ގައުމީ ވޮލީބޯޅަ ޓީމުގެ ކެޕްޓަނަކަށް ޓީމުގައި ހުރި އެންމެ ތަޖުރިބާކާރު އެއް ކުޅުންތެރިޔާ އިސްމާއިލް ސާޖިދު (ކުޑަކާއްޓެ) ހަަމަޖައްސައިފި އެވެ.
ރާއްޖޭގެ އެންމެ މޮޅު ވޮލީބޯޅަ ކުޅުންތެރިޔާގެ މަގާމު ހަތަރު ފަހަރެއްގެ މަތިން ހޯދާފައިވާ ކުޑަކާއްޓެ ގައުމީ ޓީމުގެ ކެޕްޓަނަކަށް ހަމަޖައްސާފައިވަނީ މިއަދު މެންދުރު ސޯލްޓް ކެފޭގައި ބޭއްވި އިވެންޓެއްގަ އެވެ.
ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ ރައީސް މުހައްމަދު ރަނޭޝް (ރަނޭ) ވިދާޅުވީ ވީއޭއެމްގެ ހިންގާ ކޮމިޓީގެ ވިސްނުމަކީ ސީނިއާ ކުޅުންތެރިންގެ ތެރެއިން ރިޓަޔާމެންޓާ ކައިރީގައި ހުރި ކުޅުންތެރިންނަށް ޓީމު ލީޑުކުރުމުގެ ޒިންމާ އެކި މުބާރާތްތަކުގައި ދިނުމަށް ކަމަށެވެ. ކުޑަކާއްޓޭ ކެޕްޓަނަކަށް ހަމަޖެއްސީ މި މަހު 22-29 އަށް ބަންގްލަދޭޝްގެ ޑާކާގައި ކުރިއަށްދާ ސެންޓްރަލް ޒޯން ސީނިއާ މެންސް ވޮލީބޯލް ޗެމްޕިއަންޝިޕަށެވެ.
ކުޑަކާއްޓެގެ ކެޕްޓަންކަމުގެ ދަށުން ގައުމީ ޓީމު ކުޅޭނެ ފުރަތަމަ މެޗަކީ މާދަމާރޭ ގައުމީ ވޮލީބޯޅަ ޓީމުން ސްރީ ލަންކާއާ ދެކޮޅަށް މާލޭގައި ކުޅޭ މެޗެވެ. އެ މެޗު ޝަރަފްވެރި ކޮށްދެއްވާނީ ރާއްޖޭގެ ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު އެވެ.
ލަންކާއާ ދެކޮޅަށް މާލޭގައި ޖުމްލަ ތިން މެޗެއް ކުޅެން ހަމަޖެހިފައިވެ އެވެ. ދެ ވަނަ މެޗު އޮތީ ހުކުރު ދުވަހުގެރޭގަ އެވެ. އަދި ފަހު މެޗު ކުޅޭނީ އާދިއްތަ ދުވަހުގެރޭގަ އެވެ.
މިއަދު ބޭއްވި އިވެންޓްގައި ވާހަކަ ދައްކަވަމުން ވީއޭއެމްގެ ރައީސް ރަނޭ ވަނީ ލަންކާ މެޗުގައި ގައުމީ ޓީމުގެ ކުޅުންތެރިން ޑިސިޕްލިން ހިފަަހައްޓައިގެން ރަނގަޅު ކުޅުމެއް ދެއްކުމަށް އެދިވަޑައިގެންފަ އެވެ. އަދި ސެންޓްރަލް ޒޯން މުބާރާތަށް ތައްޔާރުވާން މި ލިބުނު ކުރު މުއްދަތުގައި ވެސް ޓީމު ކުރި މަސައްކަތަށް ބަލާއިރު، ރަން މެޑަލެއް ގެނެވޭ ވަރަށް ކުޅުންތެރިން މަސައްކަތް ކުރަން އެދޭ ކަމަށެވެ.
ކުޑަކާއްޓެ ގައުމީ ޓީމުގެ ކެޕްޓަނަކަށް ހަމަޖެއްސުމުގެ ކުރިން އެންމެ ފަހުން ގައުމީ ޓީމުގެ ކެޕްޓަންކަން ކުރީ އަލީ ހުޒާމް (ހުޒަންޓެ) އެވެ. ހުޒަންޓެއާ ކެޕްޓަންކަން ހަވާލުކުރީ 2019 ވަނަ އަހަރު އަހުމަދު އަބްދުލް ކަރީމް (ލޯންގޭ) ގައުމީ ޓީމުން ރިޓަޔާކުރި މުބާރާތުގަ އެވެ. އޭގެ ކުރިން ކެޕްޓަނަކަށް ހުރީ ލޯންގޭ އެވެ.
ލޯންގޭ އަށް ކެޕްޓަން ބޭންޑް ދިނީ 2018 ވަނަ އަަހަރު އެވެ. އެއީ އޭގެ ކުރިން ގިނަ އަހަރުތަކެއް ވަންދެން ޓީމުގެ ކެޕްޓަނެއްގެ ޒިންމާ އުފުލި އިޝާން މުހައްމަދު (ބަޓިސް) ރިޓަޔާކުރުމުންނެވެ.
ގައުމީ އަންހެން ޓީމުގެ ސީނިއާ ގިނަ ކުޅުންތެރިންތަކެއް ނުލައި މި މަހު ސެންޓްރަލް ޒޯން އަންހެން މުބާރާތުގައި ކުޅެން ޖެހޭއިރު، އެ ޓީމު ލީޑުކުރާނެ ކެޕްޓަނެއް ކަނޑައަޅާނީ މުބާރާތަށް ފުރުމުގެ ކުރިން އެ ޓީމަށް ހާއްސަކޮށް ބާއްވާ އިވެންޓެއްގަ އެވެ.
