މިދިޔަ އަހަރުގެ އޭޕްރީލް މަހު ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ ރައީސް ކަމަށް މުހައްމަދު ރަނޭޝް (ރަނޭ) އިންތިހާބުވުމަށް ފަހު އެ އެސޯސިއޭޝަން ކުރިއަށް ގެންދިއުމުގައި އެންމެ ބޮޑަށް ބަދަލުތަކެއް ގެންނަން ވިސްނީ ގައުމީ ވޮލީބޯޅަ ޓީމުތަކަށެވެ.
އެ ގޮތުން ގައުމީ ވޮލީބޯޅަ ޓީމަށް ކުޅުންތެރިން ފޯރުކޮށްދޭނެ ހަރުދަނާ ސިސްޓަމެއް ބޭއްވުމުގެ ގޮތުން ޒުވާން ސްކޮޑެއް އެކުލަވާލައި، ވޮލީބޯޅައިގެ އެކްސެލަންސް ޕްރޮގްރާމެއް ފެށި އެވެ. އަދި އެ ޕްރޮގްރާމްގެ ތެރެއިން އެންމެ ރަނގަޅު ކުޅުންތެރިންނަށް އަބަދުވެސް ގައުމީ ސީނިއާ ޓީމުން ޖާގަ ލިބޭ ގޮތަށް އޮންނަ އުސޫލެއް ކަނޑައެޅި އެވެ.
އެ އުސޫލުގެ ތެރެއިން މި ފަހަރުގެ ސެންޓްރަލް ޒޯން ވޮލީބޯޅަ މުބާރާތަށް ނެގި ސީނިއާ ވޮލީޓީމުގެ ސްކޮޑުން ތިން ޒުވާން ކުޅުންތެރިންނަށް ފުރުސަތު ދިނެވެ. އެ ތިން ކުޅުންތެރިންނަކީ މާއިޝް އަހުމަދު، އަހުމަދު ނާފިއު އަދި ޝާމިލް މުހައްމަދު އެވެ.
"ހަގީގަތުގައި ދިވެހިރާއްޖޭގެ ތާރީހުގައި ވެސް އެންމެ ޖޫނިއާކޮށް ގައުމީ ޓީމަށް ތިން ކުޅުންތެރިއަކު އެރި ފުރަތަމަ ފަހަރު މިއީ. އެންމެ ޖޫނިއާކޮށް އެރި ކުޅުންތެރިއަކީ މާއިޝް. މާއިޝް އަކީ 17 އަހަރު. އެއީ ފުރަތަމަ ފަހަރަށް 17 އަހަރުގެ ކުޅުންތެރިއަކު ނެޝަނަލް ޓީމެއްގައި މި ހިމެނީ ވެސް،" ސެންޓްރަލް ޒޯން މުބާރާތަށް ތައްޔާރުވުމަށް މާލޭގައި ހައިދަރުއާބާދު ސްޕައިކާސްއާ ދެކޮޅަށް ކުޅުނު ފުރަތަމަ މެޗަށް ފަހު ދިން އިންޓަވިއުގައި ގައުމީ ވޮލީ ޓީމުގެ ކޯޗަކަށް ހުރި މުހައްމަދު ސާޖިދު (ކާއްޓޭ) ބުންޏެވެ.
އުމުރުން 17 އަހަރުގެ މާއިޝް އަކީ 19 އަހަރުން ދަށުގެ ކެޓަގަރީގެ ބީޗް ވޮލީ ޗެމްޕިއަނެކެވެ. އަދި 23 އަހަރުގެ ޗެމްޕިއަންކަން ހޯދީ ނާފިއު، 19، އާއި ޝާމިލް، 20، ގެ ޕެއާ އިންނެވެ. މާއިޝް އާއި ޝާމިލް އަކީ ސްޕައިކަރުންނެވެ. އަދި ނާފިއު ކުޅެނީ ސެންޓަ އަށެވެ.
"ކުރިއަށް އޮތް އަހަރެއްހާ ދުވަސް ތެރޭގައި އެ ތިން ކުދިންނަށް ނެޝަނަލް ފުލް ހައެއްގައި ކުޅުމުގެ ފުރުސަތު އެބައޮތް. މި ވަގުތަށް އެ ތިން ކުޅުންތެރިން ނަގާފައި އެ ތިބީ ރާއްޖޭގެ މުސްތަގުބަލަށް. ވަރަށް މުހިއްމު މި ޓީމާ އެކީ އެ ތިން ކުޅުންތެރިން އުޅުން. އެކްސްޕީރިއަންސް ކުރުން،" ކާއްޓޭ ބުންޏެވެ.
