ ކަމަށެވެ.
"އޭގެ ބަދަލުގައި އެއީ އަންހެނުންގެ ހައްގުތައް ނަގައިލާ ނުރައްކާތެރި ސިޔާސަތެކެވެ. ހިޔާލު ފާޅުކުރުމުގެ މިނިވަންކަމުގެ ހައްގާއި ދީނީ މިނިވަންކަމުގެ ހައްގު އޭގެ ތެރޭގައި ހިމެނެ އެވެ،" އެމްނެސްޓީން އޭރު ނެރުނު ބަޔާނުގައި ބުންޏެވެ.
