ބަންގްލަދޭޝްގައި މި މަހު ކުޅޭ އޭވީސީ ސީނިއާ މެންސް ސެންޓްރަލް ޒޯން މުބާރާތަށް ތައްޔާރުވާން ރާއްޖޭގެ ގައުމީ ވޮލީބޯޅަ ޓީމުން ސްރީލަންކާއާ ދެކޮޅަށް ކުޅުނު ތިން ވަނަ މެޗުގައި ވެސް ސީދާ ތިން މިރޭ ސެޓުން ބަލިވެއްޖެ އެވެ.
ލަންކާ އިން ރާއްޖޭގެ މައްޗަށް ތިން މެޗުގައި ވެސް ކުރިހޯދީ ސީދާ ތިން ސެޓުންނެވެ. މީގެ ދެ އަހަރު ކުރިން 2019 ވަނަ އަަހަރު އޮގަސްޓް މަހު ލަންކާ އިން މާލެ އައިސް ކުޅުނު ތިން މެޗުގެ ތެރެއިން ފުރަތަމަ މެޗުގައި ސީދާ ތިން ސެޓުން މޮޅުވި ނަމަވެސް ދެން ކުޅުނު ދެ މެޗުން ރާއްޖެ ވަނީ ފުރަތަމަ ސެޓު ގެންގޮސްފަ އެވެ. އެކަމަކު، ލަންކާ އިން ވަނީ ފަހަތުން އަރައި ރާއްޖެ ބަލިކޮށްފަ އެވެ.
ރާއްޖޭން ލަންކާއާ ދެކޮޅަށް މި ކުޅުނު ތިން މެޗަކީ ދެ އަހަރުގެ މެދުކެނޑުމަކަށް ފަހު ކުޅުނު ފުރަތަމަ މެޗުތަކެވެ. ނޭޕާލުގެ ކަތުމަންޑޫގައި 2019 ވަނަ އަހަރު ޑިސެމްބަރު މަހު ބޭއްވި ސައުތު އޭޝިއަން ގޭމްސްގައި ކުޅުމަށް ފަހު މިދިޔަ ދެ އަހަރެއްހާ ދުވަސް ތެރޭ ވޮލީގެ ހަރަކާތްތައް އޮތީ ހުއްޓިފަ އެވެ. ކޮވިޑް-19ގެ ސަބަބުން މި އައި މެދުކެނޑުމަށް ފަހު ރާއްޖޭން ލަންކާ މެޗުތަކުގެ ކުރިން އެއްކޮށް ޕްރެކްޓިސް ކުރީ މަހެއްހާ ދުވަހު އެވެ. ލަންކާ އިން ވަނީ މި އަހަރު ތެރޭ ދެ ފަހަރެއްގެ މަތިން ޕްރެކްޓިސްކޮށް ޖުލައި މަހު އޭޝިއާ މުބާރާތުގެ ކޮލިފައިންގައި އުޒްބެކިސްތާން ބަލިކޮށްފަ އެވެ.
ބުރާސްފަތި ދުވަހުގެރޭ ރައީސް އިބްރާހިމް މުހައްމަދު ސޯލިހު ޝަރަފްވެރިކޮށްދެއްވި މެޗުން ރާއްޖެ ބަލިވީ 25-13، 25-14 އަދި 25-18 އިންނެވެ. ހުކުރު ދުވަހުގެރޭ ކުޅުނު ދެ ވަނަ މެޗުގެ ސެޓުތައް ލަންކާ އިން ގެންދިޔައީ 25-19، 25-21 އަދި 25-23 އިންނެވެ. އަދި ކުޅިވަރާބެހޭ ވަޒީރު އަހުމަދު މަހުލޫފް ޝަރަފްވެރިކޮށްދެއްވި މިރޭގެ މެޗުން ލަންކާ މޮޅުވީ 25-18، 25-17 އަދި 25-19 އިން ސެޓުތައް ގެންގޮސްގެންނެވެ.
