މަހިންދަ ރާޖަޕަކްސަ ފޯ ނޭޝަންސް ކަޕްގައި މިރޭ ސީޝެލްސް އިން 1-0 އިން މުބާރާތް ހޯސްޓްކުރާ ސްރީ ލަންކާ ބަލިކޮށް ފައިނަލުގެ އުއްމީދު ބޮޑުކޮށްފި އެވެ.
ފޯ ނޭޝަންސް ކަޕްގެ ލީގު ބުރުގެ ފަހު ދެ މެޗަށްދާއިރު، އެއް ވަަނައިގައި އޮތް ބަންގްލަދޭޝާއި ދެ ވަނައިގައި އޮތް ސީޝެލްސް އަށް ވަނީ ހަތަރު ޕޮއިންޓް ލިބިފަ އެވެ. ތިން ވަނައިގައި އޮތް ރާއްޖެ އާއި ހަތަރު ވަނައިގައި އޮތް ލަންކާ އަށް ދެ މެޗުން ވަނީ ޕޮއިންޓެއް ލިބިފަ އެވެ.
އަންގާރަ ދުވަހު މުބާރާތުގެ ލީގު ބުރުގެ ފަހު ދެ މެޗު ކުޅޭނެ އެވެ. ހަވީރު ކުޅޭނީ ސީޝެލްސް އާއި ރާއްޖެ އެވެ. ދެ ވަނަ މެޗުގައި އެރޭ ލަންކާ ކުޅޭނީ ބަންގްލަދޭޝްއާ އެވެ. ބަންގްލަދޭޝާއި ސީޝެލްސް އަށް އެ މެޗުތައް އެއްވަރުކޮށްލައިގެން ވެސް ފައިނަލުގެ ޖާގަ ލިބޭނެ އެވެ. ރާއްޖެ އާއި ލަންކާ އަށް ފައިނަލަށް ދެވޭނީ އެ މެޗުތަކުން މޮޅުވެގެންނެވެ. ހަތަރު ޓީމު ޕޮއިންޓް އެއްވަރުވެއްޖެ ހާލަތެއްގައި ބަލާނީ ލަނޑުގެ ތަފާތަށެވެ.
ފުރަތަމަ މެޗުގައި ބަންގްލަދޭޝާ 1-1 އިން އެއްވަރުކުރި މެޗުގައި ސީޝެލްސް އިން ބޭނުންކުރި ފުރަތަމަ އެގާރަ އަށް ވުރެ ބޮޑަށް އެޓޭކިން އަށް ވިސްނައިގެންނެވެ. އެ ބަދަލުތަކުގެ ތަފާތު ސީޝެލްސް ޓީމުގެ ކުޅުމުން ވެސް ފެނުނެވެ.
ލަންކާގެ ގިނަ ސަޕޯޓަރުން ކުރިމަތީގައި މިރޭ ކޮލަމްބޯގެ ރޭސްކޯސް ސްޓޭޑިއަމްގައި ސީޝެލްސް އިން ފުރަތަމަ ހާފުން ފެށިގެން ފެނުނީ ވަރަށް ކޮންފިޑެންސާ އެކު ކުޅެލިތަނެވެ. ސީޝެލްސް އިން ފުރަތަމަ ހާފުގައި ލަނޑު ޖަހާނެ ރަނގަޅު ފުރުސަތުތަކެއް ތަނަވަސްކުރި އެވެ. އެ ގޮތުން މެޗުގެ 12 ވަނަ މިނިޓްގައި ލަންކާގެ ޑިފެންޑަރު އަސީކުއްރަހްމާން އަތުގައި ބޯޅަ ޖެހުމުން ސީޝެލްސް އަށް ޕެނަލްޓީ އެއް ދިނެވެ. ސީޝެލްސްގެ ކެޕްޓަން ސްޓީވް ބެނޮއިޓް ޖެހި ޕެނަލްޓީ ދިޔައީ ބޭރުންނެވެ.
މެޗުގެ 25 ވަނަ މިނިޓްގައި ސީޝެލްސްގެ ފޯވާޑް ސްޓެފަން ހިއުގް ހާފުގެ މެދުތެރެއިން ހިލޭ ޖެހުމަކުން ޖެހި ބޯޅަ އަމާޒުވީ ގޯލުގެ ދަނޑިއަށެވެ. އޭގެ ފަހުން ސީޝެލްސްގެ ފޯވާޑް ޔީވެސް ޕެރީ އާނެސްޓާ ޖެހި ބޯޅަ ލަންކާގެ ގޯލްކީޕަރު އަދި ކެޕްޓަން ސުޖަން ޕެރޭރާ ވަނީ މަތަކޮށްފަ އެވެ.
ރާއްޖެ ކޮޅަށް ފުރަތަމަ މެޗުގައި ހަތަރު ގޯލު ޖެހި ލަންކާގެ ފޯވާޑް ވަސީމް ރަޒީކަށް މި މެޗުގައި ރަނގަޅު ކުޅުމެއް ނުދެއްކުނީ ސީޝަލްސް ޑިފެންޑަރުން އޭނާ މާކްކޮށްގެން ކުޅެމުންނެވެ. އަދި ލަންކާގެ އަނެއް ފޯވާޑް ޑިލޯން ޑި ސިލްވާ ރަނގަޅު ހުރަސްތަކެއް ނެގިއިރު ޖަހާނެ ކުޅުންތެރިއަކު އޭރިއާތެރޭގައި ނެތެވެ. އޭރިއާބޭރުން ލަންކާގެ ޑިފެންޑަރު ޗަލަނާ ޗަމީރާ ޖެހި ބޯޅަ ދިޔައީ ހުރަސްދަނޑި މަތިންނެވެ.
ސީޝެލްސް އިން ލަނޑެއް ޖަހަން ކުރި މަސައްކަތް ކާމިޔާބުވީ މެޗުގެ 68 ވަނަ މިނިޓްގަ އެވެ. ކޯނަރަކުން ޔޯސިފް ރަވީނިއާ ނެގި ބޯޅަ ވަރެން މެލީ ވަނީ ބޮލުން ގޯލުގެ ތެރެއަށް ފޮނުވާލައިފަ އެވެ. އޭގެ ދެ މިނިޓް ފަހުން ހެންރީ ބޮލުން ޖެހި ބޯޅަ ދިޔައީ ހުރަސްދަނޑިމަތިންނެވެ.
ލަންކާ އިން ބަދަލުތަކެއް ގެނެސްގެން ނަތީޖާ އެއްވަރުކުރެވޭތޯ މަސައްކަތްކުރި އެވެ. އެ ގޮތުން ބަދަލެއްގެ ގޮތުގައި ކުޅެން އެރި ލަންކާގެ ކަވިންދޫ އިޝާން ވަނީ ލަންކާ އަށް ގޯލެއް ޖަހައިދޭން ރަނގަޅު ހަމަލާތަކެއް ފޮނުވާލައިފަ އެވެ.
