ސްރީ ލަންކާގައި ކުރިއަށްދާ ފޯ ނޭޝަންސް ކަޕްގައި އިއްޔެ ހަވީރު ރާއްޖެ 2-1 އިން ބަލިކޮށް، ބަންގްލަދޭޝް އިން 18 އަހަރަށް ފަހު ރާއްޖޭގެ މައްޗަށް މޮޅެއް ހޯދީ ކުރިން ރޭވި ގޮތަށް ކުޅެގެން ކަމަށް ބަންގްލަދޭޝްގެ ކޯޗު ޕޯޗުގަލްގެ މާރިއޯ ލެމޯސް ބުނެފި އެވެ.
އިއްޔެގެ މެޗާ ހަމައަށް ބަންގްލަދޭޝް އިން އެންމެ ފަހުން ރާއްޖެ ބަލިކުރީ 2003 ވަނަ އަހަރު ބަންގްލަދޭޝްގައި ކުޅުނު ސާފް ޗެމްޕިއަންޝިޕް ފައިނަލުގައި ޕެނަލްޓީ ޖަހައިގެންނެވެ. އޭގެ ފަހުން ތަފާތު ހަތަރު ކޯޗުންނާ އެކު ބަންގްލަދޭޝް ސީނިއާ ފުޓްބޯޅަ ޓީމު ވަނީ ރާއްޖެ އަތުން ހަތަރު މެޗުން ވެސް ބަލިވެފަ އެވެ.
އަށާރަ އަހަރުގެ ދިގު އިންތިޒާރަށް ނިމުން ގެނެސް ބަންގްލަދޭޝަށް ރާއްޖޭގެ މައްޗަށް މޮޅެއް ހޯދުނީ މި ފަހަރުގެ ފޯ ނޭޝަންސް ކަޕަށް ބަންގްލަދޭޝާ ހަވާލުވި ކޯޗު ލެމޯސްގެ އިރުޝާދުގެ ދަށުންނެވެ.
އިއްޔެގެ މެޗަށް ފަހު އޮތް ނޫސްވެރިންގެ ބަައްދަލުވުމުގައި ލެމޯސް ބުނީ މި ލެވަލްގެ ފުޓްބޯޅައިގައި ޓެކްޓިކަލީ އާއި މެންޓަލީ ވެސް ވަރަށް ރަނގަޅަށް ތައްޔާރުވާން ޖެހޭނެ ކަމަށެވެ. ބަންގްލަދޭޝް އިން ކުރީ އެ މަސައްކަތް ކަމަށާއި ޓީމުގައި ހުރި މައްސަލަތަކުގެ ވާހަކަ ނުދައްކައި، ދިމާވާ ކަންކަމަށް ހައްލު ހޯދައި މެޗުތަކަށް ރަނގަޅަށް ތައްޔާރުވީ ކަމަށް ލެމޯސް ބުންޏެވެ.
ލެމޯސް ވަނީ ރާއްޖެ އަތުން މޮޅުވާން ޓީމު ރޭވި ގޮތް އިއްޔެގެ ނޫސްވެރިންގެ ބައްދަލުވުމުގައި ކިޔައިދީފަ އެވެ.
"އަހަރެން ބޭނުންވީ ރާއްޖޭގެ އަށް ނަމްބަރު މިޑްފީލްޑަރު (އައިސަމް) ގޭމުން ބޭރުކޮށްލަން. އެއީ އެ މީހުން އެ ކުޅެން އުޅޭ ފުޓްބޯޅަ އަށް ބަލާއިރު، އޭނަ (އައިސަމް އަކީ) އެންމެ މޮޅު ކުޅުންތެރިޔާ. އަހަރެން ބެހެއްޓީ މުޅި މެޗުގައި އައިސަމް ކައިރީގައި އަހަރެމެންގެ އެއް ކުުޅުންތެރިއަކު. އެ ހިސާބުން ރާއްޖޭގެ ޕްލޭމޭކަރު ހުއްޓުވުނީ،" ލެމޯސް ބުންޏެވެ.
