މެންޗެސްޓާ (ޑިސެމްބަރު 17) - މެންޗެސްޓާ ޔުނައިޓެޑްގެ ޖަރުމަނު ކޯޗު ރަލްފް ރަންގްނިކް އެދޭތީ އެ ޓީމުން ޗެލްސީގެ ޖަރުމަނު ޑިފެންޑަރު އެންޓޯނިއޯ ރުޑިގާ އަށް ފާރަލަމުން އަންނަ ކަމަށް އިނގިރޭސި މީޑިއާތަކުން ރިޕޯޓްކޮށްފި އެވެ.
އުމުރުން 28 އަހަރުގެ ރުޑިގާ ޗެލްސީގެ ކޮންޓްރެކްޓްގައި ހުރީ މި ސީޒަނުގެ ނިޔަލަށެވެ. ރުޑިގާއާ އެކު ޗެލްސީން ހަދާފައިވާ ކޮންޓްރެކްޓް އާ ކުރަން އެ ކްލަބުން ކުރަމުން އަންނަ މަސައްކަތަށް އަދި އެކަށީގެންވާ ކުރިއެރުމެއް ނުލިބެ އެވެ. އެއީ ރުޑިގާ ކިޔާ މުސާރަ ބޮޑުުވުމުންނެވެ.
ރުޑިގާ މި ވަގުތު ޗެލްސީގެ ކޮންޓްރެކްޓްގައި ހުރީ އަހަރަކު ހަ މިލިއަން ޑޮލަރު ލިބޭ ގޮތަށެވެ. އަލުން ކޮންޓްރެކްޓް އާ ކުރަން ރުޑިގާ ބޭނުންވަނީ މިހާރު ހުރި ކޮންޓްރެކްޓަށް ވުރެ ނިސްބަތުން ބޮޑު މުސާރަ އަކަށްވާތީ ޗެލްސީ އަށް އުޅެނީ އޭނާއާ އެކު އެއްބަސްވުމަކަށް ނާދެވިގެންނެވެ.
ޔުނައިޓެޑްގެ ކޯޗުކަމާ ހަވާލުވުމަށް ފަހު ރަންގްނިކް އެންމެ ކަންބޮޑުވާ ކަންތައްތަކުގެ ތެރޭގައި އެ ޓީމުގެ ޑިފެންސް ހިމެނެ އެވެ. ޔުނައިޓެޑަށް އިނގިރޭސި ޕްރިމިއާ ލީގު ފަރިތަ، އަދި މި ވަގުތަށް ބަލާއިރު، ރަނގަޅު ފޯމެއްގައި ހުރި ޑިފެންޑަރަކު ގެންނަން ބަލާއިރު، ރަންގްނިކް ޝައުގުވެރިވަނީ ރުޑިގާ އަށެެވެ.
ރުޑިގާ ބޭނުންނަމަ އަންނަ މަހު އޭނާ އިހުތިޔާރުކުރާ ކްލަބަކަށް ޕްރީ އެގްރީމަންޓެއްގައި ސޮއިކުރެވޭނެ އެވެ. އެއީ އަންނަ އަހަރު ޖުލައި މަހު އެ ޓީމަކަށް ބަދަލުވެވޭ ގޮތަށެވެ.
ސްޕެއިނުގެ ނޫސްތަކުން ރިޕޯޓްކުރާ ގޮތުގައި ހިލޭ ޓްރާންސްފާއެއްގައި ރުޑިގާގެ ހޯދަން ރެއާލުން ވަނީ އޭނާއާ އެކު އަނގަބަހުން އެއްބަސްވުމަކަށް އަތުވެފަ އެވެ.
ޖަރުމަނުގެ ސްޓުޓްގާޓުން ކެރިއަރު ފަށައި ފަހުން އިޓަލީގެ ރޯމާ އަށް ވެސް ކުޅުނު ރުޑިގާ ޗެލްސީ އަށް ބަދަލުވީ 2017 ވަނަ އަހަރު 40 މިލިއަން ޑޮލަރަށެވެ. ރުޑިގާ ވަނީ ޗެލްސީއާ އެކު ޔުއެފާ ޗެމްޕިއަންސް ލީގާއި ޔޫރޮޕާ ލީގު ކާމިޔާބު ކޮށްފަ އެވެ.