ލަންކާ ޓީމުގެ މަހޭލާ ފުއްމައިގެން އަރައި ބޯޅައެއް ފޮނުވާލަނީ.-- ފޮޓޯ: މުހައްމަދު ޝާބިން/ އަދަދު
ޒުވާނުންގެ މަރުކަޒު އެތެރެ ކޯޓުގައި މިރޭ ކުޅުނު މެޗުގައި ރާއްޖޭން ފެށީ ފުރަތަމަ ހައެއްގައި ކެޕްޓަން އިސްމާއިލް ސާޖިދު (ކުޑަކާއްޓެ)، ސެޓަރަކަށް ހުސެއިން ވިޝާމް (ބުޅިކެ)، ލިބަރޯ އަކަށް އަޝްފާގު އާދަމް (އައްކަޅޭ)، ސެންޓަރަކަށް އާދަމް ފައިރޫޒް އަދި އެޓޭކަރުންނަށް އަލީ ހުޒާމް (ހުޒަންޓެ) އާއި އާދަމް ނަސީމް (އެޑަމް) ލައިގެންނެވެ.
ފުރަތަމަ ސެޓުން ފަށައިގެން ލަންކާ އިން ރަނގަޅު އެޓޭކްތަކެއް ފޮނުވާލައި، ރާއްޖޭގެ އެޓޭކްތައް ބްލޮކްކުރުމުގައި ކުރިހޯދި އެވެ. ލަންކާގެ އުމުރުން 20 އަހަރުގެ ކުޅުންތެރިޔާ މަހޭލާ ބަންޑާރާގެ އެޓޭކްތައް ހުއްޓުވުން ވީ އުނދަގޫ ކަމަކަށެވެ. މިރޭ ވެސް މަހޭލާ ވަނީ ގިނަ ހަމަލާތަކެއް ފޮނުވާލައި އެ ޓީމަށް މުހިއްމު ޕޮއިންޓްތަކެއް ހޯދައިދީފަ އެވެ. ރާއްޖޭގެ ކުޑަކާއްޓެ އާއި އެޑަމް ވަނީ ރަނގަޅު ހަމަލާތަކެއް ފޮނުވާލައިފަ އެވެ. ދެ ވަނަ މެޗުގައި ރާއްޖޭގެ ފައިރޫޒްގެ ފަރާތުން ފެނުނު ރަނގަޅު ބްލޮކްތައް މިރޭ އެހާ ބޮޑަށް ނުފެނުނެވެ.
މުޅި މެޗަށް ބަލާއިރު، ރާއްޖޭގެ ކޯޗު މުހައްމަދު ސާޖިދު (ކާއްޓެ) ތިން ސެޓުގެ ތެރެއިން ވެސް ޓައިމްއައުޓް ނަގައި ޓީމު ހަމަޔަކަށް އެޅުވޭތޯ މަސައްކަތްކުރި އެވެ. އެކަމަކު، ލަންކާ ފެނުނީ މެޗުގެ ކޮންޓްރޯލް ނަގައިގެން ރަނގަޅަށް ކުޅެލިތަނެވެ. ލަންކާ ޓީމަށް ހާސްކޮށްލެވޭ ވަރުގެ ކުޅުމެއް މިރޭގެ މެޗުގެ އެއްވެސް ސެޓެއްގެ ފަހު ކޮޅުގައި ރާއްޖެ އަށް ނުދެއްކުނެވެ. ތިން ވަނަ ސެޓުގައި ރާއްޖޭގެ ހުޒަންޓެ ރަނގަޅު ހަމަލާތަކެއް ފޮނުވާލި ނަަމަވެސް ލަންކާ ހާސްކޮށްލެވޭ ވަރަށް ރާއްޖޭގެ ޓީމަށް މިރޭގެ މެޗުގައި ތަފާތެއް ނުދެއްކުނެވެ.
ރާއްޖެ ކުޅޭ ސެންޓްރަލް ޒޯން ވޮލީ މުބާރާތް އޮތީ މި މަހު 22-29 އަށް ބަންގްލަދޭޝްގެ ޑާކާގަ އެވެ. ރާއްޖެ އާއި ލަންކާގެ އިތުރުުން އުޒްބެކިސްތާނާއި ނޭޕާލް އަދި ބަންގްލަދޭޝް އެ މުބާރާތުގައި ކުޅޭނެ އެވެ.