"ދެން އަހަރެމެން ބެލީ އަހަރެމެންގެ ފަހަތުން ޖާގަ ނުދީ ރާއްޖޭން ފަޅި އަށް ކުޅެން ފުރުސަތު ދޭން. ފަޔަށް ކުޅުމުގެ ބަދަލުގައި ރާއްޖެ ލައްވައި ދިގު ބޯޅަތަކެއް ޖަހަން. ފަޔަށް ނުކުޅޭ ގޮތް ހަދައިފިއްޔާ ރާއްޖޭގެ ފޯވާޑަކަށް ހުރި އަލީ އަޝްފާގަށް ކުޅެވޭނީ މަދު ބޯޅައެއް. އަހަރެމެން އޭނަ ވެސް ރަނގަޅަށް ބެލިން. ދެން ރާއްޖޭގެ ފުލްބެކުން ކުރިއަރާ ވަގުތު ހުސްވާ ޖާގަ އަށް ކައުންޓަ އެޓޭކްކުރަން ޓާގެޓްކުރީ. އެއީ ރާއްޖޭގެ ގޭމްގައި ފުލްބެކުން ނާރައި ބޭނުންވާ ގޮތަށް އެޓޭކެއް ނުކުރެވޭނެ،"
ލެމޯސް ބުނީ ރަނގަޅު ރޭވުންތަކަކާ އެކު 18 އަހަރަށް ފަހު ވިޔަސް ރާއްޖެ ބަލިކުރެވުމަކީ ކުޅުންތެރިންނަށް ލިބޭ ވަރަށް ބޮޑު އުފަލެއް ކަމަށެވެ.
ފޯ ނޭޝަންސް ކަޕްގައި ބަންގްލަދޭޝް ކުޅުނު ފުރަތަމަ މެޗުގައި ސީޝެލްސްއާ 1-1 އިން އެއްވަރުވި މެޗަށް ފަހު ލެމޯސް ވަނީ އެ ޓީމަށް މުހިއްމު މެސެޖެއް ދީފަ އެވެ.
"މި ކަހަލަ މުބާރާތަކީ ޗެސް ކުޅުން ކަހަލަ ކަމެެކޭ އަހަރެން ބުނީ. ކޮންމެ މެޗެއް ފަހަރަކު ނަގައިގެން ވިސްނަންވީ. މިއީ (ރާއްޖެ ބަލިކުރެވުމަކީ) އަހަރެމެންނަށް ގިރާކުރެވުނު ވަރަށް މުހިއްމު ފިޔަވަޅެއް،" ލެމޯސް ބުންޏެެވެ.
އިއްޔެގެ މެޗުގައި ބަންގްލަދޭޝް އިން ލީޑުނެގީ 12 ވަނަ މިނިޓްގައި ކެޕްޓަން ޖަމާލް ބުޔާން ޖެހި ގޯލުންނެވެ. ރާއްޖޭން އެއްވަރުކުރީ މެޗުގެ 33 ވަނަ މިނިޓްގައި މުހައްމަދު އުމެއިރު ޖެހި ގޯލުންނެވެ. ބަންގްލަދޭޝް މޮޅުވި ގޯލު ޖެހީ މެޗުގެ 86 ވަނަ މިނިޓްގައި ޕެނަލްޓީ އަކުންނެވެ. މިއީ ރާއްޖޭގެ ގޯލުގައި ހުރި ޒުވާން ކީޕަރު އަލީ ނާޖިހު (ނާޖީ) ކުުރި ފައުލަކުން ދިން ޕެނަލްޓީން ބަންގްލަދޭޝް ޑިފެންޑަރު ޓޯޕޫ ބަރްމަން ޖެހި ގޯލެކެވެ.
އިއްޔެގެ މެޗުގެ ފުރަތަމަ ހާފް ނިމުމުން ބަންގްލަދޭޝް ޓީމު ގާތުގައި ލެމޯސް ބުނީ ޗެމްޕިއަނުންނަށް ވާން ބޭނުންނަމަ ރާއްޖޭން އެ ޖެހި ކަހަލަ ގޯލެއް ވަންނަން ދެން ދީގެން ނުވާނެ ކަމަށެވެ.