ސެންޓްރަލް ޒޯނަށް ތައްޔާރުވާން މާލޭގައި ސްރީ ލަންކާ އާއި ހައިދަރުއާބާދު ސްޕައިކާސްއާ ދެކޮޅަށް ކުޅުނު މެޗުތަކުގައި މާއިޝް އާއި ޝާމިލަށް ކުޅުމުގެ ފުރުސަތެއް ނުލިބުނު ކަމުގައި ވިޔަސް ނާފިއު ވަނީ ކޮންމެ ވެސް ވަރަކަށް ބޭނުންކޮށްފަ އެވެ. ބަންގްލަދޭޝްގައި ބޭއްވި މުބާރާތުގައި ތިން ކުޅުންތެރިންނަށް އެންމެ ރަނގަޅަށް ފުރުސަތު ދިނީ ލަންކާއާ ދެކޮޅަށް ކުޅުނު މެޗުގަ އެވެ. އެ މެޗުގައި މާއިޝް، ނާފިއު އަދި ޝާމިލް ވެސް ވަނީ މުބާރާތެއްގެ ޕްރެޝަރުގައި ފުރަތަމަ ފަހަރަށް ކުޅެފަ އެވެ. ރާއްޖެ އެ މެޗުގައި 3-1 ސެޓުން ބަލިވި ކަމުގައި ވިޔަސް އެއީ ޒުވާން ކުޅުންތެރިންނަށް ކުޅެލަން ލިބުނު ލެވަލް މަތި މެޗަކަށްވާތީ ކުރިއަށް އޮތްތަނުގައި އެ ތަޖުރިބާގެ ބޭނުން އެ ކުޅުންތެރިންނަށް ހިފޭނެ އެވެ.
"މިހެން ލިބޭ މެޗުތަކުގައި ކިރިޔާ ވެސް ފުރުސަތެއް ލިބިއްޖިއްޔާ އެ ޕްރެޝަރު ހޭންޑަލް ކުރަން ފުރުސަތު ދިނުން ވެސް ވަރަށް މުހިއްމު. މިހާރުން ފެށިގެން ހަގީގަތުގައި ކުރިން އެ ޗާންސް ނުލިބި ކުޅުންތެރިންނަށް ހުރުމުގެ ސަބަބުން ޕްރެޝަރު މެޗުތަކުގައި އެ މައްސަލަ ދިމާވަނީ،" ކާއްޓޭ ބުންޏެވެ. "އަޅުގަނޑު ބޭނުންވީ ކުޅުންތެރިންނަށް އެ އެކްސްޕީރިއަންސާއި އެ ޕްރެޝަރު ދީގެން ނެޝަނަލް ޓީމަށް ތައްޔާރުކުރާ ކުޅުންތެރިއެއްގެ ގޮތުގައި ހަދަން،"
ސެންޓްރަލް ޒޯން އަށް ފަހު ވީއޭއެމްގެ ރައީސް ރަނޭ، ޒުވާން ކުޅުންތެރިންނަށް ހިތްވަރު ދެއްވައި، ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައިވަނީ ރާއްޖޭގެ ޒުވާން ވޮލީބޯޅަ ކުޅުންތެރިންގެ ގައިގައި ހުނަރު އެބަހުރި ކަމަށާއި ކުރިން ކަންތައްތައް ކުރަމުން އައި ގޮތްތައް ދޫކޮށްލައި ޒުވާން ކުޅުންތެރިން ގޮވައިގެން ދިއުމުގެ ހިތްވަރު އޮންނަން ޖެހޭނެ ކަމަށެވެ.
ސެންޓްރަލް ޒޯން މުބާރާތަށް ފަހު އަންހެން އަދި ފިރިހެން ގައުމީ ޓީމުގެ ކޯޗިން ސްޓާފުންގެ މަސައްކަތް މި ވަގުތަށް ނިމުމަކަށް އައީ ކަމަށް ޓީމާ ބައްދަލުކޮށް ވީއޭއެމްގެ ރައީސް ރަނޭޝް ވަނީ ވިދާޅުވެފަ އެވެ.
ގައުމީ ޓީމުތަކަށް ބިދޭސީ ކޯޗުން ހަމަޖެއްސުމުގެ ކަންކަން ފައިނަލް ކުރުމުގެ މަސައްކަތް ވީއޭއެމުން ކުރަމުން އަންނައިރު، ދެން ހަވާލުވާ ބިދޭސީ ކޯޗަކު ވެސް ކުރިއަށްދާނީ އެސޯސިއޭޝަނުގެ ވިސްނުމާ އެއްގޮތަށް ނަތީޖާ ނެރުމާއި ކުޅުންތެރިން އުފެއްދައި ފުރުސަތު ދިނުމުގެ ކަންކަން އެކުއެކީގަ އެވެ.
މާނަ އަކީ ދެން ހަވާލުވާ ކޯޗަކަށް ވެސް ނަތީޖާ ނެރުމެކޭ އެއްގޮތަށް މާއިޝް، ނާފިއު އަދި ޝާމިލް ފަދަ އަރަމުން އަންނަ ކުޅުންތެރިންގެ ބޭނުންހިފުމުގެ ޒިންމާ އޮންނާނެ އެވެ.
