ބާލިން (ޑިސެމްބަރު 16) - ޖަރުމަނު ލީގުގައި ރޭ އާލިން ބްރައުޓް ހާލަންޑްގެ ދެ ގޯލާ އެކު 3-0 އިން ލީގުގެ ފުލުގައި އޮތް ގްރޮއިޓާ ފޫރުތު ބަލިކޮށް ބޮރޫޝިއާ ޑޯޓްމަންޑުން ލީގުގެ އެއް ވަނައިގައި އޮތް ބަޔާން މިއުނިކާ ދެމެދު އޮތް ފަރަގު ކުޑަކޮށްފި އެވެ.
ރޭގެ މެޗަށް ޑޯޓްމަންޑް ނުކުތްއިރު ބަޔާން އެއް ވަނައިގައި އޮތީ ނުވަ ޕޮއިންޓުގެ ލީޑަކާ އެކު އެވެ. އެކަމަކު، ޑޯޓްމަންޑް މޮޅުވުމުން އެ ލީޑުވަނީ ހަ ޕޮއިންޓަށް ކުޑަވެފަ އެވެ. ބަޔާނަށް 16 މެޗުން 40 ޕޮއިންޓް ލިބިފައިވާއިރު، ޑޯޓްމަންޑަށް ވަނީ 16 މެޗުން 34 ޕޮއިންޓް ލިބިފަ އެވެ. އަދި ރޭ ތިން ވަނައިގައި އޮތް ބެޔާ ލެވަކޫސަނާއި ހަތަރެއްގައި އޮތް ހޮފެންހައިމް ވަނީ 2-2 އިން އެއްވަރުވެފަ އެވެ. ލެވަކޫސަނަށް 16 މެޗުން 28 ޕޮއިންޓް ލިބިފައިވާއިރު، ހޮފެންހައިމަށް ވަނީ 16 މެޗުން 27 ޕޮއިންޓް ލިބިފަ އެވެ.
މެޗުގެ 32 ވަނަ މިނިޓްގައި ޑޯޓްމަންޑުން ލީޑުނެގީ ހާލަންޑް ޖެހި ޕެނަލްޓީންނެވެ. މިއީ ހާލަންޑް ފޮނުވާލި ބޯޅައެއް ގްރޮއިޓާ ކުޅުންތެރިއަކު އަތުގައި ޖެހުމުން ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ދިން ޕެނަލްޓީ އެކެވެ.
ލީޑުފުޅާކުރަން ޑޯޓްމަންޑްގެ މާކޯ ރޮއިސް ފޮނުވާލި ހިލޭ ޖެހުން ގްރޮއިޓާގެ ކީޕަރު ސާޝާ ބޮއިހާޓް ވަނީ މަތަކޮށްފަ އެވެ. ދެ ވަނަ ހާފުގެ ކުރީކޮޅުގައި ގްރޮއިޓާއިން ނަތީޖާ ހަމަހަމަކުރަން ރަނގަޅު ފުރުސަތެއް ތަނަވަސްކުރި ނަމަވެސް އެ ޓީމުގެ ހާވާޑް ނީލްސަން އަށް ގޯލު ޖެހޭގޮތެއްނުވި އެވެ.
މެޗުގައި ދެ ވަނަ ގޯލެއް ޖަަހަން ޑޯޓްމަންޑުން ކުރި މަސައްކަތް ކާމިޔާބުވީ މެޗުގެ 82 ވަނަ މިނިޓްގަ އެވެ. ހޫލިއަން ބްރަންޓް ހިލޭ ޖެހުމަކުން ނެގި ބޯޅަ ހާލަންޑް ވަނީ ބޮލުން ގޯލުގެ ތެރެއަށް ފޮނުވާލައިފަ އެވެ. އުމުރުން 21 އަހަރުގެ ހާލަންޑްގެ މި ގޯލާ އެކު އޭނާ މި ވަނީ މި ފަހަރު ސީޒަނުގައި 15 މެޗުން 19 ގޯލު ޖަަހައިފަ އެވެ. ހާލަންޑް މި ވަނީ ޖަރުމަނު ލީގުގައި މިހާތަނަށް ކުޅުނު 53 މެޗުން 53 ގޯލު ޖަހައިފަ އެވެ.
ޑޯޓްމަންޑްގެ ފަހު ގޯލު ޖެހީ ބަލިވެ، އުޅުމަށް ފަހު ޓީމާ އަލުން ގުޅުނު ނެދަލެންޑްސްގެ ފޯވާޑް ޑޮންޔެލް މާލެން އެވެ. އޭނާ ވަނީ އޭރިއާތެރެއިން ލިބުނު ފުރުސަތުން ބޯޅަ ކޮންޓްރޯލް ކޮށްލާފައި ގޯލުގެ ތެރެއަށް ފޮނުވާލައިފަ އެވެ.