"ޗެމްޕިއަނުންނަކަށް ނުވެވޭނެ އެ ކަހަަލަ ގޯލު ޖަހަން ފުރުސަތު ދީގެނެއް. އަހަރެން ވަރަށް ގަޔާވި ރާއްޖޭން ޖެހި ގޯލަށް. އެއީ އަހަރެމެން ހެދީ އެންމެ ގޯހެއް. އޭގެ އަގު ދައްކަން ޖެހިއްޖެ. އެއީ ޕްރޮފެޝަނަލް ހައި ޕާފޯމަންސް ފުޓްބޯޅައިގައި ވާން ޖެހޭނެ ގޮތަކީ،" ލެމޯސް ބުންޏެވެ.
ކުރިން ޑާކާ އަބަހާނީ ގޮވައިގެން އޭއެފްސީ ކަޕްގައި ރާއްޖޭގެ މާޒިޔާއާ ދެކޮޅަށް ކުޅުނު ލެމޯސް ބުނީ ރާއްޖެއާ ދެކޮޅަށް ކުޅޭއިރު މާ ގިނައިން ބޯޅައެއް ނުގެންގުޅެވޭނެކަން މެޗަށް ނުކުތްއިރު ވެސް ބަންގްލަދޭޝް އިން ނިންމި ކަމަށެވެ.
"އަހަރެމެން ކުޅުންތެރިން ގާތުގައި ބުނިން ހާސްވެގެން ތެޅިފޮޅިނުގަންނާށޭ. ރާއްޖެއާ ދެކޮޅަށް ކުޅޭއިރު ލިބޭނީ ދޭއް ނޫނީ ތިން ފުރުސަތު ގޯލެއް ޖަހަން. އޭގެއިން ބޭނުން ހިފަން ޖެހޭނެ. އެކަން މި ކުރީ،" ލެމޯސް ބުންޏެވެ.
މުބާރާތުގައި ރޭ ސީޝެލްސް އިން 1-0 އިން ލަންކާ ބަލިކުރިއިރު، އެ މެޗަށް ފަހު މުބާރާތުގެ ފަހު މެޗުތަކަށްދާއިރު ހުރިހާ ޓީމަކަށް ވެސް ފައިނަލަށް ދިއުމުގެ އަމިއްލަ ބާރު އެބައޮތެވެ.
ފޯ ނޭޝަންސް ކަޕްގެ ލީގު ބުރުގެ ފަހު ދެ މެޗަށްދާއިރު، އެއް ވަަނައިގައި އޮތް ބަންގްލަދޭޝާއި ދެ ވަނައިގައި އޮތް ސީޝެލްސް އަށް ވަނީ ހަތަރު ޕޮއިންޓް ލިބިފަ އެވެ. ތިން ވަނައިގައި އޮތް ރާއްޖެ އާއި ހަތަރު ވަނައިގައި އޮތް ލަންކާ އަށް ދެ މެޗުން ވަނީ ޕޮއިންޓެއް ލިބިފަ އެވެ.
މުބާރާތުގެ ލީގު ބުރުގެ ފަހު ދެ މެޗު ކުޅޭނީ އަންގާރަ ދުވަހު އެވެ. އެ ދުވަހު ހަވީރު ކުޅޭނީ ސީޝެލްސް އާއި ރާއްޖެ އެވެ. ދެ ވަނަ މެޗުގައި އެރޭ ލަންކާ ކުޅޭނީ ބަންގްލަދޭޝްއާ އެވެ.
ބަންގްލަދޭޝާއި ސީޝެލްސް އަށް އެ މެޗުތައް އެއްވަރުކޮށްލައިގެން ވެސް ފައިނަލުގެ ޖާގަ ލިބޭނެ އެވެ. ރާއްޖެ އާއި ލަންކާ އަށް ފައިނަލަށް ދެވޭނީ އެ މެޗުތަކުން މޮޅުވެގެންނެވެ. ހަތަރު ޓީމު ޕޮއިންޓް އެއްވަރުވެއްޖެ ހާލަތެއްގައި ބަލާނީ ލަނޑުގެ ތަފާތަށެވެ.
