މޯލްޑިވްސް އެލައިޑް ހެލްތު ކައުންސިލްގެ ނަމުގައި އިންޑިއާގެ އެޖެންސީއަކުން އަސްލާ އެއްގޮތަށް ޑޮކިއުމެންޓް ނަކަލުކޮށް ތައްޔާރުކުރި މައްސަލައެއް ފެންމަތިވެއްޖެ އެވެ.
ފޯޖްކޮށްފައި ވަނީ ބޭރުގެ ޑޮކްޓަރުންނާއި ނަރުހުންނާއި ސިއްހީ ހިދުމަތްތެރިންނަށް ރާއްޖެއިން ވަޒީފާ ލިބިފައިވާ ތަނަށް ހުށަހަޅަންޖެހޭ "ރެޖިސްޓްރޭޝަން ޑޮކިއުމެންޓް" އެވެ. އެއީ މޯލްޑިވްސް އެލައިޑް ހެލްތު ކައުންސިލުން ދޫކުރާ ލިޔުމެކެވެ.
މިގޮތަށް ފޯޖް ޑިކިއުމަންޓް ދޫކޮށްފައި ވަނީ ކިތައް ހިއްސީ ހިދުމަތްތެރިންނަށް ކަން ނޭނގެ އެވެ.
މޯލްޑިވްސް އެލައިޑް ހެލްތު ކައުންސިލުން އިއްޔެ ނެރުނު ބަޔާނެއްގައި ބުނީ، އަސްލާއި އެއްގޮތަށް ނަކަލުކޮށްފައިވާ ޑޮކިއުމެންޓްތައް ނުވަތަ ފޯޖުކޮށްފައިވާ ޑޮކިއުމެންޓް އެ ކައުންސިލްގެ ނަމުގައި އުފައްދާފައިވާކަން ސަމާލުކަމަށް އައުމާއެކު، ބެލި ބެލުމުން އެކަން ކޮށްފައިވަނީ އިންޑިއާއަށް ނިސްބަތްވާ ރެކްރޫޓްމެންޓް އެޖެންސީއަކުންކަން އެނގިފައިވާ ކަމަށެވެ. އެޖެންސީގެ ނަން ހާމަކޮށްފައެއް ނުވެ އެވެ.
އެފަދަ ރެޖިސްޓްރޭޝަން ސެޓްފިކެޓެއް އެ ކައުންސިލުން ބޭރުގެ އެއްވެސް އެޖެންސީއަކަށް ދީފައިނުވާނޭކަން ބަޔާނުގައި ފާހަގަކޮށްފަ އެވެ.
ރާއްޖޭގައި މަސައްކަތްކުރާ ސިއްހި ދާއިރާގެ ބޭރު ފަރާތްތަކަށާއި ސިއްހީ ދާއިރާގެ އިދާރާތަކަށް އެފަދަ ކަންކަމަށް ސަމާލުވުމަށް އެ ކައުންސިލްގެ ބަޔާނުގައި ވަނީ އިލްތިމާސްކޮށްފަ އެވެ.
ބިދޭސީ މުވައްޒަފުން ވަޒީފާއަށް ނެގުމުގެ ކުރިން ހުށަހަޅާ ޑޮކިއުމެންޓަކީ އަސްލު ޑޮކިއުމެންޓްކަމާއި ރެޖިސްޓްރޭޝަން ކަށަވަރުކުރުމަށް ވެސް ކައުންސިލުން އިލްތިމާސްކުރެ އެވެ.
މޯލްޑިވްސް އެލައިޑް ކައުންސިލުން އެ މައްސަލައިގައި ހިމެނޭ އެޖެންސީގެ ނަމެއް ބަޔާނުގައި ފާހަގަކޮށްފައެއް ނުވެ އެވެ. އަދި އެ މައްސަލައިގައި އެއްވެސް ފިޔަވަޅެއް އަޅާފައިވާކަމެއް ވެސް ފާހަގައެއް ނުކުރެ އެވެ.
