އިދިކޮޅު ޕީޕީއެމްޕީގެ ފަރާތުން އިންތިޒާމްކޮށްގެން ކުރިއަށްގެންދާ "އިންޑިއާ އައުޓް" ކެމްޕެއިނަކީ ސިޔާސީ ބޭނުމެއްގައި، ގައުމުގެ މަންފާއަށް ބެލުމެއް ނެތި ހިންގާ ހަރަކާތެއް ކަމަށް ސަރުކާރު ކޯލިޝަންގައި ހިމެނޭ ޖުމްހޫރީ ޕާޓިން މިއަދު ބުނެފި އެވެ.
އިންޑިއާ ސިފައިން ރާއްޖޭގައި ތިބުމާ ދެކޮޅަށް އިދިކޮޅުން ހިންގާ ހަރަކާތް ކުށްވެރިކޮށް، ރައްޔިތުންގެ މަޖިލީހުގެ މާމިނގިލީ ދާއިރާގެ މެމްބަރު ގާސިމް އިބްރާހިމްގެ ޖޭޕީން މިއަދު ނެރުނު ބަޔާނެއްގައި ބުނީ ބައިލެޓްރަލް ގުޅުންތަކުގެ ތެރެއިން ވެފައިވާ އެއްބަސްވުންތަކުގެ ދަށުން އެކި އެކި ބޭނުންތަކަށް، އެއްގައުމުގެ ސިފައިން އަނެއް ގައުމުގައި ވަކި މުއްދަތަކަށް ތިބުމަކީ ދެފަރާތަށް ވެސް ފައިދާހުރި ގޮތެއް ކަމަށެވެ.
އެގޮތަށް ބިދޭސީ ގައުމުތަކުގައި ސިފައިން ތިބެނީ ތަމްރީނުތަކާއި ތައުލީމާއި ހުނަރު އިތުރުކުމުގެ ބޭނުމުގައި ކަމަށް ޖޭޕީގެ ބަޔާނުގައި ބުނެފައިވެ އެވެ.
ބަޔާނުގައި އެ ޕާޓީން ބުނީ ކާރިސާތަކުން ސަލާމަތްވުމަށް ކުރިއަށް ގެންދާ ހަރާކާތްތަކާއި ހާލުގައި ޖެހޭ ފަރާތްތަކަށް އެހީވާން ހިންގާ ހަރަކާތްތަކާއި ދެގައުމުގެ ސަލާމަތާއި ގުޅިފައިވާ ބޯޑަރު ބެލެހެއްޓުން ފަދަ ކަންތައްތަކަށް ސިފައިން ތިބުމަކީ ވެސް ދެފަރާތަށް ފައިދާވާނެ ކަންތައް ކަމަށެވެ.
"...މިއީ ދުނިޔޭގެ އެކި ކަންކޮޅުތަކުގައި، ދޭދޭ އަދި ސަރަޙައްދީ ފެންވަރުގައިވެސް ކުރިއަށް ގެންދެވޭ ގުޅުންތަކެއް ކަމަށް ދުނިޔޭގެ ގިނަ ގައުމުތައް ވަނީ ބަލައިގެންފަ. އަދި އަމުދުން މިފަދަ ބޭނުމަކު ހަތިޔާރު ނުލައި ޔުނީފޯމުގައި އެހެން ގައުމެއްގެ ސިފައިން ހަރަކާތްތެރި ވުމަކީ މިލިޓަރީ ހަރަކާތެއްކަމަށް ސިފަކުރުމަކީ ގިނަ ފަހަރަށް އިދިކޮޅު ޕާޓީތަކުން އެވަގުތެއްގައި ވެރިކަމުގައި ތިބޭ ބަޔަކާއި ދެކޮޅަށް ސިޔާސީ ބޭނުމަށް ކޮށްއުޅޭ ކަމެއް،" އެ ބަޔާނުގައި ބުނެފައިވެ އެވެ.
ރާއްޖޭގައި އިންޑިއާ ސިފައިން ތިބުމާ ދެކޮޅަށް އިދިކޮޅުން ފެށި ކެމްޕޭނަށް، ސަރުކާރު ހިންގާ ކޯލިޝަނުގެ ޕާޓީތަކުން ބޮޑަށް ފާޑުކިޔަން ފެށީ، ކުރީގެ ރައީސް އަބްދުﷲ ޔާމީނު އެހަރަކާތުގައި އިސްކޮށް އުޅުއްވަން ފެށްޓެވި ހިސާބުންނެވެ. އެ ހަރަކާތާ ދެކޮޅަށް އެންމެ ފުރަތަމަ އަޑު އުފުލަން ފެށީ ވެރިކަން ކުރާ ކޯލިޝަނުގެ މައި ޕާޓީ އެމްޑީޕީންނެވެ. އޭގެ ފަހުން އަދާލަތު ޕާޓީން ވެސް ވަނީ އެހަރަކާތް ކުށްވެރިކޮށްފަ އެވެ.
