ސެންޓްރަލް ޒޯން ވޮލީބޯޅަ މުބާރާތަށް ސްކޮޑު ފައިނަލް ކުރިއިރު، ދެ ލިބަރޯ އިން ކަމަށްވާ އަޝްފާގު އާދަމް (އައްކަޅޭ) އާއި ޖަވާމް އަލީ އަދި ސެޓަރަކަށް ކުޅޭ އަހުމަދު ޝިމާއު ބާކީވެއްޖެ އެެވެ.
މި މަހު 23-29 އަށް ބަންގްލަދޭޝްގައި ބާއްވާ ސެންޓްރަލް ޒޯން މުބާރާތަށް ސްކޮޑު ފައިނަލް ކުރީ ލަންކާއާ ދެކޮޅަށް މާލޭގައި ދާދި ފަހުން ކުޅުނު އެކުވެރިކަމުގެ ތިން މެޗަށް ބަލައިގެންނެވެ. އެ މެޗުތަކުގައި ސެޓަރަކަށް ކުޅޭ ޝިމާއު އަށް ފުރުސަތު ނުލިބިދިޔައިރު، ދެ މެޗެއްގައި ފުރަތަމަ ލިބަރޯގެ ގޮތުގައި އައްކަޅޭ ކުޅުނެވެ. އަދި ޖަވާމް ވެސް ވަނީ އެއް މެޗެއްގެ ފަހު ސެޓުގައި ކުޅެފަ އެވެ.
ވީއޭއެމްގެ މިހާރުގެ ލީޑަޝިޕްގެ ވިސްނުމާ އެއްގޮތަށް ވޮލީ ސްކޮޑު ފައިނަލްކުރިއިރު، ޒުވާން ވޮލީބޯޅަ ކުޅުންތެރިން އުފެއްދުމުގެ ޕްރޮގްރާމްގެ ތެރެއިން ސީނިއާ ވޮލީ ޓީމަށް ނެގި ޒުވާން ތިން ކުޅުންތެރިން ވަނީ ފައިނަލް ސްކޮޑުގައި ވެސް ހިމަނައިފަ އެވެ. އެ ތިން ކުޅުންތެރިންނަކީ މާއިޝް އަހުމަދު، އަހުމަދު ނާފިއު އަދި ޝާމިލް މުހައްމަދު އެވެ.
އުމުރުން 17 އަހަރުގެ މާއިޝް އަކީ 19 އަހަރުން ދަށުގެ ކެޓަގަރީގެ ބީޗް ވޮލީ ޗެމްޕިއަނެކެވެ. އަދި 23 އަހަރުގެ ޗެމްޕިއަންކަން ހޯދީ ނާފިއު، 19، އާއި ޝާމިލް، 20، ގެ ޕެއާ އިންނެވެ. މާއިޝް އާއި ޝާމިލް އަކީ ސްޕައިކަރުންނެވެ. އަދި ނާފިއު ކުޅެނީ ސެންޓަ އަށެވެ. ލަންކާއާ ދެކޮޅަށް ކުޅުނު ތިން މެޗަކީ ކުޅުމުގެ ފުރުސަތު ނުލިބުނު ކަމުގައި ވިޔަސް ނާފިއު، ޝާމިލް އަދި މާއިޝް ގައުމީ ޓީމާ އެކު ކުރި ފުރަތަމަ ތަޖުރިބާ އެވެ.
