ހުޅުމާލެ ސްމާޓް ސިޓީއަކަށް ހެދުމުގެ މަސައްކަތުގެ ދަށުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ އަމިއްލަ ސްމާޓް ސޮލިއުޝަންސް ބްރޭންޑް، ސްމާޓްކޮމް އިފްތިތާހުކޮށްފި އެވެ.
ސްމާޓްކޮމް ބްރޭންޑް އިފްތިތާހުކޮށްދެއްވީ ރޭ ހޮޓެލް ޖެންގައި ބޭއްވި ހަފުލާއެއްގައި އިކޮނޮމިކް މިނިސްޓަރު ފައްޔާޒް އިސްމާއިލެވެ. މި ހަފުލާގައި އެޗްޑީސީގެ އިސްވެރިންނާއި، އެ ކުންފުނީގެ އޯޕަން އެކްސެސް ނެޓްވާކް ޕާޓްނަރުން ކަމުގައިވާ އުރީދޫ އާއި ދިރާގާއި މީޑިއާނެޓުގެ އިސްވެރިން ބައިވެރިވެ ވަޑައިގެންނެވި އެވެ.
ސްމާޓްކޮމްއާ ގުޅިގެން އެޗްޑީސީން ބުނީ މި ބްރޭންޑުގެ ދަށުން ހުޅުމާލޭގައި ދިރިއުޅޭ މީހުން ޑިޖިޓަލީ ގުޅާލަން ތަފާތު އެކިއެކި ސްމާޓް ސޮލިއުޝަންތައް ތައާރަފުކުރެވި، މި މަސައްކަތް ކުރަން ތަފާތު ފަރާތްތަކާއެކީ ޕާޓްނާޝިޕްތައް އުފެދިގެން ދާނެ ކަމަށެވެ.
މި ސްމާޓް ސޮލިއުޝަންތަކުގެ ތެރޭގައި އެޕްތަކާއި ސްމާޓް ޓެކްނޮލޮޖީތައް ބޭނުންކޮށްގެން ހުޅުމާލޭގައި ދިރިއުޅޭ ރައްޔިތުންނަށާއި ވިޔަފާރިތަކަށް އަމާޒުކޮށްގެން ތައާރަފުކުރެވޭ ތަފާތު އެކި ދާއިރާތަކަށް ހާއްސަ ސޮލިއުޝަންތައް ހިމެނޭނެ އެވެ.
މި ސްމާޓް ސޮލިއުޝަންތަކުގެ ސަބަބުން ހިދުމަތްތައް ހޯދާ ރައްޔިތުންނަށާއި، ވިޔަފާރިތަކަށާއި، ސަރުކާރުގެ އިދާރާތަކަށް ލިބިގެންދާނެ ކަމަށް އެޗްޑީސީން ބުންޏެވެ. އަދި ސްމާޓްކޮމް ބްރޭންޑުގެ ދަށުން ޓެކްނޮލޮޖީއަށް ޝައުގުވެރިކަން ހުންނަ ޒުވާނުންނަށާއި، މި ދާއިރާގައި އުޅޭ އަދި ދާއިރާއަށް ނިކުންނަން ބޭނުންވާ ވިޔަފާރިތަކަށް ފުރުސަތުތައް ފަހިވެގެންދާނެ ކަމަށް އެ ކޯޕަރޭޝަނުން ބުންޏެވެ.
ސްމާޓް ސޮލިއުޝަންތަކުން ލިބޭ ބައެއް ފައިދާ
- ތައުލީމާއި ސިއްހަތާއި ދަތުރުފަތުރު ފަސޭހަވުން
- ރައްޔިތުންނާއި އާންމު ތަންތަނުގެ ރައްކާތެރިކަން ކަށަވަރުވުން
- ވިޔަފާރި އާއި އިގުތިސޯދު ކުރިއެރުން
- އިތުރު ވަޒީފާތައް ތަނަވަސްވުން
ހުޅުމާލެ ސްމާޓް ސިޓީއަކަށް ހެދުމުގެ އަމާޒަށް ވާސިލުވާން އެޗްޑީސީން އަންނަނީ ގިނަ އިންވެސްޓްމަންޓުތަކެއް ކުރަމުންނެވެ. މި މަސައްކަތުގެ އެންމެ މުހިންމު އެއް ބަޔަކާ މޮބައިލް، އިންޓަނެޓް އަދި ޓީވީ އެއް ވިއުގައެއް މެދުވެރިކޮށް ހިދުމަތްދެވޭ ގޮތަށް ފަރުމާކޮށްފައިވާ އޯޕަން އެކްސެސް ނެޓްވާކެވެ.
އެޗްޑީސީން ބުނީ މި ނެޓްވޯކާއެކީގައި ޑިޖިޓަލް އިންފްރާސްޓްރަކްޗާ ގާއިމްކުރުމުގެ ބޮޑު ބަޔެއް ނިމިފައިވާ ކަމަށެވެ. އަދި މި ނެޓްވާކް މެދުވެރިކޮށް ހުޅުމާލެ ދެވަނަ ފިޔަވަހީގެ ހިޔާ ސަރަހައްދުގައި ދިރިއުޅޭ މީހުންނަށް ދިރާގާއި އުރީދޫ އަދި މީޑިއާ ނެޓްގެ ހިދުމަތްތައް ދޭން ފަށައިފި އެވެ.
އޭގެ އިތުރުން އެ ސަރަހައްދުގެ މޮބައިލް ކަވަރޭޖް ރަނގަޅުކުރުމުގެ ގޮތުން ހުރިހާ އޮޕަރޭޓަރުން ބޭނުންކުރަން އެއް ޓަވަރުތަކަކާއި، ސްޓްރީޓް އަދި ރޫފްޓޮޕް ޕޯލް ޖެހުމުގެ މަސައްކަތް ވެސް އެޗްޑީސީން ދަނީ ކުރަމުންނެވެ. މިހާތަނަށް ހިޔާ ފްލެޓް ސަރަހައްދުގައި ހަތަރު ޓަވަރެއް ޖަހައި، ދިރާގާއި އުރީދޫގެ ހިދުމަތްތައް މި ޓަވަރުތައް މެދުވެރިކޮށް ދެމުން އަންނަ ކަމަށް އެޗްޑީސީން ބުންޏެވެ.
