ބެނާތަކާއި ދިދަތަކާއި އެކި ޝުއޫރު ފާޅުކޮށްފައި ހުރި ފޮތިތަކުން، އެކީ އެކައްޗަކަށް މި ރަށުގެ ބަނދަރުމަތި އޮތީ ރީނދޫކޮށްލައިފަ އެވެ. ރަށަށް އަންނަ މެހެމާނުންނަށް މަރުހަބާ ކިޔުމަށް ރައްޔިތުން ތިބީ ދިގު ސަފެއް ހަދައިގެންނެވެ. އެ އެންމެން ތިބީ މެހެމާނުންނާ ސަލާމްކޮށް، ވާހަކަ ދައްކައިލަން ކެތްމަދުވެފައި، އެހާމެ ބޮޑު ސިޔާސީ ފޯރިއެއްގަ އެވެ.
އެ ސަރަހައްދުގައި ބަހައްޓާފައި ހުރި ސްޕީކަރުތަކުން މުޅި ހިސާބަށް ގުގުމާލާފައި ހުރީ ފެންތަށި ހަލީލުގެ "ކުދި ޖަޒީރާތަކޭ ދިރިއުޅޭ" މި ލަވަ އެވެ. މިތަނުގައި އެހެން ޕާޓީއެއްގެ ނިޝާނެއް ނެތެވެ. ނ. މަނަދޫ މިއޮތީ "އެމްޑީޕީއަށް ގޮސް ހުސްވެފަ" އެވެ. އެއީ އެރަށަށް މީގެ ތިން އަހަރު ކުރިން 2018 ގައި ކުރި ދަތުރުގެ ހަނދާން އާކޮށްލުމުން، ބޮލަށް ސިފަވާ މަންޒަރެވެ.
ރިޔާސީ އިންތިހާބުގެ ކެމްޕެއިނުގައި ރާއްޖޭގެ 100 އަށް ވުރެ ގިނަ ރަށަށް، އެމްޑީޕީގެ އޭރުގެ ރިޔާސީ ކެންޑިޑޭޓްގެ ގޮތުގައި ރައީސް އިބްރާހީމް މުހައްމަދު ސޯލިހު ކުރެއްވި ދަތުރުފުޅުގައި ފެނުނީ އެ މަންޒަރެވެ. އެ ދުވަހު ކުރެއްވި ކެމްޕޭން ކާމިޔާބުކުރައްވައި، ރައީސުލް ޖުމްހޫރިއްޔާގެ ހައިސިއްޔަތުން އިއްޔެ މިރަަށަށް ވަޑައިގެންނެވި އިރު، ހީކުރެވުނީ ބަނދަރުމަތީގައި އޭރަށް ވުރެެ ވެސް ބައިބޯވާނެ ކަމަށެވެ. ނަމަވެސް ކަންތައް ދިމާވީ އެހެނެއް ނޫނެވެ.
ރައީސް ސޯލިހަށް މަރުހަބާ ދެންނެވުމަށް ބަނދަރުގައި އޮތް ސަފު ކުރެވެ. އެމަނިކުފާނާއެކު ސެލްފީ ނެގި މީހުން މަދެވެ. ރަށަށް ބަނދަރުކުރެއްވުމަށްފަހު، ރަށު ތެރޭގައި ރައީސް ވެސް ވަޑައިގެންނެވީ ކުރީ ފަހަރަށް ވުރެ އަވަސް ހިންގެވުމެއްގަ އެވެ. އެންމެ ފުރަތަމަ ހީކުރީ ކޮވިޑް-19 ގެ ބަލިމަޑުކަމުގެ ސަބަބުން ވީ ގޮތެއް ކަމަށެވެ. ނަމަވެސް ކަންވީ ގޮތް ކޮންމެވެސް ވަރަކަށް އޮޅުން ފިލި އިރު މުޅިން "ކޮވިޑަކަށް ކެނޑޭކަށް" ވެސް ނެތެވެ.
ރައްޔިތުންގެ ޝަކުވާ ގިނަވެފައި، ސީރިއަސް
މަނަދޫ ސްކޫލްގައި އެރަށު ރައްޔިތުންނާ އެކު ރައީސް ބޭއްވެވި ބައްދަލުވުމުގައި ބައިވެރިވި ބައެއް މީހުންގެ ގިނަ ޝަކުވާތަކެއް ހުއްޓެވެ. ރައީސް ވިދާޅުވީ ރައްޔިތުން ބޭނުން ކޮންމެ ވާހަކައެއް ހިއްސާކުރެވޭނެ ކަމަށެވެ.
"މަޝްރޫއެއް ހިނގާ ގޮތް ލަސްވިޔަސް، މަޝްރޫއެއް ހިނގާ ގޮތް ބަދަލުކުރަން ބޭނުންވިޔަސް އަދި ކުރިއަށް ހުރި މަޝްރޫއެއް، ނޫނިއްޔާ ތިޔަ ބޭފުޅުން ބޭނުންފުޅުވެވަޑައިގަންނަވާ ކަމެއް އޮތިއްޔާ އަޅުގަނޑުމެންނާ ހިއްސާކޮށްލެއްވިއްޔާ ކުރިއަށް އޮތް ތަނުގައި ފަސޭހަ ވެގެން ދާނެ،" އެމަނިކުފާނު ވިދާޅުވި އެވެ.
