މޯލްޑިވްސް ނެޝަނަލް ޕާޓީ (އެމްއެންޕީ)ގެ ހާރީޖީ ސިޔާސަތު ހާމަކޮށް، ފުރަތަމަ "ހަމަލާ" ޕީޕީއެމް-ޕީއެންސީ ހިމެނޭ އިދިކޮޅު ޕްރޮގްރެސިވް ކޯލިޝަނުން ކުރިއަށް ގެންދާ "އިންޑިއާ އައުޓް" ކެމްޕެއިނަށް ދޫކޮށްލައިފި އެވެ.
އެމްއެންޕީން މިއަދު ބޭއްވި ނޫސްވެރިންގެ ބައްދަލުވުމުގައި، އެ ޕާޓީގެ ރައީސް އަދި ދަނގެތީ ދާއިރާގެ މެމްބަރު މުހައްމަދު ނާޒިމް ވިދާޅުވީ ގައުމީ ހަރަކާތެއްގެ ގޮތުގައި ކަމަށް ބުނެ އިދިކޮޅުން ކުރިއަށް ގެންދާ "އިންޑިއާ އައުޓް" ކެމްޕޭނަކީ ބޮޑު ޖަރީމާއެއް ކަމަށެވެ.
"މިއީ ވަކި ބޭފުޅަކު އެ ބޭފުޅަކު އެ ބޭފުޅެއްގެ ސަރުކާރުގަ ހިނގާފަ ހުރި އެކި ކަންކަން ފޮރުވައި މަތި އަޅަން ހިންގާ ކެމްޕޭނެއް،" ކުރީގެ ރައީސް އަބްދުﷲ ޔާމީނަށް އިޝާރަތް ކުރައްވައި ނާޒިމް ވިދާޅުވި އެވެ.
"މިއީ ގައުމީ ކެމްޕޭނެއް ނޫން. އެމްއެންޕީން ގަބޫލެއް ނުކުރަން އިންޑިއާ އައުޓް ކެމްޕޭނަކީ ގައުމީ ކެމްޕޭނެއް ކަމަކަށް."
ކުރިން ޑިފެންސް މިނިސްޓަރުކަން ކުރެއްވި ނާޒިމް، އިދިކޮޅުގެ އެ ހަރަކާތް ސިފަކުރެއްވީ ރާއްޖޭގެ ހާރިޖީ ސިޔާސަތަށް އޮތް ނުރައްކަލެއްގެ ގޮތުގަ އެވެ. އޭގެ ނޭދެވޭ އަސަރާއި، ގެއްލުން ކައިރި މުސްތަގްބަލެއްގައި ރާއްޖެއަށް ކުރާނެ ކަމަށް އޭނާ ގަބޫލުކުރައްވަ އެވެ.
އެހެންވެ، އިންޑިއާ އައުޓް ހަރަކާތުގައި ބައިވެރިނުވުމަށް އޭނާ އިލްތިމާސްކުރެއްވެވި އެވެ.
ނާޒިމު ވިދާޅުވި ގޮތުގައި ރާއްޖެ އަށް އެންމެ ހެޔޮ ގޮތަކީ ވަކި ގައުމެއްގެ ކޮޅަކަށް ގޮސް ހުސްނުވެ އޮންނަ، ހުރިހާ ގައުމަކަށް ވެސް ހަމަހަމަ ހާރިޖީ ސިޔާސަތެކެވެ. އޭނާގެ ޕާޓީގެ ވެރިކަމެއްގައި ބައްޓަން ކުރާނީ އެފަދަ ހާރިޖީ ސިޔާސަތެއް ކަމަށް ވިދާޅުވި އެވެ.
"ކޮވިޑް ތެރޭގައި އެއް ގައުމަކުން އުނދުހުމުގެ ބަބުލްއެއް ހުޅުވާލި، އޭގެ ސަބަބުން ދިވެހިރާއްޖެއަށް ކިހާ ބޮޑު ނަފާތަކެއްތޯ ލިބުނީ. އަޅުގަނޑުމެންގެ ހުރިހާ ގެސްޓު ހައުސްތަކެއް ފުރިގެން ދިޔަ. އެ ގައުމާއި ދޭތެރޭގައި އޭރު ގުޅުން ނެތް ނަމަ އެ ބަބުލްއެއް ނޯންނާނެ" ކޮވިޑްގެ ދަތި ކަމުގެ ތެރޭގައި ވެސް އިންޑިއާއިން ރާއްޖެ އަށް ފަތުރުވެރިން ޒިޔާރަތްކޮށް ރާއްޖޭގެ އެންމެ ބޮޑު މާކެޓަކަށް އެ ގައުމު ވެފައިވާތީ އެކަމަށް އިޝާރާތްކޮށް ނާޒިމު ވިދާޅުވި އެވެ.
"އިންޑީއާ ސަރުކާރުން އެ ބަބުލް ހުޅުވާލީމަ، އިންޑިއާއިން ފުރައިގެން ދާން އޮތް ގާތްގަނޑަކަށް ބިލިއަނެއްހާ މީހުން (އެހެން ގައުމުތަކަށް) ދާން މިޖެހުނީ ރާއްޖެ މެދުވެރިކޮށް. ރާއްޖޭގެ އެނދެއް (ހުސްކޮށް) ނެތް، ގޭގޭގައި މީހުން ނިންދަވައިގެން އަޅުގަނޑުމެނަށް ނަފާ ލިބިގެން ދިޔަ. އެއީ ދޭދޭ ގައުމުތަކުގެ މެދުގައި ގުޅުން އޮތުމުން އަންނަ ކަންކަން."
ސަރުކާރުން އިންޑިއާ އަށް މާބޮޑަަށް ބަރޯސާވުމަކީ ވެސް ގޯހެއްކަން ނާޒިމް ގަބޫލުކުރެއްވި އެވެ. އޭގެ ސަބަބުން ލިބޭ ހާރިޖީ ގެއްލުންތައް އޭނާ ކިޔައިދިނީ ކުރީ ސަރުކާރުން ގާތް ގުޅުމެއް ބޭއްވި ޗައިނާގެ އެހީ ކޮވިޑްގެ ބަލިމަޑުކަމުގައި ރާއްޖެއަށް ލިބިގެން ނުދާކަން ފާހަގަކުރަމުންނެވެ.
"ދުނިޔެ އެއްކޮށް އޮތީ ބަންދުކޮށް، އެ އޮންނަ އޮތުން އަޅުގަނޑު މި ދަންނަވަނީ ޗައިނާ އާއި ރާއްޖެއާ އޮތް ގުޅުން ރަނގަޅު ނަމަ، ޗައިނާއިން ދިވެހިރާއްޖެ އަށް ފަތުރުވެރިން އައުމުގެ ފުރުސަތު ދިނުން ވަރަށް ގާތޭ،" ނާޒިމް ވިދާޅުވި އެވެ.
ރާއްޖޭގައި ހައުސިންގް މަޝްރޫއު ކުރިއަށް ގެންދިއުމަށް ޗައިނާއިން ދީފައިވާ ލޯންތައްވެސް ކޮވިޑްގެ ތެރޭގައި ހުއްޓިގެން ދިޔައީ ވެސް މި ސަރުކާރުން ޗައިނާއާއެކު ހަރުދަނާ ގުޅުމެއް ބޭއްވިފައި ނެތުމުން ކަމަށް ނާޒިމު ވިދާޅުވި އެވެ.
