ބަހްރޭންގައި ކުރިއަށްދާ ޕެރަ ބެޑްމިންޓަން މުބާރާތުގައި ރާއްޖޭގެ ހައްވާ އީޝަލް ރިޔާޒް، މެޗަކުން މޮޅުވެ، ރާއްޖޭގެ ކުޅިވަރު ތާރީހުން ހާއްސަ ޖާގައެއް ހޯދިއިރު، ހުރިހާ މެޗުތަކެއްގައި ވެސް އޭނާ ދެއްކީ ތައުރީފު ހައްގު ކުޅުމެކެވެ.
ފަސް ކުޅުންތެރިން ވާދަކުރާ ގްރޫޕްްގައި އިއްޔެ އީޝަލް ވަނީ އޭނާ ކުޅެން ޖެހޭ ހަތަރު މެޗު ވެސް ކުޅެފަ އެވެ. އީޝަލް މޮޅުވީ ބަންގްލަދޭޝްގެ ޝޯމީ މޮޒުމްދާރު އަތުން 21-18، 21-13 އިންނެވެ. ދެން އޭނާ އެންމެ މޮޅަކާ ގާތަށް ޖެހިލީ ބޫޓާންގެ ސަޕުނާ ސުއްބާއާ ދެކޮޅަށް ކުޅުނު މެޗުގަ އެވެ. އެ މެޗު ދިޔައީ 21-19، 22-20 އިންނެވެ.
"ބޫޓާން މެޗު ދިޔައީ ވަރަށް ކްލޯސްކޮށް ހަގީގަތުގައި. އީޝަލް އެ މެޗުގައި ނިންމާލަން ވެސް ލިބިފައި ދިޔައީ،" އީޝަލްގެ ކޯޗު އަހުމަދު އިޔާދު ބުންޏެވެ.
ދެން އެ ގްރޫޕްގައި އީޝަލް ކުޅުނު ދެ މެޗަކީ އިންޑިއާގެ ނިތިޔާ ސުމާތީ އާއި ޗައިނީސް ޓައިޕޭގެ ޔޫ ޔެންއާ ދެކޮޅަށް ކުޅުނު މެޗެވެ. ޔޫ ޔެން އަތުން ބަލިވީ 21-02، 21-02 އިންނެވެ. އަދި ނިތިޔާ އަތުން ބަލިވީ 21-02، 21-03 އިންނެވެ.
އިންޑިއާގެ ނިތިޔާ (ވ) އާއި ރާއްޖޭގެ އީޝަލް މެޗު ފެށުމުގެ ކުރިން.
ޔޫތު މިނިސްޓަރު އަހުމަދު މަހުލޫފް ވިދާޅުވީ ރާއްޖޭގެ ތާރީހަށް ބެލިޔަސް އީޝަލް މި ހޯދި ކާމިޔާބީ ހާއްސަވާނެ ކަމަށާއި އެކަމާ ވަރަށް ބޮޑަށް ފަހުރުވެރިވާ ކަމަށެވެ. އަދި ސަރުކާރުން ޕެރަލިމްޕިކް އެސޯސިއޭޝަނާ އެކު ކުރެވޭ މަސައްކަތުން ރަނގަޅު ކާމިޔާބީ ލިބޭކަން ވެސް މިނިސްޓަރު ވަނީ ފާހަގަކުރައްވައިފަ އެވެ.
ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ ރައީސް މޫސާ ނާޝިދު ވިދާޅުވީ އީޝަލް ހޯދި ތާރީހީ ކާމިޔާބީގެ ފަހަތުގައި އޮތީ ހިތްވަރުއެލުވާނުލައި ކުރި މަސައްކަތް ކަމަށެވެ. މޮޅެއް ހޯދުމާ އެކު މުބާރާތަށް ކަނޑައެޅި އެއް ޓާގެޓެއް ހާސިލްވީ ކަމަށް މޫސަ ވިދާޅުވި އެވެ.
"އީޝަލް އަހަރެމެން އެންމެނަށް އެ ސާބިތުކޮށްދިނީ ޕެރަ ބެޑްމިންޓަން ކުރިއަރުވަން ރަނގަޅު މިސްރާބަކަށް ދެވޭނެކަން. މުސްތަގުބަލުގައި ޕެރަ ބެޑްމިންޓަންގެ އިތުރު އެތުލީޓުން ގައުމުގެ އެކި ހިސާބުތަކުން ގުޅުމުގެ އުއްމީދުތައް އާވެއްޖެ،" މޫސަ ވިދާޅުވި އެވެ.
އީޝަލް އަކީ ބެޑްމިންޓަނުން ކުރިއަށް ދިއުމަށް ބޮޑެތި އުއްމީދުތަކާ އެކު ގިނަ މަސައްކަތްތަކެއް ކުރާ އެތުލީޓެކެވެ. އީޝަލް ހޯދި ކާމިޔާބީ އަށް ގައުމީ ބެޑްމިންޓަން ޓީމުގެ ކުޅުންތެރިންގެ އިތުރުން އެހެން ކުޅިވަރުތަކުގެ ކުޅުންތެރިން ވެސް ވަނީ މަރުހަބާ ކިޔައިފަ އެވެ.
ރާއްޖޭގައި ޕެރަ ބެޑްމިންޓަން ރަނގަޅު މިސްރާބަކަށް ގެންދިއުމުގައި އަތުކުރި އޮޅާލައިގެން މަސައްކަތްކުރާ ފަރާތަކީ ކޯޗު އިޔާދު އެވެ. އޭނާގެ މަސައްކަތުން މި އަހަރު ދުބާއީގައި ކުރިއަށްދިޔަ ޕެރަ ބެޑްމިންޓަން ބައިނަލްއަގުވާމީ މުބާރާތުގައި ވާދަކުރި ރާއްޖޭގެ ގައުމީ ޓީމަށް ގިނަ ބައެއްގެ ސަމާލުކަން ހުއްޓުނެވެ. އެ ފަހަރު، ބެޑްމިންޓަން ދުނިޔޭގެ ފެޑެރޭޝަން (ބީޑަބްލިއުއެފް)ގެ މީޑިއާ އަށް ރާއްޖޭގެ ޓީމުގައި ހިމެނޭ އަބްދުލް ލަތީފް މުހައްމަދާއި އަހުމަދު ފަޔާޒްގެ އިތުރުން ޓީމުގެ ކޯޗު އިޔާދު ވަނީ ޕެރަ ބެޑްމިންޓަނަށް ރާއްޖޭގައި އޮތް ފުރުސަތުތަކާ ބެހޭގޮތުން އިންޓަވިއުއެއް ދީފަ އެވެ.