ސެންޓްރަލް ޒޯން މުބާރާތުގެ ފައިނަލް ސްކޮޑު
އަލީ ހުޒާމް (ހުޒަންޓެ)، އިސްމާއިލް ސާޖިދު (ކުޑަކާއްޓެ)، ހުސެއިން ވިސާމް (ބުޅިކެ)، ހަސަން ނިލާމް (ޕާޓޭ)، އާދަމް ފައިރޫޒް، މުހައްމަދު ނައީމް، ޝަމާއިލް ހުސެއިން، ހުސެއިން ޝާހިދު (ޝާޑު)، ޝުއައިބް އަބްދުލް ލަތީފް، އަހުމަދު ނާފިއު، މާއިޝް އަހުމަދު، ޝާމިލް މުހައްމަދު
ކޯޗު މުހައްމަދު ސާޖިދު (ކާއްޓެ)ގެ އިރުޝާދުގެ ދަށުން ސްކޮޑު ފައިނަލް ކުރުމަށް ފަހު ސެންޓްރަލް ޒޯން މުބާރާތަށް ދިއުމުގެ ކުރިން ގައުމީ ވޮލީ ބޯޅަ ޓީމު މާލޭގައި އިންޑިއާގެ ޓީމު، ހައިދަރުއާބާދު ސްޕައިކާސްއާ ދެކޮޅަށް ތިން މެޗެއް ކުޅޭނެ އެވެ. އެއީ 16، 17، އަދި 18 ގަ އެވެ. އެ މެޗުތަކަށް ފަހު ގައުމީ ޓީމު މިހާރު އޮތްގޮތުން ސެންޓްރަލް ޒޯން މުބާރާތަށް ފުރާނީ މި މަހު 19 ވަނަ ދުވަހު އެވެ.
ޓީމުގެ ކެޕްޓަނަކީ އިސްމާއިލް ސާޖިދު (ކުޑަކާއްޓެ) އެވެ.
ސެންޓްރަލް ޒޯން މުބާރާތަށް ތައްޔާރުވާން ގައުމީ ޓީމު ރާއްޖޭން ބޭރުގައި ކޭމްޕެއް ޖެހޭތޯ މަސައްކަތްކުރި އެވެ. އެ ގޮތުން ބަހްރޭނާއި ގަތަރުގައި ޓްރެއިނިން ކުރިއަށް ގެންދަން ކުރި މަސައްކަތް ކާމިޔާބު ނުވި ނަމަވެސް އިންޑިއާ އަށް ކޭމްޕެއް ދިއުމުގެ ފުރުސަތު ފަހިވި އެވެ. އެކަމަކު، ކޮވިޑް-19ގެ ހާލަތުގައި ދަތުރުތަކެއް ކުރުމުގެ ބަދަލުގައި ވީއޭއެމް އިން ނިންމީ އިންޑިއާ ޓީމެއް ގެނެސް ވަރުގަދަ މެޗުތަކެއް ގައުމީ ޓީމަށް ހޯދައިދިނުމަށެެވެ. އެ ގޮތުން ހައިދަރުއާބާދު ސްޕައިކާސް ޓީމު ގެންނަން ނިންމީ އެެވެ.
ސެންޓްރަލް ޒޯންގެ މުބާރާތުގައި މި ފަހަރު ވާދަކުރަނީ ފަސް ޓީމެވެ. މުބާރާތުގައި ރާއްޖެ އާއި ބަންގްލަދޭޝް ކުޅޭ މުބާރާތުގެ ފުރަތަމަ މެޗު އޮންނާނީ މި މަހު 23 ވަނަ ދުވަހެވެ. ދެ ވަނަ މެޗުގައި އެއް ދުވަސް ފަހުން، މި މަހު 25 ވަނަ ދުވަހު ރާއްޖެ ކުޅެން ޖެހޭނީ އުޒްބެކިސްތާނާ ދެކޮޅަށެވެ. އޭގެ އަނެއް ދުވަހު (26 ޑިސެމްބަރުގައި) ނޭޕާލާ ދެކޮޅަށް ކުޅުމަށް ފަހު، ލީގު ބުރުގެ ފަހު މެޗުގައި ކުޅޭނީ ލަންކާއާ ދެކޮޅަށެވެ. އެ މެޗު އޮންނާނީ މި މަހު 27 ވަނަ ދުވަހު އެވެ. އެންމެ ގިނަ ޕޮއިންޓް ހޯދާ ދެ ޓީމެއް ފައިނަލަށްދާ ގޮތަށް ފޯމެޓް އޮތްއިރު، ތިން ވަނަ އާއި ހަތަރު ވަނަ ރޭންކިން މެޗެއް ކުޅޭނެ އެވެ.