އެހެންވެ، ރައްޔިތުން އެމީހުންގެ ޝަކުވާ ރައީސްގެ އަރިހަށް ބަންޑުކޮށްލި އެވެ. ކަރަންޓާއި ނަރުދަމާގެ ހިދުމަތް ނުލިބޭ ބަޔަކު އެރަށުގައި އެބަ ތިއްބެވެ. އެކަމުގެ ޝަކުވާ އުފުލި އެވެ. ރަށުގެ ހޮސްޕިޓަލަކީ ފެންވަރު ދަށް އަދި ހިދުމަތްތައް ވެސް މަދު ތަނެކެވެ. އެކަން ވެސް ރައީސްގެ ސަމާލުކަމަށް ގެނަ އެވެ. އިރުވައި މޫސުމުގައި ގަދަވެއްޖެއްޔާ ރަށުން ފުރުމަކީ އާދައިގެ ކަމެއް ނޫނެވެ. އޭގައި އޮތް ނުރައްކާ ރަށު ރައްޔިތުން ރައީސަށް ކިޔައިދިނެވެ.
"ނަރުދަމާއާ ކަރަންޓުން މަހުރޫމް ވެފައި ތިބި ބަޔަކު މިރަށުގައި އެބަ އުޅޭ. މިދިޔަ މަހު އެކަނި، ޝިޔާމް ވޯލްޑުން ތިން މީހުން މަރުވެގެން މިތަނަށް ގެނައި، [އެކަމަކު މިތާ މޯޗަރީއެއް ނެތް]،" އެމްޑީޕީގެ ހަރަކާތްތަކުގައި ކުރިން އިސްކޮށް ހަރަކާތްތެރިވި ހަސަން ޝިޔާމް، ރަށުގެ ހާލަތު ރައީސަށް އޮޅުންފިލުވައިދެމުން ބުންޏެވެ.
މަނަދޫގައި އަލަށް އާބާދުވި ސަރަހައްދަށް ކަރަންޓާއި ނަރުދަމާ ގުޅައިދޭނެ ތާރީހެއް ފެނަކައިގެ މެނޭޖިން ޑިރެެކްޓަރު އަހުމަދު ސައީދު ވަނީ މަނަދޫ ރައްޔިތުންނަށް ކުރިން ދެއްވައިފަ އެވެ. އެކަމަކު އެކަން ނުވެ، އެ ގެތައް ވީރާނާ ވަމުންދާ ކަމުގެ ޝަކުވާ، ސައީދު ވެސް ރައީސް އަރިހުގައި ހުންނަވަނިކޮށް ރައްޔިތުން އުފުލި އެވެ.
"އަޅުގަނޑަށް ވެސް އެނގޭ ބައެއް ކަންތައްތައް ހުއްޓުން އަރާފައި ހުރިކަން،" ރައްޔިތުންގެ ޝަކުވާ އެއްސެވުމަށްފަހު ރައީސް ވިދާޅުވި އެވެ.
މަނަދޫގައި މިހާރު ހުއްޓިފައި ހުރި މަޝްރޫއުތައް ކުރިއަށް ގެންދެވޭނެ ގޮތެއް ހޯއްދަވާނެ ކަމަށް ރައީސް ވައުދުވެވަޑައިގެންނެވި އެވެ.
ހޮސްޕިޓަލުގެ ފެންވަރު މަތި ނުވުމުގެ ޝަކުވާއަށް ޖަވާބު ދެއްވަމުން ހެލްތު މިނިސްޓަރު އަހުމަދު ނަސީމް ވިދާޅުވީ މަނަދޫގައި 50 އެނދުގެ އާ ހޮސްޕިޓަލެއް ސަރުކާރުން އަޅާނެ ކަމަށެވެ. މިހާރު ހުރި ހޮސްޕިޓަލަށް ވެސް ގިނަ ބަދަލުތަކެއް ގެނެސްފައިވާކަން މިނިސްޓަރު ފާހަގަ ކުރެއްވި އެވެ.
"އިރާދަކުރެއްވިއްޔާ 2023 ނިމުމުގެ ކުރިން އަޅުގަނޑުމެންނަށް އެ ހޮސްޕިޓަލް ނިންމައިލެވޭނެ،" ނަސީމް ވިދާޅުވި އެވެ.
"ލީޑަޝިޕްގެ އަޅައިލުމެއް ނެތް، ޕާޓީއެއް ނުހިންގޭ"
މަނަދޫ ރައްޔިތުންނާ އެކު އަތޮޅު މަދަރުސާގައި ބޭއްވި ބައްދަލުވުމަށް ފަހު ރައީސް ބައްދަލުކުރެއްވީ އެމްޑީޕީގެ ހަރަކާތްތެރިންނާ އެވެ. އަތޮޅުގޭގައި ބޭއްވި އެ ބައްދަލުވުމަށް ދިޔައީ ތިރީހަކަށް މީހުންނެވެ. އެމީހުންގެ ވެސް މައިގަނޑު ޝަކުވާ އަކީ ސަރުކާރުން މަނަދޫގައި ފެށި ގިނަ މަޝްރޫއުތައް ހުއްޓިފައި ހުރުމެވެ. ޕާޓީގެ ހަރަކާތްތައް ހިންގުމަށް ލީޑަޝިޕްގެ އެހީތެރިކަން ނެތުމާއި ހަރަކާތްތެރިންނަށް ވަޒީފާ ނުލިބުމުގެ ޝަކުވާ ވެސް އޮތެވެ.
"ހަރުގޭގައި ހުރި ސައުންޑް ސިސްޓަމް ތަކުގެ ތެރޭގައި ވެސް ނެތް ރަނގަޅަކަށް އެއްވެސް އެއްޗެއް،" ބައްދަލުވުމުގެ ބައިވެރިއަކު ރައީސަށް ދެންނެވި އެވެ.
އޭނާ ބުނީ ޕާޓީ ވަރުގަދަކުރަން ކުރަން ޖެހޭ މަސައްކަތަށް ލީޑަޝިޕްގެ އެއްބާރުލުމެއް ނުލިބޭ ކަމަށެވެ.
އެހެން މެމްބަރަކު ބުނީ ޕާޓީގެ އިސް ދެލީޑަރުން (ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ރައީސް އިބްރާހީމް މުހައްމަދު ސޯލިހު) އާ ދެމެދު މައްސަލަތަކެއް އުޅޭ ކަމަށް ވާހަކަ ފެތުރޭ ކަމަށާއި އެކަން ރައީސް ސާފުކޮށްދެއްވަން ޖެހިވަޑައިގަންނަވާ ކަމަށެވެ. ރައީސް ވިދާޅުވީ އެމަނިކުފާނާ ނަޝީދާ ދެމެދު އެެއްވެސް މައްސަލައެއް އޮތް ކަމަށް ގަބޫލުނުކުރައްވާ ކަމަށެވެ.
ރައީސާއި ޕާޓީ (އެމްޑީޕީ) އާ މުޅިން ވަކިވެގައިވާ ކަަމަށް ސިފަވާ ކަހަލަ ވާހަކަ ދެކެވޭ ކަމަށާއި އެކަން ވެސް ޕާޓީގެ މެމްބަރުންނަށް ސާފުވާންޖެހޭ ކަމަށް ހަރަކާތްތެރިއަކު ބުންޏެވެ.
"އެހެންވީމާ ރައީސް ކޮންމެވެެސް ވަރަކަށް އަޅުގަނޑުމެން މެމްބަރުންނަށް އެބަ ވިދާޅުވެ ދެއްވަން ޖެހޭ ކިހިނެތްކަން މި ވަނީ،" އޭނާ ބުންޏެވެ.
ރައީސް ވިދާޅުވީ އެމަނިކުފާނާއި ޕާޓީއާ އެއީ "ދޭއްޗެއް ނޫން" ކަމަށެވެ.
މަނަދޫގައި ރައީސް ބޭއްވި ބައްދަލުވުންތަކަށް ދިޔަ ރައްޔިތުން މަދުވީ، އެއީ އިންތިޒާމްކޮށްފައި އޮތް ގޮތްތޯ އިސް ފަރާތަކާ ސުވާލުކުރުމުން ވިދާޅުވީ "މީހުން ހަމަ މަދީ" ކަމަށެވެ. އެއީ ފެށި ޕްރޮޖެކްޓްތައް ހުއްޓިފައި ހުރީމާ ކަމަށް ވެސް އޭނާ ވިދާޅުވި އެވެ.
"މިރަށުގައި ސަރުކާރުން ފެށި ގިނަ މަޝްރޫއުތައް ކުރިއަަކަށް ނުދޭ. އެއީ މައްސަލައަކީ. އެހެން ކަމެއް ނެތް" އޭނާ ވިދާޅުވި އެވެ.
ރައީސާއި އެމަނިކުފާނުގެ އަރިހުގައި ވަޑައިގެންނެވި މިނިސްޓަރުންނާއި ކުންފުނިތަކުގެ ވެރިން، ވިދާޅުވީ އެ މަޝްރޫއުތައް ކުރިއަށް ގެންދާނެ ގޮތެއް ހޯއްދަވާނެ ކަމަށެވެ. އެމަނިކުފާނުގެ އަރިހުގައި ވަޑައިގެންނެވީ ޕްލޭނިން މިނިސްޓަރު މުހައްމަދު އަސްލަމާއި ހެލްތު މިނިސްޓަރު އަހުމަދު ނަސީމާއި އިސްލާމިކް އެފެއާޒް މިނިސްޓަރު ޑރ.އަހުމަދު ޒާހިރެވެ. އެމްޓީސީސީގެ ސީއީއޯ އާދަމް އާޒިމާއި ފެނަކަ ކޯޕަރޭޝަނުގެ މެނޭޖިން ޑިރެެކްޓަރު އަހުމަދު ސައީދު ވެސް ވަޑައިގެންނެވި އެވެ.
